Yeremĩa 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akaha Nebũkadeneza eritabala oko bihanda

¹ Oko nzũko yʼeritabala lya Yehoyakĩmũ mugala wa Yosĩa, omwami wʼeYũda ekĩnywa ekĩkalũa oko Mwami Mukulu mokyahĩka uku Yeremĩa kiti,

² Omwami Mukulu mwambwira ati, Ũyĩkokoteraye ebikoba nʼesyongomo, ũhĩrebyo omo bĩkya byawe.

³ Utume omwatsi oko mwami wʼeEdomũ, nʼoko mwami wʼeMoabũ, nʼoko mwami wʼabana ba Amonĩ, nʼoko mwami wʼeTĩro, nʼoko mwami wʼeSĩdonĩ omo byala byʼabakwenda abakahĩka uku Zedekĩa omwami wʼeYũda eYerũsalema.

⁴ Ulayirebo busana nʼabakama babo uti, Omwami Mukulu wʼemilondo, Nyamuhanga wa Ĩsraelĩ, akabũga ati, Mwasyabwira abakama benyũ muti,

⁵ Nabirihangika ekihugo, nʼabandu, nʼesyonyama esiri omo kihugo, omo bũtokĩ bwage bunene nʼamaka wage, nage nasyahakyo ũkwʼoyũkanyĩtsemesaya.

⁶ Na lino nabiriha ebihugo byosĩ ebĩ omo byala bya Nebũkadeneza omwami wʼeBabelĩ, omugombe wage. Kandi nabirimuha esyonyama syʼomolĩ erimukolera.

⁷ Nʼebihanda byosĩ byasyamukolera, na mugala wuwe, na mwitsikulu wuwe, erĩhĩka aho mugulu wʼekihugo kiwe asyahĩkĩra. Nʼoko mugulu oyo ebihanda bingi nʼabami bakulu bakulu basyamuyira mo mukobe wabo.

⁸ Neryo kyasyabya, ekihanda nʼobwami obo abasyagana erikolera omwami wʼeBabelĩ, Nebũkadeneza, nʼerigana erĩhĩra ebĩkya byabo omo ngomo yʼOmwami wʼeBabelĩ, Omwami Mukulu ati, Nasyasuyira ekihanda ekyo omo mũyalĩ, nʼomo nzala, nʼendwala yʼakasũsũ, erĩhĩka aho nasyabugirabo omo byala biwe.

⁹ Nĩkwa ĩnywe simuhulikirire abamĩnyererĩ benyũ, kutse abalagũlĩ benyũ, kutse esyonzolĩ syenyũ, kutse oyũkabũga ebityabitya, kutse abakũmũ benyũ, abakababwira bati, Simusyekolera omwami wʼeBabelĩ.

¹⁰ Kusangwa bakaminyerera busana nenyũ amabehĩ, erĩbahũmĩrya hali oko kihugo kyenyũ, nage nasyabahiga, nenyũ mwasyahera.

¹¹ Nĩkwa ekihanda ekyo ekĩkandĩsyowa omwami wʼeBabelĩ nʼerimukolera, ekihanda ekyo nasyalekakyo erĩsĩgala omo kihugo kyabo, Omwami Mukulu atya, nabo basyalimakyo, nʼerĩĩkala mukyo.

¹² Neryo Yeremĩa mwabwira Zedekĩa omwami wʼeYũda ebĩnywa ngʼebĩ ati, Mowe ebĩnywa byʼOmwami wʼeBabelĩ, mumukolere nʼabandu buwe, mubye nʼengebe!

¹³ Busana nakĩ mukasonda erihola, uwe nʼabandu bawe, omo mũyalĩ, nʼomo nzala, nʼomo ndwala yʼakasũsũ, ngoko Mwami Mukulu abĩrĩbũga busana nʼekihanda ekyo ekĩtanzĩre erikolera omwami wʼeBabelĩ kwehĩ?

¹⁴ Kandi simuhulikirire ebĩnywa byʼabamĩnyererĩ abakababwira bati, Simusyekolera omwami wʼeBabelĩ; kusangwa bakaminyerera amabehĩ busana nenyũ.

¹⁵ Kusangwa Omwami Mukulu ati, Sinditatumabo, nĩkwa bakaminyerera amabehĩ oko lĩna lyage, inatoka eribahigira eyĩhya imwahera, ĩnywe, nʼabamĩnyererĩ abakaminyerera busana nenyũ.

¹⁶ Kandi monabwira abahererĩ nʼabandu aba bosĩ, nyiti, Omwami Mukulu akabũga ati, Simuhulikirire ebĩnywa byʼabamĩnyererĩ benyũ abakaminyerera busana nenyũ bati, Mũlebaye, ebindu byʼenyũmba yʼOmwami Mukulu byasyaswaletwa bĩkalũa eBabelĩ enyũma wʼomugulu muke; kusangwa bakaminyerera amabehĩ busana nenyũ.

¹⁷ Simuhulikirirebo. Mukolere omwami wʼeBabelĩ, mubane eribyaho! Busana nakĩ omũyĩ oyũ angabya mulala kwehĩ?

¹⁸ Nĩkwa bamabya ini bamĩnyererĩ, nʼekĩnywa kyʼOmwami Mukulu ikine haguma nabo, lino basabe Omwami Mukulu wʼemilondo, bati ebindu ebĩsĩgere omo nyũmba yʼOmwami Mukulu nʼomo nyũmba yʼOmwami wʼeYũda, nʼeYerũsalema, sibiye eBabelĩ.

¹⁹ Kusangwa Omwami Mukulu wʼemilondo, akabũga busana nʼesyondũyĩ, na busana nʼengetsi, na busana nʼebikyingyi, na busana nʼebĩsĩgalira byʼebindu ebĩsĩgere omo mũyĩ oyũ,

²⁰ ebyo Nebũkadeneza omwami wʼeBabelĩ ataheka omugulu aheka abanyegwa, ye Yekonĩa mugala wa Yehoyakĩmũ, omwami wʼeYũda, erĩlũa eYerũsalema nʼerĩhĩka eBabelĩ haguma nʼabakulu bosĩ bʼeYũda nʼeYerũsalema.

²¹ Ega, Omwami Mukulu wʼemilondo, Nyamuhanga wa Ĩsraelĩ, akabũga busana nʼebindu ebĩsĩgere omo nyũmba yʼOmwami Mukulu, nʼomo nyũmba yʼOmwami wʼeYũda nʼeYerũsalema ati,

²² byasyahekerwa eBabelĩ, byasyabyayo erĩhĩka ekiro nasyayabanabyo Omwami Mukulu atya. Oko mugulu oyo nasyaletabyo, nʼerĩsũbyabyo hano.