Yeremĩa 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritwala Yũda eBabelĩ busana nʼerĩtendĩowa lyabo

¹ Ekĩnywa ekyahĩka uku Yeremĩa busana nʼabandu bosĩ bʼeYũda, omo mwaka wʼakani wa Yehoyakĩmũ mugala wa Yosĩa, omwami wʼeYũda (oyo go mwaka wʼerĩmbere wa Nebũkadeneza omwami wʼeBabelĩ).

² Ekĩnywa ekyo Yeremĩa mũmĩnyererĩ abũga nʼabandu bosĩ bʼeYũda, nʼesyondũlanĩ syosĩ syʼeYerũsalema ati,

³ Erĩtsũka Omwaka wʼerĩkũmĩ nʼeyĩsatu wa Yosĩa mugala wa Amonĩ, omwami wʼeYũda, erĩhĩka mũnabwĩre, emyaka eyĩ makũmĩ abiri nʼeyĩsatu, ekĩnywa kyʼOmwami Mukulu mokyambĩkako, nage nabiribabwira, iningabuka omo tũtũtũ nʼerĩbũga, nĩkwa ĩnywe momutahulikirira.

⁴ Kandi Omwami Mukulu abiribatumako abagombe buwe bosĩ abamĩnyererĩ, eribuka omo tũtũtũ nʼeritumabo, nĩkwa ĩnywe momutahulikirira kutse eritega amatwĩ erĩowa,

⁵ bati, Mũbũnũkale lino obuli mundu erireka enzira yiwe nyibi, nʼerireka ebibi byʼemĩbĩrĩ yenyũ, mwĩkale omo kihugo ekyo Mwami Mukulu abiribaha nʼabotata wenyũ busana na kera na kera.

⁶ Simukwame esindi nyamuhanga erikolerasyo, nʼerĩramyasyo, kandi sĩmũnyĩhĩtanaye omo mĩbĩrĩ yʼebyala byenyũ, nage sindiendisyabakola nabi.

⁷ Omwami Mukulu ati, Nĩkwa momutambulikirira, muti imwatoka erĩnyĩhĩtanĩa omo mĩbĩrĩ yʼebyala byenyũ eriyiretera erĩkwa.

⁸ Busana nʼekyo Omwami Mukulu wʼemilondo ati, Kusangwa Sĩmwetowa ebĩnywa byage,

⁹ lebaya Omwami Mukulu ati, Nasyatuma nʼerihamba ebĩtũnga byosĩ byʼelutambi lwʼendata nʼeritumabo oko mugombe wage Nebũkadeneza omwami wʼeBabelĩ, kandi nasyaletabo erilwa nʼekihugo kino, nʼerilwa nʼesyondũlanĩ syosĩ syakyo, nʼerilwa nʼebihanda byosĩ ebĩ ebĩtĩmbĩre kukyo kandi nasyaheryabo kũndũ, nʼeriyirabo mo nye, nʼekyʼeriahirwa nʼemilala yʼebiro byosĩ.

¹⁰ Kandi nasyalũsya kubo omulenge wʼeritsanga, nʼomulenge wʼobutseme, nʼomulenge wʼĩba wʼomũherũkĩ, nʼomulenge wʼomũherũkĩ, nʼomulenge wʼesĩsonĩ, nʼekyakakala kyʼetala.

¹¹ Nʼekihugo kyosĩ kyasyabya kĩma, nʼenye, nʼebihanda ebĩ byasyakolera omwami wʼeBabelĩ emyaka makũmĩ alinda.

¹² Neryo omugulu emyaka makũmĩ alinda yasyabya yabihwa, Omwami Mukulu ati, Nasyasuyira omwami wʼeBabelĩ, nʼekihanda ekyo, busana nʼebibi byabo, nʼekihugo kyʼAbakaldea, kandi nasyayirakyo mo mulala wʼebiro byosĩ.

¹³ Kandi nasyaletera ekihugo ekyo ebĩnywa byage byosĩ ebyo nabũga busana nakyo, bye byosĩ ebĩsakĩre omo kitabu ekĩ, ebyo Yeremĩa abiriminyerera busana nʼebihanda byosĩ.

¹⁴ (Kusangwa ebihanda bingi nʼabami bakulu-bakulu basyayirabo mo bakobe, nage nasyalihabo ngʼemĩbĩrĩ yabo ko yiri, ngʼomũbĩrĩ wʼebyala byabo.)

¹⁵ Kusangwa litya Omwami Mukulu Nyamuhanga wa Ĩsraelĩ akambwira ati, Wĩmaye olũtehĩ olũ lwʼebĩnyũ byʼerihitana omo byala byage, ũpũlĩsayelo ebihanda byosĩ ebyo ngakutumako.

¹⁶ Nabo basyapũlya, nʼerihenenguka, nʼeribya ngʼabasĩre, busana nʼomũyalĩ ogo nasyatuma omo katĩkatĩ kabo.

¹⁷ Neryo monĩmya olũtehĩ olo omo byala byʼOmwami Mukulu, monapũlĩsyalo ebihanda byosĩ, ebyo Mwami Mukulu anyitumako:

¹⁸ eYerũsalema, nʼemĩyĩ yʼeYũda, nʼabami bayo, nʼabanya-mwami bayo, eriyirabo mo mulala, nʼenye, nʼeriahirwa, nʼekĩtsũmĩ, nibya ngoko biri mũnabwĩre;

¹⁹ Farao, omwami wʼeMĩsĩrĩ, nʼabagombe buwe, nʼabanya-mwami buwe, nʼabandu buwe bosĩ;

²⁰ nʼabandu bʼehandi bosĩ, nʼabami bosĩ bʼekihugo kyʼeŨzĩ, nʼabami bosĩ bʼekihugo kyʼAbafĩlĩstĩnĩ (Askelonĩ, nʼeGaza nʼeEkronĩ, nʼamasĩgalira wʼeAsdodĩ);

²¹ Edomũ, nʼeMoabũ, nʼabana ba Amonĩ;

²² nʼabami bosĩ bʼeTĩro, nʼabami bosĩ bʼeSĩdonĩ, nʼabami bʼebihugo ebiri eyisirya oko ngetsi;

²³ Dedanĩ, na Tema, na Bũzĩ, nʼabandu bosĩ abatwĩre esyonzwiri syabo mo ngũhĩ;

²⁴ nʼabami bosĩ bʼeArabĩa, nʼabami bosĩ bʼabandu bʼehandi abĩkere omo mbwarara;

²⁵ nʼabami bosĩ bʼeZĩmũrĩ, nʼabami bosĩ bʼeElamũ, nʼabami bosĩ bʼAbamedĩ;

²⁶ nʼabami bosĩ bʼelutambi lwʼendata, hakũhĩ nʼehali, ogundi haguma nʼogundi; nʼamami gosĩ wʼekihugo, awali oko kitaka. Nʼomwami wʼeSesakĩ asyapũlya enyũma kubo abosĩ.

²⁷ Neryo wasyabwirabo uti, Omwami Mukulu wʼemilondo, Nyamuhanga wa Ĩsraelĩ akabũga ati, Mũpũlaye, mũkũnde, musale, muwe, simusyehangana busana nʼomũyalĩ ogo nasyatuma omo katĩkatĩ kenyũ.

²⁸ Neryo kyasyabya, bamagana erĩĩmya olũtehĩ omo byala byawe erĩpũlyalo, neryo wasyabwirabo, uti, Omwami Mukulu wʼemilondo ati, Kwenene mwasyapũlyalo.

²⁹ Kusangwa lebaya, ngatsũka erikola erĩĩta oko mũyĩ owakahulawa omo lĩna lyage, nenyũ mwasyasĩgala ndeke butasuyirwa kwehĩ? Omwami Mukulu wʼemilondo ati, Simwendisyabya butsira erisuyirwa, kusangwa ngabirikira omũyalĩ erilwa nʼesyondũlanĩ syosĩ syʼekihugo.

³⁰ Neryo wasyaminyerera busana nabo ebĩnywa ebĩ byosĩ, wasyabwirabo uti, Omwami Mukulu asyahaya elubula, nʼerĩbũya omulenge wuwe oko hʼerĩĩkala huwe habũyĩrĩre. Asyahaya kutsibu oko bandu buwe. Asyahuma ngʼabakakama ebĩnyũ, erilwa nʼesyondũlanĩ syosĩ syʼekihugo.

³¹ Obogo bũkandĩsyahĩka oko ndũlĩ yʼekihugo, kusangwa Omwami Mukulu akakuba obuhaka nʼebihanda. Asyatswera abandu bosĩ. Nĩkwa ababi asyĩtabo, Omwami Mukulu atya.

³² Omwami Mukulu wʼemilondo ati, Lebaya, erĩkwa lyasyahulukira obuli kihanda, nʼerigunga lĩnene lyasyahanganĩbwa oko ndũlĩ syʼekihugo.

³³ Oko kiro ekyo ebĩnda byʼabandu abo Mwami Mukulu ĩta byasyabya oko ndũlĩ nguma yʼekihugo erĩhĩka oko yindi ndũlĩ yʼekihugo. Sibyendisyalirwa kutse erikuma-kumwa, kutse eritabwa. Byasyabya ngʼebĩse oko kitaka.

³⁴ Ĩnywe balĩsya, mulire, mulake. Mũyĩgala-galaye omwʼĩbũ, ĩnywe bakama bʼekĩhyo, kusangwa ebiro byʼerĩkwa lyenyũ nʼeripanza-panzwa lyenyũ byabĩrĩhĩkana kũndũ, nenyũ mwasyawa ngʼenyungu nyibuya.

³⁵ Nʼabalĩsya sibawite enzira yʼerisagiramo, kutse abakama bʼekĩhyo sibawite bubaliro.

³⁶ Omulenge wʼekiriro kyʼabalĩsya, nʼerĩsũsũmana lyʼabakama bʼekĩhyo! Kusangwa Omwami Mukulu akaheraya amalĩsĩryo wabo.

³⁷ Nʼebĩyĩte byʼobuholo byabĩrĩhũnerĩbwa busana nʼerihitana lĩkalĩre lyʼOmwami Mukulu.

³⁸ Omwami Mukulu abĩrĩsĩganĩa ahʼerĩbĩsama huwe ngʼendale, kusangwa ekihugo kyabo kyabiribya nye busana nʼobukali bʼomũyalĩ obwʼerĩnũbya, kandi busana nʼerihitana liwe erĩkalĩre.