Yeremĩa 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Abalĩsya babi

¹ Omwami Mukulu ati, Obũlĩge oko balĩsya abakaheraya nʼeripanzapanza esyombũlĩ syʼolũlĩsĩryo lwage!

² Busana nʼekyo Omwami Mukulu, Nyamuhanga wa Ĩsraelĩ, akabũga busana nʼabalĩsya abakalĩsaya abandu bage ati, Mwabiripanza-panza ekihangulo kyage, nʼerihigakyo, ĩsĩmwetalĩsyakyo. Lebaya, nasyabasuyira busana nʼebibi byʼemĩbĩrĩ yenyũ, Omwami Mukulu atya.

³ Kandi ĩngye nasyahĩndanĩa amasĩgalira wʼekihangulo kyage omo bihugo byosĩ eyo nahigirabo, nʼeriswaletabo omo lũlĩsĩryo lwabo. Nabo basyabuta nʼerikanya.

⁴ Omwami Mukulu ati, Nasyahĩra kusyo kwʼabalĩsya, abakandĩsyalĩsyasyo. Nasyo sisiendisyubaha kandi, kutse erĩkwa engitsi, isisyendisyabulako nʼenguma.

Omutahi owatunganene

⁵ Omwami Mukulu ati, Lebaya, ebiro bikasa, nasyahanganĩrya Dawĩdĩ Omutahi owatunganene, naye asyatabala ngʼOmwami nʼerikola nʼamenge, nʼeriyira erĩbanza litunganene omo kihugo.

⁶ Omo biro biwe Yũda asyalamĩbwa, na Ĩsraelĩ asyĩkala buholo. Nʼerĩ nĩ rĩna liwe; lyo lĩna asyahulwamo, Omwami Mukulu yo litunganene lyetu.

⁷ Neryo Omwami Mukulu ati, Lebaya, ebiro bikasa, sĩbendĩsyaswabũga bati, Ngoko Mwami Mukulu aliho oyo walũsaya abana ba Ĩsraelĩ omo kihugo kyʼeMĩsĩrĩ;

⁸ nĩkwa, Ngoko Mwami Mukulu aliho, oyo wahetũkaya nʼerĩsũbũlya abana bʼekĩtũnga kya Ĩsraelĩ erĩlũa omo bihugo byʼelutambi lwʼendata, nʼerĩlũa omo bihugo byosĩ eyo nahigirabo. Neryo basyĩkala omo kihugo kyabo.

Abahererĩ nʼabamĩnyererĩ bʼamabehĩ

⁹ Busana nʼabamĩnyererĩ, omutima wage abirigerukala omo nda, amakũha wage gosĩ akatitimana. Nabiribya ngʼomũkũndĩrya, ngʼomundu oyũlyakĩndawa nʼebĩnyũ, busana nʼOmwami Mukulu, na busana nʼebĩnywa biwe bĩbũyĩrĩre.

¹⁰ Kusangwa ekihugo kyabĩrĩũsũla mwʼabasĩngĩrĩ, kusangwa busana nʼeritakira ekihugo kĩkasũsũmana. Amalĩsĩryo wʼembwarara abiriuma. Nʼemibere yabo ni mibi, nʼamaka wabo siatunganene.

¹¹ Kusangwa omũmĩnyererĩ nʼomũhererĩ abosĩ babiri batsandĩre. Ega, nabiribana ebibi byabo omo nyũmba yage, Omwami Mukulu atya.

¹² Busana nʼekyo, enzira yabo yasyabya ahatendere busana nabo. Basyabingwa omo mwĩrĩmya nʼeriwa mugo. Kusangwa Omwami Mukulu ati, Nasyaleta kubo erĩkwa oyo go mwaka wʼerisuyirwa lyabo.

¹³ Kandi nabirilangira omo bamĩnyererĩ bʼeSamarĩa. Mobaminyerera busana na Baalĩ, nʼerĩtalya abandu bage Ĩsraelĩ.

¹⁴ Nabirilangira ekindu kibi kutsibu nibya omo bamĩnyererĩ bʼeYerũsalema. Erĩsĩngĩra, kandi bamalendera omo mabehĩ. Kandi bakasĩkaya ebyala byʼabakola-nabi, kikaleka ihatabya mundu oyũkabũnũkala nʼerireka ebibi biwe. Abosĩ babiribya ũkwʼĩngye ngʼeSodomo, nʼesyondũlanĩ syako ngʼeGomora.

¹⁵ Busana nʼekyo Omwami Mukulu wʼemilondo akabũga busana nʼabamĩnyererĩ ati, Lebaya, nasyalĩsyabo omuti wʼesyondugunda, nasyanywĩsyabo amagetsi wʼobuti, kusangwa obũtĩsĩrĩre obukahuluka oko bamĩnyererĩ bʼeYerũsalema bwabirilaba omo kihugo kyosĩ.

¹⁶ Omwami Mukulu wʼemilondo ati, Simuhulikirire ebĩnywa byʼabamĩnyererĩ abakaminyerera busana nenyũ. Bakabasondola omo bitya-bitya. Bakabũga esyonzolĩ syʼomutima wabo, esĩtalũa omo buno bʼOmwami Mukulu.

¹⁷ Ebiro byosĩ bakabwira abakanyipona bati, Omwami Mukulu abĩrĩbũga ati, Mwasyabya nʼobuholo. Kandi bakabwira obuli mundu oyukagenda omo butsibu bʼomutima wuwe bati, Erĩkwa siryendĩsyabahĩkako.

¹⁸ Nĩkwa nindi abirihangana omo mbĩta yʼOmwami Mukulu, ati angaminya nʼerĩowa ekĩnywa kiwe kwehĩ? Nindi abirikenga ekĩnywa kiwe nʼerĩowakyo kwehĩ?

¹⁹ Lebaya, erigunga lyʼOmwami Mukulu, eryʼerihitana liwe, lyabirihuluka, ega, erigunga lyʼakanyabungu. Lyasyandagalira oko mutwe wʼababi.

²⁰ Erihitana lyʼOmwami Mukulu siryendĩsyabũnũkala ate abĩberererya nʼerikola erĩyĩsũnza lyʼomutima wuwe. Oko biro byʼenyũma mwasyaminyago ndeke.

²¹ Mondatuma abamĩnyererĩ aba, nĩkwa mobanguha. Mondabũga nabo, nĩkwa mobaminyerera.

²² Nĩkwa kumbe balihangana omo mbĩta yage kumbe bangowĩsĩrye abandu bage ebĩnywa byage, nʼerĩbũnũkalyabo erĩlũa oko nzira yabo nyibi, nʼerĩlũa kwʼebibi byʼemĩbĩrĩ yabo.

²³ Omwami Mukulu ati, Ĩngye indi Nyamuhanga wʼahakũhĩ, isindi Nyamuhanga wʼehali kwehĩ?

²⁴ Omwami Mukulu ati, Hali oyo wangayĩbĩsa ahabĩsamĩre isinangamulolako kwehĩ? Omwami Mukulu ati, Sĩ ngye ngũsũlaya elubula nʼekihugo kwehĩ?

²⁵ Nabĩrĩowa ebyo abamĩnyererĩ babĩrĩbũga, abakaminyerera amabehĩ oko lĩna lyage bati, Nalotĩre, nalotĩre!

²⁶ Kyasyakolyahi? Muli kindu omo mitima yʼabamĩnyererĩ aba, abakaminyerera amabehĩ, nʼebĩnywa byʼeriteba lyʼomutima wabo.

²⁷ Bakasonda erireka abandu bage eribirirwa erĩna lyage, busana nʼerilota lyabo bakabwirana, ngoko abotata wabo bibirirawa erĩna lyage busana na Baalĩ kwehĩ?

²⁸ Omũmĩnyererĩ oyuwite erilota abũge erilota liwe, nĩkwa oyuwite ekĩnywa kyage, abũge ekĩnywa kyage omo kwenene. Omwami Mukulu ati, Embuba ĩlabĩre engano yʼũkũkĩ kwehĩ?

²⁹ Omwami Mukulu ati, Ekĩnywa kyage sikiri ngʼomuliro kwehĩ? Kandi ngʼenyondo eyikatulanga amabwe mo bihande bihande kwehĩ?

³⁰ Busana nʼekyo, Omwami Mukulu ati, Lebaya, ngalwa nʼabamĩnyererĩ abakĩba ebĩnywa byage obuli mundu uku mũlĩkyabo.

³¹ Omwami Mukulu ati, Lebaya, indi nzĩgũ yʼabamĩnyererĩ abakakola omo ndimi syabo, bakabũga bati, Omukama akabũga.

³² Omwami Mukulu ati, Lebaya, ngalwa nʼabakaminyerera erilota lyʼamabehĩ, ĩbakatũlalyo, nʼerĩhabĩsya abandu bage omo mabehĩ wabo nʼomwʼiyipipa lyabo litya-litya. Nĩkwa mondatumabo, kutse mondahamulabo. Kutse, siberetera abandu aba bʼendũndĩ nʼahake, Omwami Mukulu atya.

³³ Nʼomugulu abandu aba, kutse omũmĩnyererĩ, kutse omũhererĩ basyakũbũlya bati, Omwatsi wʼOmwami Mukulu ni muhi kwehĩ? Neryo wasyabwirabo uti, Omwatsi wʼOmwami Mukulu ni mwatsi, kandi ati, Nasyabaleka.

³⁴ Kandi busana nʼomũmĩnyererĩ, nʼomũhererĩ, nʼabandu, abasyabũga bati. Omwatsi wʼOmwami Mukulu, ĩngye nasyasuyira omundu oyo nʼekĩtũnga kiwe.

³⁵ Mwasyabwira obuli mundu mũlĩkyabo, nʼobuli mundu mugala wabo muti, Omwami Mukulu asũbĩryekĩ kwehĩ? kutse, Omwami Mukulu abĩrĩbũgakĩ kwehĩ?

³⁶ Sibangaswabũga ebĩnywa bati, Omwatsi wʼOmwami Mukulu ni muheke, kusangwa omundu amabũgabyo nasyayira omwatsi wage mo muheke wuwe, kusangwa abandu babiribindula nabi ebĩnywa bya Nyamuhanga wabo oyuliho, Omwami Mukulu wʼemilondo, Nyamuhanga wetu.

³⁷ Nawe wasyabũga nʼomũmĩnyererĩ oyo uti, Omwami Mukulu amakũsũbĩrya atĩkĩ kwehĩ? Kandi Omwami Mukulu abũgĩrekĩ kwehĩ?

³⁸ Nĩkwa mwamabũga muti, Omwatsi wʼOmwami Mukulu ni muheke, ubwirebo uti, Kusangwa mũkabũga ebĩnywa ebĩ, omugulu namabibakaga erĩbũgabyo.

³⁹ Neryo lebaya, nasyabibirirwa kutsibu, nʼeribagusa hali oko meso wage, haguma nʼomũyĩ ogo nabaha nʼabotata wenyũ.

⁴⁰ Kandi nasyabaletako eriponwa lya kera na kera, nʼerihemuka eritawite ndũlĩ, eritendisyibiriranwa.