Yeremĩa 21 - AMASAKO ABOYTRTRE WA NYAMUHANGA AWAKAHULAWA MO BIBLIAErihera lya Zedekĩa nʼeYerũsalema 1 Ekĩnywa ekyahĩkĩra Yeremĩa kĩkatũlũa oko Mwami Mukulu, omugulu omwami Zedekĩa amutumako Pasũrĩ mugala wa Malkĩa, na Zefania omũhererĩ, mugala wa Masea ati, 2 Kĩsĩ-kĩsĩ nyiti, Ũbũlaye Omwami Mukulu busana netu, kusangwa Nebũkadeneza omwami wʼeBabelĩ akalwa netu. Kwamũhwa Omwami Mukulu asyatukolera ngʼemĩbĩrĩ yiwe yosĩ yʼeriswekera, enzĩgũ ĩtũlũeko. 3 Neryo Yeremĩa mwabwirabo ati, Mwasyabwira Zedekĩa muti, 4 Omwami Mukulu Nyamuhanga wa Ĩsraelĩ ati, Lebaya, nasyasũbũlya abasĩrĩkanĩ bawe, abakalwa nʼomwami wʼeBabelĩ nʼAbanya Kaldea abakakubambira eyĩhya oko syombĩmbo syʼomũyĩ. Nage nasyahĩndanĩa ebindu byʼamalwa byabo omo katĩkatĩ kʼomũyĩ oyũ. 5 Nage nasyalwa nenyũ omo maka wage gosĩ, omwʼihitana lyage, nʼomwʼeriagalirwa lĩnene lyage, nʼerikarama lyage. 6 Nasyĩta esyondũlanĩ syʼomũyĩ oyũ, abandu nʼesyonyama. Basyahola omo ndwala yʼakasũsũ kanene. 7 Nʼenyũma wʼaho, Omwami Mukulu ati, Nasyahĩra Zedekĩa omwami wʼeYũda, haguma nʼabagombe buwe, nʼabandu ababala oko ndwala yʼakasũsũ omo mũyĩ ono, nʼomo mũyalĩ, nʼomo nzala, nasyahĩrabo omo byala bya Nebũkadeneza omwami wʼeBabelĩ, nʼomo byala byʼesyonzĩgũ syabo, nʼomo byala byʼabakasonda engebe yabo. Nebũkadeneza asyĩtabo omo boya bʼomũyalĩ. Sĩendĩsyabalyabo, kutse siendisyaganyirabo kutse erisasirabo. 8 Nawe wasyabwira abandu aba uti, Omwami Mukulu ati, Lebaya, ngahĩra embere syenyũ enzira yʼengebe nʼenzira yʼoluholo. 9 Oyũkasyĩkala omo mũyĩ oyũ asyahola omo mũyalĩ, nʼomo nzala, nʼomo ndwala yʼakasũsũ, nĩkwa oyukahuluka, nʼerĩyĩhĩra omo byala byʼAbanya Kaldea, abakabagotera asyabyaho, nʼengebe yiwe yasyabya bunyegwa busana naye. 10 Kusangwa nabiriyisinga erĩtĩndabalya omũyĩ oyũ nĩkwa erĩheryago, Omwami Mukulu atya. Nago asyahabwa omo byala byʼOmwami wʼeBabelĩ naye asyahĩsyago omo muliro. 11 Neryo Ubwire ekĩtũnga kyʼOmwami wʼeYũda uti, Mowe ekĩnywa kyʼOmwami Mukulu. 12 Omwami Mukulu ati, Uwe kĩtũnga kya Dawĩdĩ, Ukole erĩbanza litunganene obuli kiro, mũlamaye omundu oyo bahũngako oko byala byʼomũnũbya, erihitana lyage likasyahuluka ngʼomuliro erĩhĩsya, isihali oyo wangalĩmyago, busana nʼebibi byʼemĩbĩrĩ yabo. 13 Omwami Mukulu ati, Lebaya, ngalwa nawe, uwe ndũlanĩ yʼomusya, nawe, uwe ndũlanĩ yʼebwerere bwʼamabwe, ĩnywe balume mũkabũga muti, Nindi wasyandagala erilwa netu kwehĩ? Kutse nindi wasyingira aho twĩkere kwehĩ? 14 Omwami Mukulu ati, Nasyabasuyira busana nʼemĩbĩrĩ yenyũ. Nasyakya omuliro omo kikali kyenyũ, nago asyahĩsya ebyosĩ ebiri hakũhĩ. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo