Yeremĩa 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswerwa lyʼe Yũda

¹ Neryo Pasũrĩ, mugala wa Ĩmerĩ omũhererĩ, oyo wabya mwĩmanĩrĩ mukulu omo nyũmba yʼOmwami Mukulu, mowa Yeremĩa akaminyerera emyatsi eyĩ.

² Neryo Pasũrĩ mwahamula erĩswĩrya omũmĩnyererĩ Yeremĩa, kandi mwamũhĩra omo bisayi byʼomũlĩkĩ ebiri oko lũkyo lwʼendata lwa Benyamĩna olwabya omo nyũmba yʼOmwami Mukulu.

³ Neryo bwabere bwabya ngyakya-ngyakya, Pasũrĩ mwalũsya Yeremĩa omo bisayi ebyo. Neryo Yeremĩa mwamubwira ati, Omwami Mukulu mwatahula erĩna lyawe mo Pasũrĩ, nĩkwa Magor-mĩsabĩbũ.

⁴ Kusangwa Omwami Mukulu ati, Lebaya, ngandikuyira mo kyʼerĩkũbahya, nʼoko bĩra bawe bosĩ. Nʼomugulu ukalangira, basyawa omo mũyalĩ wʼesyonzĩgũ syabo. Litya nasyahĩra eYũda yosĩ omo byala byʼOmwami wʼeBabelĩ, naye asyatwalabo mo banyegwa eBabelĩ, nʼerĩĩtabo omo mũyalĩ.

⁵ Kandi nasyaha ebindu byosĩ byʼomũyĩ oyũ, nʼobuteke bwago, nʼebindu byosĩ byago byʼobũgũlĩ bunene, ega, nʼobũsokĩ bosĩ bwʼabami bʼeYũda nasyahabyo omo byala byʼesyonzĩgũ syabo, basyahũngabo, basyatwalabo, nʼerihekerabo eBabelĩ.

⁶ Nawe Pasũrĩ, nʼabosĩ abĩkere omo nyũmba yawe mwasyaya omo bukobe. Kandi wasyahĩka eBabelĩ, nʼeyo yo wasyaholera, nʼeyo yo wasyatabwa, uwe nʼabĩra bawe bosĩ, abo waminyererako nʼamabehĩ.

Ekiriro kya Yeremĩa

⁷ Uwe Mwami Mukulu, wabirinyiteba, nage nabiriteba. Wabĩrĩnyĩkĩnda, kandi wabĩrĩsĩngana. Nabiribya ekindu kyʼerĩsekya omo musibo gosĩ, obuli mundu akanyiseka.

⁸ Kusangwa omugulu gosĩ ngabũga, ngalaka. Ngalaka nyiti Omwaga nʼerihera! Kusangwa ekĩnywa kyʼOmwami Mukulu kyabirinyiyira mo kĩtsũmĩ, nʼerisekwa omo musibo gosĩ.

⁹ Nĩkwa namabũga nyiti sindiendisyamwibuka, kutse erĩswabũga kandi omo lĩna liwe, neryo hali omo mutima wage ngʼomuliro owakagulumira owabohere omo makũha wage, nage namaluha erĩyĩyĩnĩa, sinditoka eriyibombeka.

¹⁰ Kusangwa nabĩrĩowa ebihwehwe byʼabandu bangi bati, Obuba oko mbande syosĩ! Abĩra bage abo ngayiketera bakalinda eriwa lyage bati, Mumuhayire, ega, netu tumuhayire! Abĩra bage bosĩ abo ngayiketera, bakalinda eriwa lyage, bati kwamũhwa asyatebwa itwatoka erĩmũkĩnda, ĩtwamũkĩsĩryako.

¹¹ Nĩkwa Omwami Mukulu ali haguma nage ngʼembangĩ yʼerĩũbahya. Busana nʼekyo, abakanyendereraya basyatwĩkala, sibendĩsyasĩngana. Basyahemulwa kutsibu, kusangwa sibetatoka, basyahemulwa nʼesĩsonĩ sya kera na kera esitendisyibiriranwa nʼahake.

¹² Nĩkwa uwe Mwami Mukulu wʼemilondo, uwe ukalenga abatunganene, uwe ukalangira obũlengekanĩa nʼomutima, uleke nyilangire erĩkĩsya lyawe busana nabo. Kusangwa nabĩrĩkũbĩsũlĩra omwatsi wage.

¹³ Mwimbire Omwami Mukulu, mupipe Omwami Mukulu! Kusangwa abĩrĩlamya ekĩrĩmũ kyʼomundu wʼobwaga omo byala byʼabakola-nabi.

¹⁴ Ekiro nabutawa kitakirawe. Nʼekiro koyo anyibuta sikitsumulawe!

¹⁵ Atakirawe omundu oyo waletera tata wage engulu ati, Wabiributa omwana wʼobulume! Nʼerĩmũtsemesya kutsibu.

¹⁶ Nĩkwa omundu oyo abye ngʼemĩyĩ eyo Mwami Mukulu aheraya butsira erisasira. Kandi owe emilake omo ngyakyangyakya, nʼeehee omwʼitungi,

¹⁷ kusangwa mwatanyĩta omugulu nalũa omo nda, neryo koyo angabere isinda yage, nʼenda yiwe yangabere nʼobukule ebiro byosĩ.

¹⁸ Busana nakĩ nalũa omo nda erilola okwʼinuba nʼobũlĩge, nʼebiro byage ibyahwa omo sĩsonĩ kwehĩ?