Yeremĩa 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũsyo wʼekibindi ekĩtũlĩkĩre

¹ Omwami Mukulu ati, Ugende, Ugule enyungu yʼeribumba lyʼomũbũmbĩ, wĩmaye oko bakulu bʼabandu, nʼoko bakulu bʼabahererĩ.

² Neryo ugende oko musya wʼomugala wa Hĩnomũ, owali hakũhĩ nʼobwingiriro bwʼolũkyo lwʼekibumbiro, Ũkanganaye eyo ebĩnywa ebyo nasyakubwira,

³ uti, Ĩnywe bami bʼeYũda muhulikirire ekĩnywa kyʼOmwami Mukulu, nʼĩnywe ndũlanĩ syʼeYerũsalema. Omwami Mukulu wʼemilondo, Nyamuhanga wa Ĩsraelĩ ati, Lebaya, nasyaleta hano erĩkwa, obuli mundu wasyowakyo, amatwĩ wuwe asyatunayira.

⁴ Kusangwa babĩrĩnyĩsĩganĩa, kandi babĩrĩtsandya omwanya ono, babĩrĩhĩsĩrya hʼobukwa oko Sindi nyamuhanga, esyo batabya basĩ, ibo nʼabotata wabo abami bʼeYũda, kandi babĩrĩũsũlya hano hʼomusasi ewʼabandu abate ko musango.

⁵ Kandi babĩrĩhĩmbĩra Baalĩ yʼahendata, erĩhĩsya abagala babo omo muliro babye mahere wʼerĩokererya busana na Baalĩ, ebyo ndahamula kutse eriahulago, kutse mokĩtahĩka oko mutima wage.

⁶ Neryo Omwami Mukulu ati, Lebaya, ebiro bikasa, hano sihendisyaswahulwa mo Tofetĩ, kutse Omusya wʼomugala wa Hĩnomũ, nĩkwa Omusya Wʼengwĩro.

⁷ Kandi nasyayira embĩta yʼeYũda nʼeYerũsalema mo buyira hano. Kandi nasyaleka ibawa omo mũyalĩ embere wʼesyonzĩgũ syabo, nʼomo byala byʼabo abakasonda engebe yabo. Kandi nasyaha ebĩnda byabo eribya kalyo kʼesyonyonyũ syʼomo kyanya, na busana nʼesyonyama syʼomolĩ.

⁸ Kandi nasyayira omũyĩ oyũ mo kĩma, nʼeriahirwa. Obuli mundu wasyalaba hakũhĩ nabo asyasweka nʼeriahirwa busana nʼebĩhũnzo byosĩ byago.

⁹ Nage nasyalĩsyabo esĩswĩ syʼabagala nʼomũnyokũ wʼabali, nabo basyalya obuli mundu omũnyokũ wʼomũlĩkyabo, omwʼigoterwa nʼomo bũlĩge obo esyonzĩgũ syabo nʼabakasondasondaya engebe yabo basyendereryabo.

¹⁰ Neryo wasyatulira enyungu eyo omo meso wʼabalume abakagenda haguma nawe.

¹¹ Kandi wasyabwirabo uti, Omwami Mukulu wʼemilondo akabũga ati, Ko nasyatulanga nyitya abandu aba, nʼomũyĩ oyũ, ngʼomundu kwʼakatula enyungu yʼomũbũmbĩ, eyitetoka eriswalandwa kandi. Nabo basyata abandu eTofetĩ, kusangwa ehandi hʼerita sihali.

¹² Omwami Mukulu ati, Ko nasyakola hano ho nyitya, nʼoko ndũlanĩ syako, nʼeriyira omũyĩ oyũ ngʼeTofetĩ.

¹³ Nʼamanyũmba wʼeYerũsalema, nʼamanyũmba wʼabami bʼeYũda asyatsanda ngʼeTofetĩ busana nʼamanyũmba gosĩ ahabĩrĩhĩsĩrĩbwa kʼobukwa oko nyitwe syago oko milondo yosĩ yʼomo kyanya, nʼerĩũtũlĩra amahere wʼerĩpũlya oko Sindi nyamuhanga.

¹⁴ Neryo Yeremĩa mwalũa eTofetĩ eyo Mwami Mukulu amutuma eriminyerera. Neryo mwahangana omo kibuga kyʼenyũmba yʼOmwami Mukulu, mwabwira abandu bosĩ ati,

¹⁵ Omwami Mukulu wʼemilondo, Nyamuhanga wa Ĩsraelĩ ati, Lebaya, nasyaletera omũyi oyũ nʼoko hĩyĩ hyosĩ hyago erĩkwa lyosi eryo nabiriahula busana nago, kusangwa babĩrĩkalya ebĩkya byabo sĩbowe ebĩnywa byage.