Yeremĩa 18 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekĩsosekanĩo kyʼomũbũmbĩ

¹ Ekĩnywa ekyahĩka uku Yeremĩa kĩkalũa oko Mwami Mukulu kiti,

² Hangana, wandagalire oko nyũmba yʼomũbũmbĩ, nʼeyo nasyakowĩsya ebĩnywa byage.

³ Neryo monandagalira oko nyũmba yʼomũbũmbĩ, neryo lebaya, abyayo akakola omũbĩrĩ oko bĩrĩnge.

⁴ Nĩkwa enyungu eyo abumba omwʼibumba yatsanda omo byala byʼomũbũmbĩ, naye mwaswabumbayo mo yindi nyungu, ngoko kyatsemesaya omũbũmbĩ eribumbayo.

⁵ Neryo ekĩnywa kyʼOmwami Mukulu mokyambĩkako kiti,

⁶ Uwe nyũmba ya Ĩsraelĩ, Omwami Mukulu ati, Sinangakukola ngʼomũbũmbĩ kwʼakakola kwehĩ? Lebaya, ngʼeribumba liri omo byala byʼomũbũmbĩ, uwe nyũmba ya Ĩsraelĩ, ko muli mutya omo byala byage.

⁷ Oko mugulu oyo nasyahula ekihanda, kutse busana nʼobwami, erikulabo, nʼerisambulabo, kutse erĩheryabo.

⁸ Ekihanda ekyo nabiriahula kyamabinduka oko bibi byakyo nasyaleka omwaga ogo naganĩraya erikolerabo.

⁹ Kutse oko gundi mugulu nanganahula ekihanda kutse busana nʼobwami erĩhĩmba kutse erihandabo.

¹⁰ Bamakola ekibi omo meso wage, isibekenga omulenge wage, neryo nasyaleka ebibuya ebyo nalaga eritsumulabo.

¹¹ Neryo lino ũbũge nʼabandu bʼeYũda nʼoko syondũlanĩ syʼeYerũsalema uti, Omwami Mukulu ati, Ngakokotaya erĩkwa busana nawe, ngayĩsũnza omwatsi busana nawe. Mũbũnũkale, obuli mundu aleke enzira yiwe nyibi, mũkokotaye esyonzira syenyũ nʼemĩbĩrĩ yenyũ yo ndeke.

¹² Nĩkwa basyabũga bati, Ni buyira! Kusangwa tukandisyakwama erĩyĩsũnza lyetu, kandi twasyakola obuli mundu ngʼobutsibu bʼomutima wuwe mubi.

¹³ Neryo Omwami Mukulu ati, Mũbũlaye omo katĩkatĩ kʼebihanda, nindi abĩrĩowa emyatsi ngʼeyĩ kwehĩ? Abandu ba Ĩsraelĩ babirikola ekindu ekĩkalĩre kutsibu.

¹⁴ Enzururu yʼeLebanonĩ ikanahwa oko lĩbwe ryʼomolĩ kwehĩ? Kutse amagetsi mũhũ awakasenda akalũa hali anganuma kwehĩ?

¹⁵ Kusangwa abandu bage babirinyibirirwa, babĩrĩokerya obukwa oko nyamuhanga sya busa. Babĩrĩtwĩkala omo nzira syabo, omo nzira sya kera, ibakakwama esyonzira syʼemikito, butsira omo nzira yʼembalu,

¹⁶ eriyira ekihugo kyabo mo kĩma, nʼeryahirwa emigulu yosĩ. Obuli mundu oyukalabaho asyasweka nʼerĩtsĩngya omutwe wuwe.

¹⁷ Nasyapanzirabo embere wʼesyonzĩgũ ngʼerihunga lyʼendata. Nasyalolya kubo kʼomugongo, butsira obũsũ, oko kiro kyʼerihera lyabo.

Embĩta yʼerĩĩta Yeremĩa

¹⁸ Neryo mobabũga bati, Mwase tuye embĩta yʼamenge erĩĩta Yeremĩa. Kusangwa omugambo siendisyatala oko mũhererĩ, kutse erihana oko bʼamenge, kutse ekĩnywa oko mũmĩnyererĩ! Mwase tũmũswĩraye omo lulimi lwetu, sĩtũhĩre omutima oko bĩnywa biwe nʼekiguma.

¹⁹ Uwe Mwami Mukulu, ũnyowe, uhulikirire okwʼebyo esyonzĩgũ syage sĩkabũga.

²⁰ Kwʼebibi byasyalihwa busana nʼebibuya kwehĩ? Kusangwa babiritakulira ekĩrĩmũ kyage kyʼobuhya. Wibuke ngoko nahangana embere syawe nʼerĩbũga ebibuya busana nabo, erĩlũsya erihitana lyawe lyo kubo.

²¹ Neryo uleke abana babo bakwe enzala, uhebo oko maka wʼomũyalĩ. Nʼabakalĩ babo babye butsira bana, babye bakwakalĩ. Uleke abalume babo bĩtawe omo luholo, nʼabalwana babo bĩtawe omo mũyalĩ omo malwa.

²² Ekiriro kyogũbawe omo manyũmba wabo, omugulu ukaleta omulondo wʼabahũngĩ go kubo lũba. Kusangwa babirinyitakulira obuhya, erinyihamba, kandi babĩrĩbĩsa ebitego busana nʼebisando byage.

²³ Nĩkwa uwe Mwami Mukulu, ũnasĩ erĩyĩsũnza lyabo lyosĩ busana nʼerĩnyĩta. Subuyire ebibi byabo kutse susangule amalolo wabo oko meso wawe. Nĩkwa uleke bakĩndawe embere syawe. Ukolebo omwatsi oko mugulu wʼerihitana lyawe!