Yeremĩa 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswera lya Nyamuhanga

¹ Ekĩnywa kyʼOmwami Mukulu mokyambĩkako kiti,

² Sũsyehĩkaya omũkalĩ kutse eributira abagala kutse abali, bo hano.

³ Kusangwa Omwami Mukulu akabũga busana nʼabagala nʼabali abakabutirawa hano, na busana nʼabonyĩnya wabo ababutabo, na busana nʼabotata wabo ababutabo omo kihugo kino ati,

⁴ Basyahola nʼesyondwala syʼoluholo lubi. Sibendisyalirwa, kutse sibendisyatabwa. Basyabya ngʼebise oko kitaka, kandi basyakwa omo mũyalĩ nʼomo nzala, nʼebĩnda byabo byasyabya kalyo busana nʼesyonyonyũ syʼomo kyanya, na busana nʼesyonyama syʼomolĩ.

⁵ Kusangwa Omwami Mukulu akabũga ati, Siwingire omo nyũmba yʼekiriro kutse sũyasũsũmane, kutse eririra busana nabo, kusangwa nabĩrĩlũsya Obuholo bwage oko bandu aba, Omwami Mukulu akabũga nʼobubuya bʼolwanzo, nʼeriganyira atya.

⁶ Abakulu nʼabake-bake basyahola omo kihugo kino. Sibendisyatabwa, kutse abandu sibendisyalira busana nabo, kutse eriyibandanga, kutse erĩsĩsa omutwe wuwe busana nabo.

⁷ Kutse abandu sibendisyabega obundu busana nʼeriririrabo, erĩkĩranĩa omundu busana nʼabaholĩ, kutse abandu sibendisyahabo olũtehĩ lwʼerĩkĩranĩa erĩpũlyalo busana na tata wabo na nyĩnya wabo.

⁸ Kandi siwingire omo nyũmba yʼebyũsĩ erĩĩkala nabo, erirya nʼerĩpũlya.

⁹ Kusangwa Omwami Mukulu wʼemilondo, Nyamuhanga wa Ĩsraelĩ ati, Lebaya, nasyalũsya hano, embere syʼameso wenyũ, nʼomo biro byenyũ, omulenge wʼeritsanga, nʼomulenge wʼobutseme, omulenge wʼĩba wʼomũherũkĩ, nʼomulenge wʼomũherũkĩ.

¹⁰ Neryo kyasyabya omugulu wasyakangya abandu aba ebĩnywa ebĩ byosĩ, nabo basyakubwira bati, Busana nakĩ Omwami Mukulu abirihamula erĩkwa lingaha busana netu kwehĩ? Kutse ebibi byetu ni byahi kwehĩ? Nʼamalolo wetu ni wahi ago twabĩrĩhalya oko Mwami Mukulu Nyamuhanga wetu kwehĩ?

¹¹ Neryo wasyabũga nabo uti, Omwami Mukulu ati, Ni busana nʼabotata wenyũ erĩnyĩsĩganĩa, nʼerikwama esindi nyamuhanga, nʼerikolerasyo, nʼerĩũnamirasyo, ĩbanyĩsĩganĩa, kandi sibetakwama emigambo yage.

¹² Nenyũ nibya mwabirikola nabi, kwilaba abotata wenyũ. Kusangwa lebaya, mukalendera obuli mundu omo butsibu bʼomutima wuwe mubi, imutanyihulikirira.

¹³ Neryo busana nʼekĩ, ngandĩsyabalũsya omo kihugo kino, nʼeribagusa omo kihugo mutabya mwasĩ, kutse ĩnywe, kutse abotata wenyũ. Nʼeyo mwasyakolera esindi nyamuhanga omo musibo nʼomo kiro, kusangwa sindiendisyabaganyira eyo nʼahake.

Erilagana lyʼerisubula

¹⁴ Neryo lebaya, Omwami Mukulu ati, Ebiro binemwasa, sikyendĩsyaswabũgwa kiti, Ngoko Mwami Mukulu aliho, oyo walũsaya abana ba Ĩsraelĩ erĩlũa omo kihugo kyʼeMĩsĩrĩ,

¹⁵ nĩkwa, ngoko Mwami Mukulu aliho, oyo walũsaya abagala ba Ĩsraelĩ erĩlũa omo kihugo kyʼelutambi lwʼendata erĩlũa omo bihugo byosĩ eyo ahiyirabo. Kusangwa nasyasũbyabo omo kihugo kyabo ekyo naha abotata wabo.

¹⁶ Omwami Mukulu ati, Lebaya, nasyatuma abasohĩ bangi, nabo basyasohabo. Nʼenyũma nasyatuma abahiyi bangi, nabo basyahigirabo oko buli kitwa, nʼoko buli kitwa, nʼomo migenyo yʼamabwe.

¹⁷ Kusangwa ameso wage ali oko nzira syabo syosĩ. Sĩbabĩsamĩre oko bũsũ bwage kutse ebibi byabo sĩbĩbĩsĩre oko meso wage.

¹⁸ Ngandĩtsũka eriswaliha amalolo wabo nʼebibi byabo engendo ĩbĩrĩ, kusangwa babĩrĩtsandya ekihugo kyage omo sanamu esiri ngʼebĩnda ebitawite engebe. Kandi babĩrĩũsũlya ekihugo ekyo nahabo omo syonyamuhanga syabo syʼamabehĩ.

Omwami Mukulu ni busagiro

¹⁹ Uwe Mwami Mukulu, amaka wage, nʼahakongotere hage, nʼobusayiro bwage oko biro byʼobũlĩge, ebihanda byosĩ byasyakũhĩkako, erĩlũa oko syondũlĩ syʼekihugo, byasyabũga biti, Abotata wetu mobalya omwandu wʼamabehĩ masa, nʼebitya-bitya nʼemyatsi eyite mo ndũndĩ.

²⁰ Omundu anganatoka eriyikolera esyonyamuhanga kwehĩ? Nĩkwa nasyo isi nyamuhanga!

²¹ Neryo lebaya, nasyamĩnyĩsyabo, nasyamĩnyĩsyabo engendo nguma eyĩ Obũtokĩ bwage nʼamaka wage. Basyaminya erĩna lyage ko liri Mwami Mukulu.