Yeremĩa 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Obugoma

¹ Ekĩnywa kyʼOmwami Mukulu ekyahĩka uku Yeremĩa busana nʼobugoma.

² Yũda akalira, nʼesyongyo syako syamoloba. Abandu bĩkere ahisi ibanambite emisarandwe. Nʼekiriro kyʼeYerũsalema kyabirihetuka.

³ Abakulu babo bakatuma abagombe babo erienda amagetsi. Bakahĩka oko byũna byʼamagetsi, sibebana amagetsi. Bakasũbũlaya amalega wabo go busa. Bakakwa esĩsonĩ nʼerihemulwa, kandi bakaswika emitwe yabo.

⁴ Busana nʼekitaka ekĩsatĩkĩre, kusangwa sihetabya embũla omo kihugo. Abalĩmĩ bakakwa esĩsonĩ, nʼeriswika emitwe yabo.

⁵ Ega, nʼengabi ikabutira omolĩ ĩkasĩga ekyana kyayo kusangwa sihali biti.

⁶ Nʼesyopunda syʼomolĩ sikahangana oko bitwa, sikahumayira ngʼeboha. Ameso wasyo akalĩbana, kusangwa sihali biti.

⁷ Nomo ebibi byetu bikatuhandikirira, uwe, Mwami Mukulu, Ukole busana nʼerĩna lyawe. Kusangwa kwenene eritswa lyetu ni ringi. Twabĩrĩkũhalyako.

⁸ Uwe Maha wʼeĨsraelĩ, Omũlamya wuwe omugulu wʼobũlĩge, busana nakĩ ukabya ngʼowʼehandi omo kihugo, kandi ngʼomũgendĩ oyukahanda ehema yiwe akalalirira ekiro kiguma kwehĩ?

⁹ Busana nakĩ ukabya ngʼomundu ukubaha, ngʼembangĩ eyitetoka erĩlamya kwehĩ? Nĩkwa uwe, Omwami Mukulu, uli omo katĩkatĩ ketu, netu tukahulawa omo lĩna lyawe. Sũtũsĩganaye!

¹⁰ Omwami Mukulu akabũga nʼabandu aba ati, Bakanza eriganga-ganga batya. Sĩbetakakĩrya ebisando byabo. Busana nʼekyo Omwami Mukulu sĩalĩrĩgabo. Lino akandisyibuka ebibi byabo, nʼerisuyira ebibi byabo.

¹¹ Neryo Omwami Mukulu mwabũga nage ati, Susabire abandu aba bo bibuya.

¹² Omugulu bakatsira akalyo sĩnangowa ekiriro kyabo. Nʼomu­gulu bakahonga obuhere bwʼerĩokererya, nʼobuhere bwʼeyĩsyano, sĩnangalĩgabo. Nĩkwa nasyabugabo omo mũyalĩ, nʼomo nzala, nʼomo ndwala yʼakasũsũ.

¹³ Neryo monabũga nyiti, Ayĩ, Mukama Omwami Mukulu! Lebaya, abamĩnyererĩ bakabwirabo bati, Simwendisyalola oko mũyalĩ, kutse sĩmwendĩsyakwa enzala. Nĩkwa nasyabaha hano Obuholo bwʼekwenene.

¹⁴ Neryo Omwami Mukulu mwambwira ati, Abamĩnyererĩ bakaminyerera omo mabehĩ oko lĩna lyage. Mondatumabo, kutse sinditahanabo, kutse mondabũga nabo. Bakaminyerera busana nenyũ esyonzolĩ syʼamabehĩ, nʼerilagula, nʼebitya-bitya, nʼeriteba lyʼobũlengekanĩa bwabo.

¹⁵ Neryo busana nʼekyo Omwami Mukulu akabũga busana nʼabamĩnyererĩ abakaminyerera oko lĩna lyage, nage mondatumabo, nĩkwa bakabũga bati, Omũyalĩ nʼenzala sibyendisyabya omo kihugo kino, nyiti, Omo mũyalĩ nʼomo nzala abamĩnyererĩ abo basyaherĩbwa!

¹⁶ Nʼabandu abo bakabwirawa obũmĩnyererĩ bwabo basyaguswa omo nzira syʼeYerũsalema busana nʼenzala nʼomũyalĩ. Kandi sihendisyabya oyukatabo, ibo, nʼabakalĩ babo, kutse abagala, kutse abali. Kusangwa nasyũtũlĩra kubo kwʼebibi byabo.

¹⁷ Nawe wasyabwirabo ekĩnywa ekĩ uti, Ameso wage atoge mwʼemĩsonĩa omo kiro nʼomo musibo, sĩyũmbaye busana nʼomukondo mwali wʼabandu bage, abĩrĩbũnĩka nʼobũbũne bunene, nʼekironda kĩkalĩre.

¹⁸ Namaya omolĩ, neryo, lebaya abĩtawa omo mũyalĩ! Namingira omo mũyĩ, neryo lebaya, bakwĩre enzala busana nʼomũmĩnyererĩ nʼomũhererĩ, abosĩ babiri bakaganga-ganga omo kihugo ekyo batasĩ.

Erĩkangya ebibi

¹⁹ Wabirigana ye Yũda yo kutsibu kwehĩ? Omutima wawe abĩrĩkwa Sĩonĩ yʼobusu kwehĩ? Busana nakĩ wabĩrĩtũswĩrya, isihali erilama busana netu kwehĩ? Motwayiketera Obuholo, nĩkwa mohatahĩka obubuya nʼobuguma. Motwayiketera omugulu wʼerilama, nĩkwa lebaya, erĩũbahya!

²⁰ Uwe Mwami Mukulu, tũnasĩ obubi bwetu, nʼamalolo wʼabotata wetu, kusangwa twabĩrĩkũhalyako.

²¹ Sũtũkwe obusu, busana nʼerĩna lyawe. Suhemule ekĩtũmbĩ kyʼolukengerwa lwawe. Wibuke, sũtwe endagano yawe haguma netu.

²² Omo katĩkatĩ kʼesyosanamu syʼebihanda hane esikaleta embũla kwehĩ? Kutse amatũkũ anganatoka erireta embũla kwehĩ? Si nina we Mwami Mukulu, Nyamuhanga wetu kwehĩ? Neryo tũkahĩra amaha wetu ukʼuwe, kusangwa ni we oyo wabirikola emyatsi eyĩ yosĩ.