Yeremĩa 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilaka lya Yeremĩa

¹ Uwe Mwami Mukulu, uli mutunganene, omugulu ngasakana nawe omo mwatsi wage. Nĩkwa nangakanĩa emyatsi yʼerĩbanza lyʼekwenene haguma nawe: Busana nakĩ enzira yʼababi ikabana omũyĩsa kwehĩ? Busana nakĩ abakakola nʼamatebo bĩkere ndeke kwehĩ?

² Wabirihandabo, ega, babiribana emĩrĩhĩ. Bakakula, ega, bakabuta ebĩgũma. Omo mĩnywa yabo uli hakũhĩ, nĩkwa omo bũlengekanĩa bwabo uli hali.

³ Nĩkwa uwe Mwami Mukulu, ũnanyasĩ. Ukanyilolako, ukalenga oko mutima wage ngʼali ati ukʼuwe. Ukurubanebo ngʼesyombũlĩ esikayakerawa, usololebo oko kiro kyʼerikerwa!

⁴ Ekihugo kyasyakolyahi eririra nʼebiti byʼekihugo kyosĩ eriuma kwehĩ? Busana nʼebibi byʼabĩkere mukyo, esyonyama syabĩrĩpũrwa nʼesyonyonyũ, kusangwa abandu babũga bati, Siendisyalangira endũlĩ yetu.

⁵ Wamabya wabiritibita nʼabakagenda omo bisando, nabo babĩrĩkũlũhya neryo wangatoka erĩsĩngana nʼesyosabayĩrĩ uti kwehĩ? Wamayĩhĩnda ahisi omo kihugo kyʼobuholo, wasyakolakĩ omwʼigunga lyʼeYorodanĩ kwehĩ?

⁶ Kusangwa nina bagala benyũ, nʼekĩtũnga kya tata wawe; bo babirikukolera ebyʼamatebo; nina bo babirikusimbira. Sũlĩgebo, nomo bangakubwira omo bĩnywa bĩsĩhĩre.

⁷ Nabĩrĩsĩganĩa ekĩtũnga kyage, nabirigusa omwandu wage, nabĩrĩhĩra omwanze wʼomutima wage omo byala byʼesyonzĩgũ siwe.

⁸ Omwandu wage nayisoga abirinyibyako ngʼendale omo mũsĩtũ. Yabirinyihayira. Busana nʼekyo nyĩkwĩrebo obusu.

⁹ Omwandu wage nayisoga abirinyibyako ngʼekihungu kyʼebitangabitanga kwehĩ? Nʼebihungu nabyo byabĩrĩtĩmba kubo nʼerilwa nabo kwehĩ? Mugende, mũhĩndanaye esyonyama syosĩ syʼomolĩ, muletesyo okwʼirya!

¹⁰ Abalĩsya bangi babĩrĩherya eririma lyage lyʼebĩnyũ, babiriryatangirira amalima wage wʼahisi omwisi wʼebisando, babiriyira ekitaka kyage kyowene mo mbwarara yʼomulala.

¹¹ Kyabiriyirwa mo kĩma. Ngʼomulala, likalirira embere syage. Ekihugo kyosĩ kyabiriyirwa mo mulala, kusangwa sihali mundu oyukatsomana.

¹² Abaherya babĩrĩhĩka oko bitwa byosĩ omo mbwarara, kusangwa omũyalĩ wʼOmwami Mukulu akabuga erĩtsũka oko ndũlĩ nguma nʼerĩhĩka oko yindi ndũlĩ yʼekihugo. Sihali buholo busana nʼomundu.

¹³ Babiribiba engano, babirigesa emisaki-saki. Babĩrĩyagalya nĩkwa sibetabana endũndĩ. Nĩkwa muhemuke busana nʼebĩgũma byenyũ byʼobugese busana nʼerihitana litsibu lyʼOmwami Mukulu.

¹⁴ Omwami Mukulu akabũga atya busana nʼabalĩkyetu bosĩ babi, ababĩrĩherya ekitaka ekyo nabiriha abandu bage Ĩsraelĩ. Lebaya, nasyakulabo omo kitaka kyabo, kandi nasyakula ekĩtũnga kya Yũda erĩlũa omo katĩkatĩ kabo.

¹⁵ Kandi, omugulu namabikulabo, nasyasubula nʼeriganyirabo, kandi nasyaswaletabo, obuli mundu oko mwandu wuwe, nʼobuli mundu oko kitaka kiwe.

¹⁶ Neryo omugulu, bamayĩkangĩrĩrya nʼomũhwa esyonzira syʼabandu bage, erĩlahĩrya oko lĩna lyage, Ngoko Mwami Mukulu aliho. Nibya ngoko bakangĩrĩraya abandu bage erĩlahĩrya uku Baalĩ, neryo basyahĩmbwa omo katĩkatĩ kʼabandu bage.

¹⁷ Nĩkwa Omwami Mukulu ati, Bamatĩndĩowa, neryo nasyakunungula ekihanda ekyo, erikunungulakyo nʼerĩheryakyo.