Yeremĩa 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ebĩnywa bya Yeremĩa, mugala wa Hĩlkĩa owʼoko bahererĩ ababya eAnatotĩ omo kihugo kya Benyamĩna.

² Ekĩnywa kyʼOmwami Mukulu mokyamũhĩkako omo biro bya Yosĩa mugala wa Amonĩ, omwami wʼeYũda oko mwaka wʼerĩkũmĩ nʼeyĩsatu wʼeritabala liwe.

³ Mokyahĩka nibya omo biro bya Yoyakĩmũ, mugala wa Yosĩa, omwami wʼeYũda, nʼerĩhĩka okwʼĩhũngwa lyʼeYerũsalema oko mukera wʼakatanu oko ndũlĩ yʼomwaka wʼerĩkũmĩ nʼomuguma wa Zedekĩa mugala wa Yosĩa, omwami wʼeYũda.

Eribirikirwa lya Yeremĩa

⁴ Neryo ekĩnywa kyʼOmwami Mukulu mokyanyĩhĩkako kiti,

⁵ Embere ndenakuhangika omo nda monakuminya, nʼembere ute walũa omo nda monakuhigula. Nabirikuyira mo mũmĩnyererĩ oko bihanda.

⁶ Neryo monabũga nyiti, Ĩlolo Mukama Omwami Mukulu! Lebaya, Sĩnyasĩ erĩbũga, kusangwa indi mũlwana.

⁷ Nĩkwa Omwami Mukulu mwambwira ati, Sũbũge uti, Ĩngye indi mũlwana; kusangwa ukandisyaya oko bosĩ nasyakutumako wasyagenda, nʼekĩndũkĩ nasyakuhana wasyabũgakyo.

⁸ Omwami Mukulu ati, Sigubahebo, kusangwa indi haguma nawe erĩkũlamya.

⁹ Neryo Omwami Mu­kulu mwasumba ebyala biwe mwatũla oko buno bwage. Neryo Omwami Mukulu mwabũga nage ati, Lebaya, nabĩrĩhĩra ebĩnywa byage omo buno bwawe.

¹⁰ Lebaya, nabĩrĩkũhĩra mũnabwĩre endata oko bihanda nʼendata oko mami, eritsimbula nʼerisambula nʼerĩherya nʼerĩkĩnda ahisi, erĩhĩmba nʼerihera Omwaka.

Omũsyo wʼomuti nʼenyungu eyikabera

¹¹ Kandi ekĩnywa kyʼOmwami Mukulu mokyambĩkako kiti, Yeremĩa, wamalola ũkũkĩ kwehĩ? Nage monabũga nyiti, Namalola oko mũtso wʼomuti wʼomũlosĩ.

¹² Neryo Omwami Mukulu mwabũga nage ati, Wabirilangira ndeke, kusangwa ngategaya ndeke ekĩnywa kyage erĩberereryakyo.

¹³ Nʼekĩnywa kyʼOmwami Mukulu mokyambĩkako engendo yʼakabiri kiti, Wamalangirakĩ kwehĩ? Nage monabũga nyiti, Namalangira enyungu ikabera, nʼobuno bwayo bũlolĩre elutambi lwʼendata.

¹⁴ Neryo Omwami Mukulu mwambwira ati, Ebibi byasyahulukira elutambi lwʼendata oko syondũlanĩ syosĩ syʼekihugo.

¹⁵ Kusangwa, Omwami Mukulu ati, Lebaya, nasyabirikira ebĩtũnga byosĩ byʼamami wʼelutambi lwʼendata. Nabo basyahĩra obuli mundu ekĩtũmbĩ kiwe kyʼobwami aho esyongyo sikingira eYerũsalema nʼoko syombĩmbo syago oko mbande syosĩ, nʼoko mĩyĩ yosĩ ya Yũda.

¹⁶ Nage nasyabwirabo eritswera lyage busana nabo, busana nʼebibi byabo byosĩ, kusangwa babĩrĩnyĩsĩganĩa, kandi babĩrĩhĩsĩrya obukwa oko Sindi nyamuhanga, ĩbabĩrĩramya emĩbĩrĩ yʼebyala byabo.

¹⁷ Nawe Ubohe embindi yawe, uhangane ubwirebo ebyosĩ ebyo ngakuhana. Susweke busana nabo, ngasyakũswekya embere syabo.

¹⁸ Kusangwa lebaya, nabirikuyira mũnabwĩre ngʼomũyĩ akongotere, nʼendũyĩ yʼekyuma, nʼesyombĩmbo syʼemiringa, oko kihugo kyosĩ, nʼoko bami bʼeYũda, nʼoko banya-mwami bayo, nʼoko bahererĩ bayo, nʼoko bandu bʼekihugo.

¹⁹ Nabo basyalwa nawe, nĩkwa sĩbendĩsyakũsĩnga, kusangwa ĩngye indi haguma nawe erĩkũlamya, Omwami Mukulu atya.