Yakobo 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Obwĩra bwʼekihugo

¹ Erinegena nʼamalwa omo katĩkatĩ kenyũ bĩkalũa hahi kwehĩ? Bĩkalũa oko syongumbu syenyũ esĩkalũa omo mibiri yenyũ.

² Mukasonda ebindu byo kutsibu, nĩkwa simuwitebyo, neryo mukasonda erĩĩta abandi. Mukatsura nĩkwa simwetoka eribanabyo; kikaleka imwalwa nʼerinegena. Simuwite ebyo mwanzĩre kusangwa sĩmwebũlaya Nyamuhanga.

³ Mũkabũlaya neryo simwebanabyo, kusangwa mũkabũlaya nabi, muti mũkakolesayabyo omo syongumbu syenyũ.

⁴ Ĩnywe basĩngĩrĩ, sĩmwasĩ ko bwĩra bwʼekihugo nĩ bũyĩgũ uku Nyamuhanga kwehĩ? Neryo Oyukasonda eribya mwĩra wʼekihugo akayiyira mo nzĩgũ ya Nyamuhanga.

⁵ Kutse mũkaganĩraya muti Amasako akabũga buyira kwehĩ, ati, Ekĩrĩmũ ekyo Nyamuhanga abĩrĩhĩra omwisi syetu, kyoswĩre nʼerisonda litsibu.

⁶ Nĩkwa olukogo olo Nyamuhanga akaha lũlengĩre. Neryo Amasako ati, Nyamuhanga akalwa nʼabakayiheka, nĩkwa akakangaya olukogo ukwʼabo bakayĩkehaya.

⁷ Neryo mwolobe embere sya Nyamuhanga. Mulwe nʼeSatanĩ, nayo ikandisyabasaga.

⁸ Mũyĩtũnde hakũhĩ na Nyamuhanga, naye akandĩyĩtũnda hakũhĩ nenyũ. Mũnabaye ebyala byenyũ, ĩnywe bakola-nabi! Mweraye emitima yenyũ ĩnywe mũkayĩtendereraya.

⁹ Mũkwe obũlĩge, mũsũsũmane, mulire: eriseka lyenyũ libinduke mwʼĩsũsũmana, nʼobutseme bwenyũ bubinduke mo ngitsi.

¹⁰ Mũyĩkehaye embere syʼOmukama, naye akandĩbahamya.

Omwatsi wʼeritswera mũlĩkyetu

¹¹ Balĩkyetu, simuhandikirirane. Oyukahandikirira mũlĩkyabo, kutse erimutswera, akahandikirira Emigambo nʼeritswerayo. Nĩkwa Wamatswera Emigambo, sukiri oyukakenga Emigambo, nĩkwa uli mũtswerĩ wayo.

¹² Nyamuhanga ĩyowene akayira Emigambo nʼeribya mũtswerĩ. Iye ĩyowene akatoka erĩlamya nʼerĩherya, nĩkwa uwe uwendi uti ukatswera mũlĩkyenyũ kwehĩ?

Omwatsi wʼeriyihalamba

¹³ Muhulikirire, ĩnywe mũkabũga muti, Mũnabwĩre kutse engyakya, twasyaya oko mũyĩ mulebe, aho twasyasiba Omwaka muguma. Aho twasyatũndya, nʼeribana endũndĩ.

¹⁴ Kwesĩ sĩmwasĩ nga mwasyabya muti omo ngyakya. Kusangwa engebe yenyũ iri ngʼoluhohe, olukahuluka katambĩ kake, neryo ilwabulirayo.

¹⁵ Neryo ekitolere ĩwabũga uti, Omukama amabya anzĩre, twasyabyaho itwakola ekĩ kutse ekindi.

¹⁶ Nĩkwa lino, mukayihalamba omo miyiheko yenyũ. Emiyihalambo yosĩ eyo ni kibi.

¹⁷ Neryo, omundu oyo wasĩ ekibuya ekyo angakola, nĩkwa sialikolakyo, omundu oyũ ali mʼomusango wʼebibi.