Yakobo 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Simubye nʼebitaga

¹ Balĩkyetu, Simuyire ebitaga omo migendere yenyũ, ĩnywe mwabĩrĩkĩrĩrya nʼerikwama Omukama wetu Yesu Kristo, Omwenye olukengerwa.

² Kusangwa omundu amahĩka omo nyũmba yenyũ yʼerĩhĩndanamo iniambite embũka yʼesyamagetsi, nʼesyongimba esyowenenga. Kandi omundu mwera akahĩkamo iniambite esyongimba sĩtowene.

³ Neryo mukakenga Oyukambala esyongimba syowenenga muti, Ĩkala ahowene hano. Kandi mukabwira omundu mwera, muti, Hangana halya. Kutse muti, Ĩkala hano ahisi, hakũhĩ nʼekĩtũmbĩ kyage.

⁴ Si mwabirisombola abandu omo katĩkatĩ kenyũ, nʼeritswera emyatsi busana nʼamalengekanĩa mabi kwehĩ?

⁵ Abalĩkyetu banze, muhulikirire ndeke! Nyamuhanga mwayisoga abera bʼekihugo eribya ngʼabandu bʼebindu omwʼĩkĩrĩrya, abasyabana Obwami obo Nyamuhanga abirilaga oko bakamwanza.

⁶ Nĩkwa ĩnywe mukahemula omundu mwera! Si ba bandu bʼebindu abakabanũbaya, nʼeribakurira embere syʼabatswerĩ kwehĩ?

⁷ Ni bandu bʼebindu abakatsuma erĩna libuya eryo Nyamuhanga abiribahulamo.

⁸ Nĩkwa mukandikola ndeke mwamaberererya omugambo wʼobwami owali omo masako ati, Wanze mũlĩkyenyũ ngoko ũyanzĩre.

⁹ Nĩkwa mwamayira ebitaga, mukakola ebibi, kandi mwamasĩngwa nʼEmigambo ngʼabakahalaya.

¹⁰ Kusangwa oyukakwama Emigambo yosĩ, nĩkwa amaketa omuguma, ĩnĩabĩrĩhalya omo byosĩ.

¹¹ Kusangwa oyo wabũga ati, Isiwasĩngĩra, yo wabuga ati, Ĩsĩwĩta. Nĩkwa wamatendĩsĩngĩra, nĩkwa Ũkĩta, ĩwabĩrĩhalya omo Migambo.

¹² Neryo mũbũge, mukole ngʼabandu abasyatswerwa nʼomugambo owakaleta obwĩranda.

¹³ Kusangwa Nyamuhanga siendisyaganyira omundu oyukagana eriganyira ogundi. Nĩkwa eriganyira lĩkakĩnda eritswera.

Erĩkĩrĩrya nʼemĩbĩrĩ

¹⁴ Balĩkyetu, nĩ ndũndĩ yahi busana nʼomundu oyũkabũga ati awite erĩkĩrĩrya, nĩkwa emĩbĩrĩ yiwe isĩrĩkangayalyo. Erĩkĩrĩrya eryo lyanganamũlamya kwehĩ?

¹⁵ Mugala wetu kutse mwali wetu anganabya butsira esyongimba, kutse anganabula ekyʼerirya.

¹⁶ Nĩ ndũndĩ yahi eribwirabo uti, Mugende buholo, mũsĩsĩmũke, mũgũte ndeke, nĩkwa simulihabo ebitolere emibiri yabo?

¹⁷ Erĩkĩrĩrya ko liri ritya. Lyamabya liri ĩryolyene butsira emĩbĩrĩ, ĩrĩholĩre.

¹⁸ Omundu anganabũga ati, Uwe uwite erĩkĩrĩrya, nage ngwite emĩbĩrĩ. Ũngangaye erĩkĩrĩrya lyawe eritawite mĩbĩrĩ, nage ngandĩkũkangya erĩkĩrĩrya lyage omo mĩbĩrĩ yage.

¹⁹ Ũkĩkĩrĩraya ngoko Nyamuhanga ni muguma. Ũkabũga ndeke. Nĩkwa esyombĩnga nasyo sĩkĩrĩrĩraya ekyo, kandi sĩkasũka-sũkana.

²⁰ Uwe mundu mũkĩrũ, ũnanzĩre erĩmĩnyĩsĩbwa ngoko erĩkĩrĩrya butsira mĩbĩrĩ ni busa kwehĩ?

²¹ Omugulu Abrahamũ tata wetu, ahera mugala wuwe Ĩsaka oko kiherero, mwatatũngananĩbwa omo mĩbĩrĩ yiwe kwehĩ?

²² Mũlebaye ngoko erĩkĩrĩrya molyakola omo mĩbĩrĩ yiwe, kandi erĩkĩrĩrya liwe molyahĩkana omo mĩbĩrĩ yiwe.

²³ Neryo amasako mwabererera, awakabũga ati, Abrahamũ mwĩkĩrĩrya Nyamuhanga, neryo Nyamuhanga mwamuganza ngʼomutunganene busana nʼerĩkĩrĩrya liwe. Kandi Nyamuhanga mwahula Abrahamũ mo mwĩra wuwe.

²⁴ Neryo mũlebaye ngoko Nyamuhanga akatũngananaya omundu busana nʼebyo akakola, butsira erĩkĩrĩrya ĩryolyene.

²⁵ Ko lyabya litya nʼomũmalaya ye Rahabũ. Mwatũngananĩbwa na Nyamuhanga busana nʼebyo akola omugulu akokaya abakwenda ba Ĩsraelĩ, nʼerĩkangyabo eyindi nzira yʼerilabamo.

²⁶ Kusangwa ngoko mubiri owate mo kĩrĩmũ aholĩre, ko liri litya erĩkĩrĩrya butsira mĩbĩrĩ lĩholĩre.