Yakobo 1 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩngye Yakobo, omugombe wa Nyamuhanga nʼOmukama Yesu Kristo, ngabakeraya ĩnywe bihanda ĩkũmĩ nʼebibiri ababiripanza-panzwa omo kihugo kyosĩ.

Erĩkĩrĩrya nʼamenge

² Balĩkyetu, omugulu mukabana erirengwako mĩsĩndo-mĩsĩndo, mubye nʼobutseme.

³ Kusangwa mũnasĩ omugulu erĩkĩrĩrya lyenyũ likalengawako, likaleta erĩyĩyĩnĩa.

⁴ Nĩkwa litolere erĩyĩyĩnĩa lyenyũ lĩhĩkane ndeke, imwabya bandu abahĩkene imwabirikula ndeke, isimulibula mwatsi.

⁵ Nĩkwa hamabya mundu omo katĩkatĩ kenyũ oyukabula amenge, abũlaye Nyamuhanga oyukaha ndeke oko bandu bosĩ butsira buhemu; neryo omundu oyo asyahabwa amenge ayo.

⁶ Nĩkwa abũlaye ĩnĩakĩkĩrĩraya, butsira eritika-tika. Kusangwa oyukatika-tika ali ngʼebisunda byʼomo ngetsi, ebĩkakũnawa nʼeriguswa nʼerihunga.

⁷ Omundu ngʼoyo sĩaganĩraye ati asyabana kindu ewʼOmukama.

⁸ Kusangwa ni mundu wʼemitima ĩbĩrĩ, sĩasĩkĩre omo nzira siwe syosĩ.

Obwera nʼobuteke

⁹ Nĩkwa Omũlĩkyetu mwera atseme omugulu akahamĩbawa na Nyamuhanga.

¹⁰ Nʼomundu wʼebindu atseme omugulu akakehĩbawa na Nyamuhanga. Kusangwa abʼebindu basyahwaho ngʼomusanga wʼebiti.

¹¹ Kusangwa eryuba likahuluka haguma nʼerihunga, bĩkahĩsaya ebiti ebyo, nʼomusanga wabyo akatogonga, nʼobubuya bwabyo bukamera. Nʼomundu wʼebindu kwʼasyahwerekerera atya omugulu akakola emĩbĩrĩ yiwe.

Erirengwako

¹² Obutseme buli nʼomundu oyũkasĩka omwʼirengwako, kusangwa amabitoka erirengwako asyangirira embĩta yʼengebe, eyo Nyamuhanga abirilaga abamwanzĩre.

¹³ Omundu sĩabũge omugulu akalengawako ati, Nyamuhanga yukamulengako, kusangwa Nyamuhanga sialitoka erirengwako nʼekibi, kandi sialirenga uku mundu.

¹⁴ Nĩkwa obuli mundu akalengawako omugulu akakurawa nʼerihekwa nʼesyongumbu siwe nyibi.

¹⁵ Neryo esyongumbu siwe nyibi syabiheka obukule, sikabuta ebibi, nʼebibi byabikula, bikaleta oluholo.

¹⁶ Sĩmũtebĩbawe, balĩkyetu banze.

¹⁷ Obuli lũsũnzo lubuya nʼobuli lũsũnzo lowene, bĩkalũa endata, kandi bikasira uku Tata wʼekyakakala kyosĩ, oyutebinduka kutse eriyihindula.

¹⁸ Kusangwa mwayisoga eritubuta omo kĩnywa kyʼekwenene itwatoka eribya bʼerĩmbere umwʼebyo ahangika.

Erĩowa nʼerikola

¹⁹ Balĩkyetu banze, muminye ekĩ. Obuli mundu abye akowa lũba, nĩkwa sĩabũge lũba, kutse siahitane lũba.

²⁰ Kusangwa erihitana lyʼabandu siririyira eritunganene lya Nyamuhanga.

²¹ Neryo muguse obuli mwatsi atĩsĩrĩre, nʼemibere yosĩ yʼebibi. Neryo mwangirire nʼomutima molo ekĩnywa ekyo Nyamuhanga akahĩra omo mitima yenyũ, ekikatoka erĩbalamya.

²² Mubye bandu abakakola nʼerĩowa ebĩnywa bya Nyamuhanga, butsira abakahulikirira lisa nʼeriyiteba.

²³ Kusangwa omundu amowa ekĩnywa isialikolakyo, ali ngʼomundu oyukayisamalira omo kisasamira nʼeriyiminya;

²⁴ kusangwa akayisamalira, neryo iniagenda, nʼeribirirwa lũba kwʼalwe asosĩre.

²⁵ Nĩkwa omundu oyukalangira ndeke omugambo owahĩkene, owʼobwĩranda, iniakakwamago ndeke, asyabana obutseme bwa Nyamuhanga omo mũbĩrĩ wuwe, kusangwa sialihulikirira buyira nʼeribirirwago; akakolago.

²⁶ Omundu amaganĩrya ati akakwama ekisomo kyo ndeke, nĩkwa isialikunga olulimi luwe, akayiteba, nʼekisomo kiwe ni kya busa.

²⁷ Ekisomo kibuya, ekite nʼebĩtĩsĩrĩre embere sya Nyamuhanga Tata kyekĩ: erĩwatĩkya esyongũbĩ nʼabakwakalĩ omo bũlĩge bwabo, kandi eriyihigula oko myatsi mibi yʼekihugo.