Tito 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkangĩrĩrya lyʼekwenene

¹ Nĩkwa uwe, ũbũge emyatsi eyitolere erĩkangĩrĩrya eritunganene.

² Ubwire abasyakulu uti sĩbakũnde, babye bʼamenge, bayĩtegaye; babye abakalĩre omwʼĩkĩrĩrya, nʼomo lwanzo, nʼomwʼĩyĩyĩnĩa.

³ Kandi mubwire abakekulu, nabo nibya babye nʼemibere eyikakenga Nyamuhanga, Sibabye bakatonga abandu, kandi Sibabye bakakũnda obwabũ, babye Ĩbakakangĩrĩraya emyatsi mibuya.

⁴ Kandi bakangĩrĩraye abakalĩ balere erianza abĩba wabo, banze abana babo,

⁵ bayĩtegaye, babye bakayihigula oko bibi. Babye bakakola omũbĩrĩ wʼeka, babye bagenge, bakenge abĩba wabo, neryo ekĩnywa kya Nyamuhanga sikitsumawe.

⁶ Kandi mulemba-lembe abalwana nibya, bayĩtegaye.

⁷ Nawe ubye kĩmĩnyĩsyo kyʼemikolere mibuya, ũkangĩrĩraye ebyʼamenge, awate ko matebo.

⁸ Ũbũge ebĩnywa bitunganene, ebite kwʼekyangakungwa. Neryo enzĩgũ yawe iyahemuka, isiawite omwatsi mubi wʼerĩbũga busana netu.

⁹ Mubwire abagombe, bowe abakama babo omo myatsi yosĩ, nʼerĩtsemesyabo, kandi sibakube buhaka.

¹⁰ Kandi sĩbĩbe, nĩkwa bayĩkangaye ngʼabandu babuya abateregula, batoke erĩowanĩa erĩkangĩrĩrya lya Nyamuhanga Omũlamya wetu omo byosĩ bakakola.

¹¹ Kusangwa Nyamuhanga abĩrĩmĩnyĩkalya olukogo luwe, olukaleta erilama, busana nʼabandu bosĩ.

¹² Olukogo olo lukatutegeka luti, tugane emikolere eyitekenga Nyamuhanga, nʼesyongumbu syʼekihugo, luti, tũyĩtegaye, nʼerikwama ekitunganene, nʼerikenga Nyamuhanga omo mikolere yetu oko mugulu ono,

¹³ itukalindirira nʼamaha gʼomũyĩsa ekiro kyʼobutseme, kandi tukalindirira erihuluka lyʼolukengerwa lwa Nyamuhanga wetu mukulu, nʼomũlamya wetu, Yesu Kristo.

¹⁴ Kristo mwayiha busana netu erĩtũtongolya oko bibi byosĩ, nʼerĩerya abandu busana naye ĩyowene-wene, abali nʼomũhwa wʼerikola emĩbĩrĩ yowene.

¹⁵ Ũbũge emyatsi eyĩ, kandi Ũsĩkaye nʼerikunga abandu nʼehamũlĩ yosĩ. Suleke mundu akakupona.