Rũta 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Boazĩ akasĩgalaya omwandu wa Elĩmelekĩ

¹ Neryo Boazĩ mwaya oko lũkyo lwʼomũyĩ, mwĩkalaho; neryo omugala wabo wʼekĩtũnga oyo Boazĩ ahula mwahĩka; neryo Boazĩ mwamubwira ati, Ego, uwe! Wase Wĩkale aha. Neryo mwakitiraho mwĩkala.

² Neryo Boazĩ mwĩmya abalume ĩkũmĩ bʼoko bakulu bʼomũyĩ, mwabwirabo ati, Mwĩkale hano. Nabo mobĩkala.

³ Neryo Boazĩ mwabũga nʼomugala wabo wʼekĩtũnga ati, Naomĩ, oyo wabirisubula akalũa omo kihugo kyʼeMoabũ, akasonda erĩgũlya olubibi lwʼekitaka, olwabya lwa mugala wetu ye Elĩmelekĩ.

⁴ Nage monaganĩrya erĩkũmĩnyĩsya, nyiti, Ugulirelo embere syʼabĩkere hano, nʼembere syʼabakulu bʼekĩtũnga kyage. Wamanza erĩtongolyalo, ũtongolayelo; nĩkwa ũtanzĩre erĩtongolyalo, umbwire, nage inaminyakyo; kusangwa sihali ogundi wʼerĩtongolyalo ate we; nage, enyũma kuwe. Naye mwabũga ati, Nasyatongolyalo.

⁵ Neryo Boazĩ mwabũga ati, Ekiro wasyagula olubibi omo byala bya Naomĩ, litolere nibya ĩwĩmya Rũta Omunya Moabũ, omũkalĩ wʼoyo wahola, erĩhanganĩa erĩna lyʼoyo wahola omo mwandu wuwe.

⁶ Nʼomugala wabo wʼekĩtũnga oyo mwabũga ati, Sinangatoka erĩyĩtongoleryalo, ngasyayĩhererya omwandu wage; ehamũlĩ yage yʼerĩtongolya, ũyĩmĩrayeyo; kusangwa sinangatoka erĩtongolyalo.

⁷ Neryo eyĩ yabya mitsye omo Ĩsraelĩ kera erĩtongolya nʼerĩhĩnganĩa, erĩberererya emyatsi yosĩ; omundu ĩnĩalũsya engendero yiwe, nʼerihayo mũlĩkyabo, nʼekĩikyabya mwatsi wʼerĩtũla omo Ĩsraelĩ.

⁸ Neryo mugala wabo wʼekĩtũnga oyo mwabũga na Boazĩ ati, Uyigulirelo. Neryo mwalũsya engendero yiwe.

⁹ Kandi Boazĩ mwabwira abakulu, nʼabandu bosĩ, ati, Ĩnywe muli balangĩrĩ mũnabwĩre, ngoko nabirigula ebyosĩ ebyabya bya Elĩmelekĩ, nʼebyosĩ ebyabya bya Kĩlĩonĩ, nʼebya Malona nabirigulabyo omo byala bya Naomĩ.

¹⁰ Kandi Rũta Omunya Moabũ, omũkalĩ wa Malona, nabirimugula eribya mũkalĩ wage, erĩhanganĩa erĩna lyʼoyo wahola omo mwandu wuwe, neryo erĩna lyʼoyo wahola siribulirane omo katĩkatĩ kʼabagala babo, nʼoko lubibi luwe; ĩnywe muli balangĩrĩ mũnabwĩre.

¹¹ Nʼabandu bosĩ ababya omo lũkyo lwʼomũyĩ, nʼabakulu mobabũga, bati, Tuli balangĩrĩ. Omwami Mukulu ayire omũkalĩ oyukingira omo nyũmba yawe nga Rakelĩ kandi nga Lea, ababiri abahĩmba enyũmba ya Ĩsraelĩ: kandi Ukole ebitolere omo Efurata, kandi uhalambawe eBetelehemũ.

¹² Nʼenyũmba yawe ibye ngʼenyũmba ya Perezĩ, oyo Tamara abutira Yũda omo lubuto olo Mwami Mukulu asyakuha omo mwana-muto oyũ.

Boazĩ akahĩkaya Rũta

¹³ Neryo Boazĩ mwaherũkya Rũta, naye mwabya mũkalĩ wuwe. Neryo mwamwĩmya, nʼOmwami Mukulu mwamuha eriheka obukule, neryo mwabuta omugala.

¹⁴ Nʼabakalĩ mobabwira Naomĩ bati, Omwami Mukulu apipawe, oyũtekũsĩganaya mũnabwĩre hate mugala wenyũ wʼekĩtũnga; nʼerĩna liwe libye ĩnene omo Ĩsraelĩ.

¹⁵ Naye asyabya ukʼuwe omũsũbya wʼengebe, nʼomũwatĩkya omo biro byʼobukulu bwawe; kusangwa mwalyana wawe, oyũkwanzĩre, nʼoyuli mubuya busana nawe kwilaba bagala balinda, abirimubuta.

¹⁶ Neryo Naomĩ mwĩmya omwana oyo mwamũhĩra oko kĩkũba kiwe, mwabya mũlemberĩ wuwe.

¹⁷ Kandi abakalĩ balĩkyabo mobamuluka erĩna, bati, Naomĩ amabutirwa omugala; neryo mobahula erĩna liwe mo Obedĩ. Naye nʼĩse wa Yese, ĩse wa Dawĩdĩ.

¹⁸ Neryo esĩ ni ndengo sya Perezĩ: Perezĩ mwabuta Hezronĩ,

¹⁹ na Hezronĩ mwabuta Ramũ, na Ramũ mwabuta Amĩnadabũ,

²⁰ na Amĩnadabũ mwabuta Nasonĩ, na Nasonĩ mwabuta Salmonĩ,

²¹ na Salmonĩ mwabuta Boazĩ, na Boazĩ mwabuta Obedĩ,

²² na Obedĩ mwabuta Yese, na Yese mwabuta Dawĩdĩ.