Rũta 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Rũta akabũlaya Boazĩ erisoha oyo wangamũslgalya

¹ Neryo Naomĩ nyĩnyĩ-byala wuwe mwamubwira ati, Sinangakusondera ahʼeriluhukira, iwatoka eribana Obuholo kwehĩ?

² Kandi Boazĩ Omwenye abanabato abo wasiba nabo, si mugala wetu kwehĩ? Lebaya, iye akagũlũkaya ekisusu omo kiro mũnabwĩre omo kĩhũmbĩro.

³ Uyikose, ũyĩhakabaye amagũta, wambale esyongimba syawe wandagalire oko kĩhũmbĩro; nĩkwa suyĩkanganaye oko mundu oyo erĩhĩka aho akandibirira nʼerĩpũlya.

⁴ Neryo kyasyabya omugulu akagotsera iwaminya aho asyagotsera, neryo wasyingira, iwaswikula ebisando biwe, iwagotseraho; naye asyakubwira ebyo wasyakola.

⁵ Neryo Rũta mwamubwira ati, Ebyosĩ ebyo ũkabũga nasyakolabyo.

⁶ Neryo Rũta mwandagalira oko kĩhũmbĩro, neryo mwakola ebyosĩ ebyo nyĩnyĩ-byala amuhana.

⁷ Neryo Boazĩ abere abirya nʼerĩpũlya, nʼomutima wuwe abitsema, mwayagotsera oko ndũlĩ yʼekilundo kyʼengano. Neryo Rũta mwasa bolobolo, mwaswikula ebisando biwe, mwagotseraho.

⁸ Neryo omo katĩ-kanene kʼekiro, omundu oyo mwasĩsĩra, mwayibindula; neryo, lebaya, omũkalĩ iniagotsere ahali ebisando biwe.

⁹ Neryo mwabũga ati, Uwendi kwehĩ? Naye mwamũsũbĩrya ati, Ĩngye indi Rũta, omugombe wawe, uswike omugombe wawe oko lukimba lwawe; kusangwa uli wʼekĩtũnga kyetu.

¹⁰ Naye mwabũga ati, Mwali wage, Omwami Mukulu akutsumule; wabĩrĩkangya obubuya bungi oko mugulu wʼendũlĩ kwilaba erĩmbere, kusangwa sulitakwama abalwana nomo bangabya bera kutse abʼebindu.

¹¹ Na lino mwali wage, Sigubahe; ngandikukolera ebyosĩ ũkabũga; kusangwa omũyĩ gosĩ wʼabandu bage banasĩ ngoko uli mũkalĩ mugenge.

¹² Na lino ni kwenene indi wʼekĩtũnga kyawe; nĩkwa hali owʼekĩtũnga oyũnyĩlabĩre.

¹³ Ulinde ekiro ekĩ, neryo omo ngyakya asyabya amalĩga erikukolera emitsye yʼekĩtũnga erĩkũsĩgalya, lyowene; akole emitsye yʼekĩtũnga; nĩkwa amatindianza erikukolera emitsye yʼerĩsĩgalya, ĩngye nasyakukolera emitsye yʼerĩkũsĩgalya, ngoko Mwami Mukulu aneho. Ugotsere erĩhĩka engyakya.

¹⁴ Neryo mwagotsera ahali ebisando biwe, erĩhĩka engyakya; isihali muguma oyukaminya ogundi. Kusangwa abũga ati, Sikiminyikale ngoko mũkalĩ alĩahĩka oko kĩhũmbĩro.

¹⁵ Kandi mwabũga ati, Ulete ekitambara ekyo wambite, uwate kukyo. Neryo Rũta mwawata kukyo; neryo mwamulengera ehĩrengĩ ndatu hyʼekisusu, mwamũhekyahyo. Neryo mwayigendera omo mũyĩ.

¹⁶ Nʼomugulu ahĩka uku nyĩnyĩ-byala, mwabũga ati, Uwendi, mwali wage kwehĩ? Neryo mwamubwira ebyosĩ ebyo mundu oyo amukolera.

¹⁷ Kandi Rũta mwabũga ati, Omundu oyo mwamba ehĩrengĩ ndatu ehĩ hyʼekisusu kusangwa ambwira ati, Sugende buyira uku nyĩnyĩ-byala wawe.

¹⁸ Neryo mwabũga ati, Uyibombeke aho, mwali wage, erĩhĩka aho wasyaminyira omwatsi ngʼasyabya ati; kusangwa omundu oyo siendiluhuka, ate abuga omwatsi oyo mũnabwĩre.