Rũta 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Rũta akabota omwʼirima lya Boazĩ

¹ Kandi Naomĩ abya na mulamu wuwe, omundu wʼebindu bingi, owʼekĩtũnga kya Elĩmelekĩ: nʼerĩna liwe lyabya Boazĩ.

² Neryo Rũta Omunya Moabũ mwabwira Naomĩ ati, Uleke lino nyiye engero nʼeribota-bota omo makũndĩ wʼengano enyũma wʼoyo wasyanyiganyira. Naye mwamubwira ati, Genda mwali wage.

³ Neryo Rũta mwagenda, mwasa eribotabota, omwʼirima enyũma wʼabagesĩ, ĩsĩasĩ kwʼakahĩka oko luhande lwʼeririma lya Boazĩ, oyo wabya wʼekĩtũnga kya Elĩmelekĩ.

⁴ Neryo lebaya, Boazĩ mwasa akalũa eBetelehemũ, kandi mwabwira abagesĩ ati, Omwami Mukulu abye nenyũ. Nabo mobamũsũbĩrya bati, Omwami Mukulu akutsumule.

⁵ Neryo Boazĩ mwabũga nʼomugombe wuwe, oyo wahĩrawa mo mwĩmanĩrĩ wʼabagesĩ, ati, Oyũ ni mwana-muto wandi kwehĩ?

⁶ Nʼomugombe oyo wahĩrawa mo mwĩmanĩrĩ wʼabagesĩ, mwamũsũbĩrya ati, Ni mwana-muto wʼeMoabũ oyo wasubula haguma na Naomĩ erĩlũa omo kihugo kyʼeMoabũ.

⁷ Kandi amabũga ati, Ngakusaba, taleka nyibotabote enyũma wʼabagesĩ omo katĩkatĩ kʼemiganda. Kwʼasa atya, abirisibaho erĩtsũka omo tũtũtũ erĩhĩka lino, hate katambĩ ako alialinda omo nyũmba.

⁸ Neryo Boazĩ mwabwira Rũta ati, Mwali wage hulikirira. Susyebota-bota omo lindi ririma, kutse sĩgũlũe hano, nĩkwa usibe hano ndeke haguma nʼabanabato bage.

⁹ Ameso wawe abye okwʼirima eryo bakagesa, kandi ukwamebo; sinditahana abalwana, sĩbakũtũleko kwehĩ? Nʼomugulu ũkakwa enyota, uye oko malega, nʼerĩpũlya oko magetsi abalwana balyateha.

¹⁰ Neryo mwawa mwatũlamira oko bũsũ buwe, kandi mũnama erĩhĩka oko kitaka, kandi mwamubwira ati, Busana nakĩ namabana eriganyirwa embere syʼameso wawe, uti ukanyibuka, ĩngye wʼehandi kwehĩ?

¹¹ Na Boazĩ mwamũsũbĩrya mwabũga naye ati, Nabĩrĩkanĩrĩbwa ebyosĩ wakolera nyĩnyĩ-byala wawe enyũma wʼoluholo lwʼĩbawe; kandi ngoko wabĩrĩsĩganĩa tata wawe na koyo wawe, nʼekihugo wabutirawamo, wabĩrĩhĩka oko bandu utabya wasĩ erĩmbere.

¹² Omwami Mukulu akuhembe busana nʼomũbĩrĩ wawe, Omwami Mukulu, Nyamuhanga wa Ĩsraelĩ, akulihe ndeke, uwe wabiribana ahʼerisagira omwisi wʼebĩpũpa biwe.

¹³ Neryo Rũta mwabũga ati, Nyibane olukogo omo meso wawe, omukama wage; kusangwa wabĩrĩnyĩkĩranĩa, nʼerĩbũga ebibuya oko mugombe wawe wʼobũkalĩ, nomo ndane ngʼomuguma wʼoko bagombe bawe bʼobũkalĩ.

¹⁴ Nʼoko ndambĩ yʼerirya Boazĩ mwamubwira ati, Wase hano, ulye oko bundu ũkolaye ekitole kyawe omo biriro. Neryo mwĩkala aho lutambi oko bagesĩ; nabo mobamũhererya engano eyokĩrye, naye mwalya, mũgũta, mwasakya nʼeyindi.

¹⁵ Nʼomugulu ahangana eriyabota, Boazĩ mwategeka abalwana buwe, ati, Muleke abote nibya omo katĩkatĩ kʼemiganda, kandi simumuhayire.

¹⁶ Kandi mũmũlũsĩraye awandi omo miganda, mũsĩgego abotego, kandi simumukunge.

¹⁷ Kwʼabota atya erĩhĩka omwʼĩgolo-golo; neryo mwahũmba ebyo abota, neryo mokyabya nga kĩlo kiguma kyʼekisusu.

¹⁸ Neryo mwahekakyo mwaya omo mũyĩ; kandi nyĩnyĩ-byala wuwe mwalangira ebyo ahũmba. Kandi mwahũlũkya ebyasaka abĩũgũta mwamuhabyo.

¹⁹ Na nyĩnyĩbyala mwamũbũlya ati, Uliabota hahi mũnabwĩre kwehĩ? Kandi uliahingahi kwehĩ? Atsumulawe oyo wakwibuka. Naye mwakangya nyĩnyĩ-byala nga ni ho kwandi aho aliakola omũbĩrĩ, ati, Erĩna lyʼomundu mwenye aho ndyabota mũnabwĩre nĩ Boazĩ.

²⁰ Na Naomi mwabwira mwalyana wuwe ati, Omwami Mukulu atsumulawe, oyutereka erĩkangya obubuya buwe oko baliho nʼoko baholĩ. Kandi Naomĩ mwamubwira ati, Omundu oyo ni wʼekĩtũnga kyetu, ni muguma wʼoko bagala betu.

²¹ Na Rũta wʼeMoabũ mwabũga ati, Ega, ka mwambwira ati, usyebya ukasiba hakũhĩ nʼabalwana bage, erĩhĩka aho basyabugira obugese bwage bosĩ.

²² Kandi Naomĩ mwabũga na Rũta mwalyana wuwe ati, Lyowene, mwali wage, ulendere nʼabana-bato buwe, isibakubana omo lindi ririma.

²³ Kwʼasiba atya hakũhĩ nʼabana-bato ba Boazĩ, eribota-bota oko ndũlĩ yʼerigesa lyʼekisusu nʼerigesa lyʼengano; neryo mwĩkala haguma na nyĩnyĩ-byala wuwe.