Rũta 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩmelekĩ akabungira eMoabũ

¹ Neryo mokyabya omo biro ebyo, omugulu abatswerĩ batabala, mohabya enzala omo kihugo. Omundu muguma wʼeBetelehemũ wʼeYũda mwayabungira omo kihugo kyʼeMoabũ, iye na mũkalĩwe, nʼabagala buwe babiri.

² Erĩna lyʼomundu oyo lyabya, Elĩmelekĩ, nʼerĩna lya mũkalĩwe iyo Naomĩ, nʼamena wʼabagala buwe babiri, Malona na Kĩlĩonĩ, Abaefurata bʼeBetelehemũ wʼeYũda. Kandi mobahĩka omo kihugo kyʼeMoabũ, mobĩkalayo.

³ Neryo Elĩmelekĩ, ĩba wa Naomĩ, mwahola, neryo Naomĩ mwasĩgala nʼabagala buwe babiri.

⁴ Nabo mobatahya oko bakalĩ bʼeMoabũ; erĩna lyʼomuguma lyabya Orũpa, nʼerĩna lyʼogundi, Rũta. Mobĩkalayo nga myaka ĩkũmĩ.

⁵ Na Malona na Kĩlĩonĩ ababiri bosĩ mobahola; litya Naomĩ mwakwĩrwa nʼabana buwe babiri nʼĩba.

Naomĩ na Rũta bakasuba eYũda

⁶ Neryo Naomĩ mwahangana nʼabalĩana buwe, ati akasubula erĩlũa omo kihugo kyʼeMoabũ; kusangwa abya ĩnĩabĩrĩowĩra omo kihugo kyʼeMoabũ, ambu Omwami Mukulu abĩrĩlũngũlĩra abandu buwe nʼerihabo akalyo.

⁷ Neryo mwalũa eyo, nʼabalĩana buwe babiri; mobĩmya enzira erisuba omo kihugo kyʼeYũda.

⁸ Neryo Naomĩ mwabwira abalĩana buwe babiri ati, Mugende, obuli muguma asube omo nyũmba ya koyo wuwe; Omwami Mukulu abakolere ebibuya ngoko mwakolera abahola bʼebibuya, nage nibya.

⁹ Omwami Mukulu abahe eribana eriluhuka, mũkataswatahĩbawa. Neryo Naomĩ mwalyatsirirabo, nabo mobasumba emirenge yabo mobalira.

¹⁰ Mobamubwira bati, Iyihi, nĩkwa tukandisubula haguma nawe oko kĩtũnga kyawe.

¹¹ Neryo Naomĩ mwabũga ati, Musubule, bali bage; busana nakĩ mukasonda erigenda nage kwehĩ? Nginawite abagala omo nda yage abangabya abĩba nywe kwehĩ?

¹² Musubule, bali bage, muyigendere; kusangwa ĩngye indi mukekulu sĩnangaswahĩkĩbwa. Namabũga nyiti ngwite amaha kumbe namabana ĩbage oko kiro kino, nʼeributa abagala;

¹³ mwanganalindabo erĩhĩka okwʼikula kwehĩ? Mwanganalinda butsira abĩba nywe kwehĩ? Iyihi, abali bage; namabakwĩra obũlĩge, kusangwa ebyala byʼOmwami Mukulu byabĩrĩnyagalya.

¹⁴ Nabo mobasumba emirenge yabo mobaswalira. Neryo Orũpa mwalyatsirira nyĩnyĩ-byala; nĩkwa Rũta mwamumakirira.

¹⁵ Neryo Naomĩ mwamubwira ati, Lebaya, mũlĩkyenyũ amabisuba oko bandu buwe, nʼoko nyamuhanga siwe; nawe Usubule ukwame mũlĩkyenyũ.

¹⁶ Neryo Rũta mwabũga ati, Sunyihatikane erĩkũsĩganĩa, nʼerisubula okwʼikukwama; kusangwa aho ukaya, ngandigendaho nʼaho ukandilalirira, ngandilaliriraho; abandu bawe basyabya bandu bage; na Nyamuhanga wawe abye Nyamuhanga wage.

¹⁷ Aho wasyaholera, nage nasyaholeraho, nʼaho nasyatabwa. Omwami Mukulu angole atya na kwilaba aho; oluholo lusa lo lwasyatugaba tunawe.

¹⁸ Nʼomugulu alangira kwʼamahatikana erigenda naye, Naomĩ mũmbya erĩbũga naye.

¹⁹ Neryo ababiri ko bagenda batya erĩhĩka eBetelehemũ. Neryo mokyabya omugulu bahĩka eBetelehemũ, omũyĩ gosĩ mobahũlũngũkanĩa busana nabo, bati, Oyũ nina Naomĩ kwehĩ?

²⁰ Naye mwabwirabo ati, Simunyahule mo Naomĩ, munyahule mo Mara; kusangwa Omũtokĩ Wʼebyosĩ, abiringolera ebĩkalĩhĩre kutsibu.

²¹ Monahongoka inyinawite bingi, nĩkwa abĩrĩnyĩhũlũkya kandi busa; busana nakĩ mukanyahula mo Naomĩ kwehĩ? Omwami Mukulu abirinyibandira oko lĩrwĩ, nʼOmũtokĩ abĩrĩnyagalya.

²² Naomĩ kwʼasubula atya, na Rũta Omunya Moabũ, mwalĩana wuwe haguma naye, oyo wasubula akalũa omo kihugo kyʼeMoabũ. Mobahĩka eBetelehemũ okwʼĩtsũka lyʼerigesa lyʼekisusu.