Omũgambũlĩ 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Abatabalĩ bangakengwa

¹ Omundu wʼamenge nindi kwehĩ? Nʼoyo wasĩ erĩkũmbũla omwatsi nindi kwehĩ? Amenge wʼomundu akakangabasanaya obũsũ buwe, nʼerikala lyʼobũsũ buwe likabinduka.

² Nyiti, Ũtegaye erihana lyʼOmwami busana nʼerĩlahĩrya lya Nyamuhanga.

³ Siwanguhe erĩsĩganĩa omwami, suhatikane omo kindu kibi, kusangwa omwami asyakola ekĩkamũtsemesaya.

⁴ Kusangwa ekĩnywa kyʼOmwami kiwite ehamũlĩ, kandi nindi yo wasyamubwĩra ati, Ukakolakĩ kwehĩ?

⁵ Oyũkategaya erihana lyʼOmwami siendisyaminya obũlĩge, kusangwa omutima wʼamenge akaminyerera omugulu atolere nʼebyo angakola.

⁶ Busana nʼobuli mwatsi hali omugulu atolere nʼenzira yʼerikolago. Omugulu obũlĩge bwʼomundu bũkamũlĩtohera.

⁷ Kusangwa sihali mundu oyo wasĩ ekikandisyabya, kandi nindi wangatoka eritubwira omugulu wakyo?

⁸ Sihali omundu oyuwite ehamũlĩ oko kĩrĩmũ erĩkakĩrya omuka wʼengebe; kutse siawite hamũlĩ oko kiro kyʼoluholo; kandi sihali eribala amalwa; kutse ebibi sĩbyendĩsyalamya oyukakolabyo.

⁹ Nabirilangira ebĩ byosĩ, nʼerĩhĩra omutima wage oko buli mũbĩrĩ owakakoleka eyĩkwa muna-kihugo, aho mundu muguma awite Obũtokĩ endata oko gundi erĩmũhũtalya.

¹⁰ Litya monalangira ababi abakatabawa, kandi ababi mobahĩka omwʼisinda. Kandi mobalũa ahabũyĩrĩre, mobibiriranwa omo mũyĩ. Ekĩ nakyo ni busa.

¹¹ Kusangwa eritswera omũbĩrĩ mubi sĩalĩberererĩbawa lũba, neryo busana nʼekyo emitima yʼabagala bʼabandu yabĩrĩĩkala mubo erikola ebibi.

¹² Nomo mundu mubi angakola ebibi ngendo ĩgana, nʼerĩkanyĩa engebe yiwe, nĩkwa kwenene nyasĩ omwatsi asyowana oko bakubaha Nyamuhanga, abakamukenga.

¹³ Nĩkwa omundu mubi sĩendĩsyowana, kutse sĩendĩsyakanyĩa ebiro biwe, ebiri ngʼekyũtsũtsũ, kusangwa sialyubaha Nyamuhanga.

¹⁴ Hali obusa obukakoleka omo kihugo, ngoko hali abandu batunganene bakabanika omo mwatsi owatolere omũbĩrĩ wʼababi, kandi hali abandu babi abakabanika omo mwatsi owatolere abatunganene, monabũga nyiti ekĩ nakyo ni busa.

¹⁵ Neryo monapipa ebitsange, kusangwa omundu siawite kindi kyowene ekĩlabĩre eyĩkwa muna-kihugo, lye nʼerirya, nʼerĩpũlya, nʼeritsema, kusangwa ekyo kyasyĩkala naye omo mũbĩrĩ wuwe ebiro byosĩ byʼobuyingo buwe ebyo Nyamuhanga abirimuha eyĩkwa muna-kihugo.

¹⁶ Omugulu nahĩra omutima wage eriminya amenge, nʼerilangira omũbĩrĩ owakakoleka omo kihugo nomo mundu siangagotsera omo musibo kutse omo kiro,

¹⁷ neryo monalebya omũbĩrĩ gosĩ wa Nyamuhanga, nyiti omundu siangatoka eriminya omũbĩrĩ owakakoleka eyĩkwa muna-kihugo. Kusangwa omundu nomo angayĩlũhya erisonda-sondago, nĩkwa siendisyabanago. Nomo mundu wʼamenge angabũga ati, Nyĩnasĩ, nĩkwa siendisyatoka eribanago.