Omũgambũlĩ 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Amenge alabĩre obũkĩrũ bwʼebibi

¹ Erĩna libuya lyowene kwilaba amagũta wʼobũgũlĩ bunene. Nʼekiro kyʼoluholo kyowene kwilaba ekiro kyʼeributwa lyʼomundu.

² Eriya omo nyũmba yʼeririra lyowene kwilaba eriya omo nyũmba yʼerirya ĩnene, kusangwa oluholo nĩ ndũlĩ yʼabandu bosĩ, nʼoyuliho angibukago omo mutima wuwe.

³ Obũlĩge bowene kwilaba eriseka, kusangwa omugulu obũsũ buli nʼobũlĩge omutima anganatsema.

⁴ Omutima wʼabʼamenge ali omo nyũmba yʼeririra, nĩkwa emitima yʼabakĩrũ iri omo nyũmba yʼeritsanga.

⁵ Erĩowa erikunga lyʼomundu wʼamenge lyowene kwilaba erĩowa Olwimbo lwʼabakĩrũ.

⁶ Kusangwa ngʼeribalanguka lyʼemisakisaki eyĩkwa wʼenyungu, eriseka lyʼomũkĩrũ ko liri ritya. Ekĩ nakyo ni busa.

⁷ Kwenene erĩnũbya likayira omundu wʼamenge mo mũkĩrũ, nʼekyũtũlĩro kĩkaheraya omutima.

⁸ Endũlĩ yʼomwatsi yowene kwilaba enzũko yago. Eriyibombeka lyʼekĩrĩmũ lyowene kwilaba eriyiheka lyʼekĩrĩmũ.

⁹ Siwanguhe omo kĩrĩmũ kyawe erihitana, kusangwa erihitana lĩkere omo kĩkũba kyʼabakĩrũ.

¹⁰ Sũbũge uti, Ni kyahi ekikaleka ebiro byʼerĩmbere ĩbyowana kwilaba ebiro ebĩ kwehĩ? Kusangwa Sũlĩbũlaya ekĩ nʼamenge.

¹¹ Amenge owene haguma nʼomwandu. Ega, nĩ ndũndĩ busana nʼabo abakalangira eryuba.

¹² Kusangwa amenge nĩ bũteya, ngoko esyofranka nĩ bũteya. Nĩkwa endũndĩ yʼeriminya ni menge awakategaya engebe yʼoyuwiteyo.

¹³ Ũganĩraye omũbĩrĩ wa Nyamuhanga; kusangwa nindi wangatoka erilungula ekyo abĩrĩhengemya kwehĩ?

¹⁴ Utseme omo kiro kyʼomũyĩsa, nʼomo kiro kyʼobũlĩge ũganĩraye. Nyamuhanga abĩrĩhĩra ekiguma haguma nʼekindi, omundu siatoke eriminya ekindu ekikandisyabya enyũma kwiye.

¹⁵ Nabirilangira ebĩ byosĩ omo biro byage byo busa: hali omundu oyutunganene oyukahera omo litunganene riwe, kandi hali omundu mubi oyũkakanyaya obuyingo buwe omwʼikola nabi riwe.

¹⁶ Subye mutunganene kutsibu, kutse sĩgũkanyaye amenge wawe kwilaba. Busana nakĩ ũkayĩheraya kwehĩ?

¹⁷ Subye mubi kwilaba, kutse subye mũkĩrũ. Busana nakĩ wangahola embere syʼomugulu wawe kwehĩ?

¹⁸ Lyowene iwahamba omwatsi muguma, kandi sũlwĩke ekindi, kusangwa oyukubaha Nyamuhanga akahuluka nʼebyosĩ bibiri.

¹⁹ Amenge ni maka oko mundu wʼamenge kwilaba abatabalĩ ĩkũmĩ abali omo mũyĩ.

²⁰ Kwenene sihali mundu utunganene muna-kihugo, oyukakola ebibuya emigulu yosĩ ĩsĩalĩhalaya.

²¹ Nibya Sũlĩge ebĩnywa byosĩ ebĩkabũgawa, ũkasyowa omugombe wawe akakutsuma.

²² Kusangwa engendo nyingi omutima wawe anasĩ ko wabiritsuma abandi nibya.

²³ Nabirirenga ebyosĩ ebĩ nʼamenge. Monabũga nyiti, Nasyabya wʼamenge; nĩkwa abya hali kwĩngye.

²⁴ Ekyabiribyaho ekiri hali, nĩ rĩkũmbo kutsibu. Nindi wangabanakyo kwehĩ?

²⁵ Monahĩra, obũlengekanĩa bwage okwʼiminya nʼokwʼĩsondya, nʼerirya-burondo amenge nʼenzumwa nʼeriminya ebibi byʼobũkĩrũ, kandi obũkĩrũ nĩ ʼsĩre.

²⁶ Kandi monabana ekĩkalĩhĩre kwilaba oluholo, yo mũkalĩ ogʼomutima wʼebitego nʼamataha-taha, nʼebyala biwe ni mahulula. Oyũkatsemesaya Nyamuhanga asyamubalako; nĩkwa owʼamalolo asyagobwa naye.

²⁷ Lebaya, Omũgambũlĩ akabũga ati, Nabiribana ekĩ, eritomeka omwatsi oko gundi, eribana erĩkũmbũla.

²⁸ Eryo ekĩrĩmũ kyage kĩkĩnasondaya, nĩkwa sinditabanalyo. Omo elfu nguma namabana mundu muguma; nĩkwa omo bosĩ abo sinditabana nʼomũkalĩ muguma.

²⁹ Lebaya, namabana ekĩ ĩkyokyene: nyiti Nyamuhanga mwahangika abandu batunganene; nĩkwa mobasondya ebĩhĩmbano bingi.