Omũgambũlĩ 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebindu biteribawa ni busa

¹ Hali ekibi ekyo nabirilangira eyĩkwa muna-kihugo, nakyo kikabanika omo katĩkatĩ kʼabandu:

² Omundu oyukahabawa ebindu, nʼobuteke, nʼerĩsĩkĩbwa na Nyamuhanga, isialibula kindu kyahi busana nʼekĩrĩmũ kiwe omo byosĩ ebyo akasonda, nĩkwa Nyamuhanga sialitamuha Obũtokĩ bwʼerirya kubyo, nĩkwa owʼehandi akalyabyo. Ekĩ ni busa, kandi ni ndwala nyibi.

³ Omundu amabuta abana erĩgana, nʼeribyaho emyaka mingi, neryo ebiro byʼemyaka yiwe bikabya bingi, nĩkwa ekĩrĩmũ kiwe sĩkyũgũta oko myatsi mibuya, kandi isiawite eritabwa ndeke, ngabũga nyiti, erĩtesĩbwa lyʼomwana amabutwa iniabirihola lyowene kwilaba iye.

⁴ Kusangwa omwana oyo akabutawa busa, nʼakandi akaya omo mwĩrĩmya, nʼerĩna liwe likibiriranawa omo mwĩrĩmya.

⁵ Kandi sialitalangira eryuba na kera kutse eriminya kindu, oyũ owene kwilaba omundu oyo.

⁶ Ega, nomo mundu oyo angakota emyaka elfu nguma engendo ĩbĩrĩ, nĩkwa sialitsemera emyatsi mibuya, abosĩ sibegenda omo mwanya muguma kwehĩ?

⁷ Emĩbĩrĩ yosĩ yʼomundu ni busana nʼeribana ekindu kyʼerirya, nĩkwa amerũ sĩalyũgũta.

⁸ Kusangwa owʼamenge amabana ndũndĩ yahi kwilaba omũkĩrũ kwehĩ? Kutse omundu mwera akagasakĩ oyo wasĩ erigenda embere syʼabandu baliho kwehĩ?

⁹ Erilangira omo meso lĩlabĩre eriganga-ganga lyʼengumbu. Ekĩ nakyo ni kya busa nʼerikwamirira erihunga.

¹⁰ Ekĩndũkĩ ekyabiribya, erĩna lyakyo lyahulawa kera. Kandi kyabiriminyikala ngoko mundu ali, kusangwa siangatoka erinegena nʼoyũmũlengĩre nʼamaka.

¹¹ Kusangwa hali ebĩnywa bingi ebikakanyirira busa. Neryo omundu amabana endũndĩ yahi kwehĩ?

¹² Kusangwa nindi wasĩ ekibuya busana nʼomundu omugulu akineho, omo biro bike byʼeribyaho liwe lya busa kwehĩ? Asyabugabyo ngʼekyũtũtũ. Kusangwa nindi wangatoka eribwira omundu ekikandisyabyaho abihola eyĩkwa muna-kihugo kwehĩ?