Omũgambũlĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Hali emigulu yʼemyatsi yosĩ

¹ Kusangwa hali ekirimo busana nʼobuli kindu, nʼomugulu busana nʼobuli mwatsi eyĩkwa oko bũtũkũ—

² Omugulu wʼeributa, nʼomugulu wʼerihola. Omugulu wʼeribiba, nʼomugulu wʼerihulula ekyabibawa.

³ Omugulu wʼerĩĩta, nʼomugulu wʼerĩlamya. Omugulu wʼerĩhĩmbũla, nʼomugulu wʼerĩhĩmba.

⁴ Omugulu wʼerĩtogongya emĩsonĩa, nʼomugulu wʼeriseka. Omugulu wʼeririra, nʼomugulu wʼerisata.

⁵ Omugulu wʼerigusa amabwe, nʼomugulu wʼerikuma-kuma amabwe. Omugulu wʼerĩkũmbatana, nʼomugulu wʼerireka erĩkũmbatana.

⁶ Omugulu wʼerĩsonda-sondya, nʼomugulu wʼerĩtalya. Omugulu wʼeribika, nʼomugulu wʼerigusa.

⁷ Omugulu wʼerĩsatangya, nʼomugulu wʼerilanda. Omugulu wʼeribya bũkũtũ, nʼomugulu wʼerĩbũga.

⁸ Omugulu wʼerianza, nʼomugulu wʼerĩkwa obusu. Omugulu wʼerilwa, nʼomugulu wʼobuholo.

⁹ Oyukakola awite ndũndĩ yahi omo ekyo akakola kwehĩ?

¹⁰ Nabirilangira emĩbĩrĩ eyo Nyamuhanga abiriha abagala bʼabandu bakole muyo.

¹¹ Abĩrĩhĩra obuli kindu kibuya oko mugulu wakyo. Kandi abĩrĩhĩra erikota omo mutima wabo, neryo bine bitya omundu siatoke eriminya omũbĩrĩ ogo Nyamuhanga abirikola erĩtsũka oko nzũko nʼerĩhĩka oko ndũlĩ.

¹² Nyĩnasĩ sihali kindu kibuya busana nʼomundu kwilaba eritsema, nʼerikola ebibuya omugulu akiriho.

¹³ Kandi obuli mundu alye nʼerĩpũlya, nʼeritsemera ebibuya omo mĩbĩrĩ yiwe yosĩ. Nĩ lũsũnzo lwa Nyamuhanga.

¹⁴ Nyĩnasĩ ekĩndũkĩ Nyamuhanga akakola kyasyakota. Sihali kindu kyangaswatomekwako, kutse erĩkehya kukyo. Na Nyamuhanga abirikolakyo, abandu bubahe embere siwe.

¹⁵ Ekiri kyabiribya kera-kera; nʼekikandisyabya kyanabya embere, na Nyamuhanga akasondaya ekyabirilaba.

¹⁶ Kandi nabĩrĩrebya omo kihugo kino, ebibi biri omo mwanya wʼerĩbanza lyʼekwenene, kandi omo mwanya wʼeritunganene hali ebibi.

¹⁷ Monayibwira omo mutima wage, nyiti, Nyamuhanga asyatswera abandu batunganene nʼabandu babi, kusangwa hali omugulu busana nʼobuli ĩsũnzĩkanĩa nʼobuli mũbĩrĩ.

¹⁸ Monayibwira omo mutima wage, nyiti, Ni busana nʼabagala bʼabandu, Nyamuhanga abirirenga bandu, batoke erĩrebya ko bali ngʼesyonyama.

¹⁹ Kusangwa ekĩkahĩka oko bagala bʼabandu nʼekĩkahĩka oko syonyama ni kiguma. Ngoko muguma akahola, litya eyindi ikahola. Ega, abosĩ bawite omuka muguma nʼomundu siawite ekyo alabĩrye esyonyama, kusangwa ebyosĩ ni busa.

²⁰ Abosĩ bakaya haguma. Abosĩ balũa omo lũtũtũ, nʼabosĩ bakahinduka mo lũtũtũ kandi.

²¹ Nindi wasĩ ekĩrĩmũ kyʼabandu ko kĩkalolaya endata, nʼomuka wʼenyama ngʼakandagalira oko kihugo kwehĩ?

²² Kandi nabĩrĩrebya ko hate kindu kibuya, kwilaba omundu eritsemera emĩbĩrĩ yiwe, kusangwa ekyo nĩ ʼgabo liwe. Kusangwa nindi wasyamuleta erilangira ekikandisyabya enyũma kwiye kwehĩ?