Omũgambũlĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Obutseme nʼebindu ati ni busa

¹ Monayibwira nyiti, Wase lino, ngandikulengako omo bitsange. Neryo ũyĩtsemesaye. Kandi lebaya, ebĩ nabyo byabya buyira nibya.

² Monahula eriseka nyiti, Nĩ ʼsĩre; kandi ni byʼobutseme, Bikakolakĩ kwehĩ?

³ Monasonda-sonda omo mutima wage ngoko nangatsemesya omubiri wage omo bĩnyũ, omutima wage iniakanyisondola omo menge, ngoko nangahambana nʼobũkĩrũ, erĩhĩka aho nangatokera erilangirira ebibuya busana nʼabagala bʼabandu erikola eyĩkwa munakihugo omo biro bike byʼobuyingo bwabo.

⁴ Monayikolera emĩbĩrĩ minene. Monayĩhĩmbĩra amanyũmba. Monayiherera amalima wʼebĩnyũ.

⁵ Monayirimira amalima, nʼamalima wʼamasoyo, kandi monahera mwʼemiti yʼemĩsĩndo yosĩ yʼebĩgũma.

⁶ Monayitakulira ebitsinga byʼamagetsi wʼerĩhĩra omo mũsĩtũ wʼemiti eyikalasa.

⁷ Monagula abagombe bʼobulume nʼabagombe bʼobũkalĩ, inyinawite abagombe, ababutawa omo nyũmba yage. Kandi monabya nʼobũsokĩ bunene bwʼebihangulo nʼebĩhyo binene binene kwilaba abosĩ ababya eYerũsalema embere syage.

⁸ Monayikuma-kumira ebĩtsĩpa nʼesyamagetsi, nʼobũsokĩ bwʼabami nʼobwʼebihugo. Monayibanira abĩmbĩ bʼobulume nʼabĩmbĩ bʼobũkalĩ, nʼobutseme bwʼabagala bʼabandu, ba bahwekĩ bangi.

⁹ Litya nabya mukulu nʼerikanyirira kwilaba abosĩ ababya embere syage eYerũsalema. Amenge wage nibya mwabya haguma nage.

¹⁰ Nʼebindu byosĩ ebyo ameso wage asonda mondĩma byogo. Mondakakĩrya omutima wage oko butseme kutse bwahi. Kusangwa omutima wage mwatsema busana nʼemĩbĩrĩ yage yosĩ. Nʼeyĩ yabya luhembo lwage busana nʼomũbĩrĩ wage gosĩ.

¹¹ Neryo monalebya emĩbĩrĩ yage yosĩ eyo ebyala byage byakola, nʼemikolere eyo nayĩlũhayamo erikola, nĩkwa lebaya, ebyosĩ byabya busa nʼerikwamirira erihunga, kandi isihali ndũndĩ eyĩkwa muna-kihugo.

¹² Neryo monayibindula erĩrebya amenge, nʼerĩsĩre, nʼobũkĩrũ. Kusangwa omundu oyũkahĩka enyũma wʼOmwami angatoka erikolakĩ kwehĩ? Kye nʼekyo kyakolawa kera.

¹³ Neryo monalangira amenge kwʼalabĩre obũkĩrũ, ngoko ekyakakala kĩlabĩre omwĩrĩmya.

¹⁴ Ameso wʼomundu wʼamenge ali omo mutwe wuwe, nĩkwa omũkĩrũ akalendera omo mwĩrĩmya. Nĩkwa nyĩnasĩ ko mwatsi muguma akahĩka oko bosĩ.

¹⁵ Neryo monayibwira omo mutima wage nyiti, Ngoko kĩkahĩka oko mũkĩrũ, ko bĩkandĩsyambĩkako bitya. Busana nakĩ monabya nʼamenge kwilaba kwehĩ? Neryo monayibwira omo mutima wage nyiti, Ekĩ nakyo ni busa.

¹⁶ Kusangwa busana nʼomundu wʼamenge nʼomũkĩrũ nibya, sihali ebĩbũkyo busana nʼebiro bingi, kusangwa oko biro ebikandisyasa abosĩ basyibiriranwa. Kandi ngoko mundu wʼamenge nʼomũkĩrũ bakahola abosĩ babiri!

¹⁷ Kyaleka ĩnakwa obuyingo bwage bwʼekĩnĩga, kusangwa omũbĩrĩ owakakolawa eyĩkwa muna-kihugo abya obũlĩge ũkwʼĩngye, kusangwa ebyosĩ ni busa nʼerikwamirira erihunga.

¹⁸ Neryo monakwa omũbĩrĩ wage gosĩ ogo nakola gʼobusu; ogo nakola eyĩkwa muna-kihugo, kusangwa litolere ĩnasĩgĩrago ogundi mundu oyukandisyabya enyũma kwĩngye.

¹⁹ Kandi nindi oyo wasĩ ngʼasyabya mundu wʼamenge kutse mũkĩrũ kwehĩ? Nĩkwa asyatabala oko mũbĩrĩ wage gosĩ ogo nabirikola, iniakalendera nʼamenge eyĩkwa muna-kihugo! Ekĩ nakyo ni busa.

²⁰ Busana nʼekyo monabinduka erĩtwa amaha wʼomutima wage busana nʼomũbĩrĩ gosĩ ogo nakola eyĩkwa muna-kihugo.

²¹ Omugulu hali omundu oyukakola nʼamenge, nʼeriminya, nʼobunyima. Neryo akaha erĩgabo liwe oko mundu oyutakola haguma nabo. Ekĩ nakyo ni busa, kandi ni kibi kinene.

²² Kusangwa omundu akabanakĩ busana nʼomũbĩrĩ wuwe gosĩ, nʼoko ndũhĩ yiwe yʼomutima, ebyo akakola eyĩkwa muna-kihugo kwehĩ?

²³ Kusangwa ebyosĩ akakola omo biro biwe byosĩ nina bũlĩge, nʼeriluma lyʼomutima. Ega, nʼomo kiro nibya omutima wuwe sialiluhuka. Ekĩ nibya ni busa.

²⁴ Busana nʼomundu sihali ekibuya ekĩlabĩre erirya nʼerĩpũlya, nʼeriyibwira ati omũbĩrĩ wuwe ni mubuya. Ekĩ nakyo monalebya kĩkalũa omo byala bya Nyamuhanga.

²⁵ Kusangwa nindi yo wangatoka erirya, kutse nindi yo wangatoka eribya nʼobutseme bite bya Nyamuhanga kwehĩ?

²⁶ Kusangwa Nyamuhanga akaha omundu oyuli mubuya omo meso wuwe amenge, nʼeriminya, nʼobutseme. Nĩkwa akaha omukola-nabi yʼomũbĩrĩ, wʼerĩhĩndanĩa nʼerikuma-kumira haguma, iniatoka eriha omundu oyuli mubuya omo meso wa Nyamuhanga. Ekĩ nakyo ni busa nʼerikwamirira erihunga.