Omũgambũlĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebindu byosĩ byʼomo kihugo ni bya busa

¹ Ebĩnywa byʼOmũgambũlĩ omugala wʼOmwami Dawĩdĩ, eYerũsalema.

² Ebyosĩ ni bya busa, Omũgambũlĩ akabũga. Ebyosĩ ni bya busa! Ebyosĩ ni busa.

³ Omundu akagasa wahi oko mũbĩrĩ wuwe gosĩ ogo akakola eyĩkwa oko lyuba kwehĩ?

⁴ Olulengo luguma lukalaba, nʼolundi lulengo ilwasa, nĩkwa ekihugo kikakota.

⁵ Eryuba likahuluka nibya, nʼeryuba likalenga, likanguha eriya aho walyo, aho iryaswahuluka.

⁶ Erihunga likalola elutambi lwʼeyĩkwa, nʼeribinduka erĩlolya elutambi lwʼendata. Likabinduka-binduka emigulu yosĩ omo lugendo lwalyo, kandi rikasubula omwʼĩtĩmba-tĩmba lyalyo.

⁷ Esyonyũsĩ syosĩ Sikaya omo ngetsi, nĩkwa engetsi sĩyĩryũsũla. Aho esyonyũsĩ Sikaya, aho ho sikasuba.

⁸ Ebindu byosĩ bĩkalũhaya, omundu siangatoka erĩtũlago. Erĩso sĩryũgũta okwʼilangira, kutse okũtũ erĩũgũta okwʼowa.

⁹ Ekyabiribya kye nʼekyo kyasyabya, nʼekyabirikolwa kye nʼekyo kyasyakolwa kandi sihali kindi kihya-kihya eyĩkwa muna-kihugo.

¹⁰ Hali kindi ekyangahulwa, kiti, Lebaya, ekĩ ni kihya-kihya kwehĩ? Mokyabya kera-kera, oko migulu eyabya embere syetu.

¹¹ Sihali ekĩbũkyo kyʼemyatsi yʼerĩmbere, kandi sihendisyabya ekĩbũkyo kyʼemyatsi yʼenyũma eyikandisyasa, oko bakandisyasa erĩnyũma.

Emyatsi yʼOmũgambũlĩ

¹² Ĩngye Mũgambũlĩ, nabya mwami oko Ĩsraelĩ eYerũsalema.

¹³ Monahĩra omutima wage okwʼĩsondya nʼerisoma emyatsi yosĩ ikakolawa eyĩkwa muna-kihugo. Nyamuhanga abiriha abagala bʼabandu omũbĩrĩ akalĩre.

¹⁴ Nabirilangira emĩbĩrĩ yosĩ eyikakoleka muna-kihugo. Neryo lebaya, ebyosĩ ni busa nʼerikwamirira erihunga.

¹⁵ Ekĩhengemĩre sikyangatoka erilungulwa, nʼekikabula sikyangaganzwa.

¹⁶ Monayibwira, nyiti, Lebaya, nabĩrĩhamya nʼerĩkanyĩrĩrya amenge kwilaba bosĩ ababya bakulu eYerũsalema embere syage. Ega, omutima wage abiribana amenge nʼeriminya binene.

¹⁷ Kandi nabĩrĩhĩra omutima wage okwʼiminya amenge, nʼeriminya erĩsĩre nʼobũkĩrũ. Monalebya kwʼebĩ nabyo ni ʼkwamirira erihunga.

¹⁸ Kusangwa omo menge manene muli obũlĩge bunene, nʼoyũkakanyaya amenge akakanyaya obwagalĩ.