Olwimbo lwʼEsyonyimbo 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Obubuya bwʼomũherũkĩ

¹ Lebaya omwanze wage, uli mubuya, Lebaya uli mubuya! Ameso wawe ali ngʼehĩrĩkũkũ enyũma oko lukimba lwawe lwʼobũsũ. Esyonzwiri syawe siri ngʼekihangulo kyʼesyombene, Esikagotsera oko bulambo bwʼekitwa kyʼeGĩleadĩ.

² Ameno wawe ali ngʼekĩhyo kyʼesyombũlĩ syʼobũkalĩ ekyabĩrĩtũbwa kʼobweya, Esĩkalũa omo kinabiro. Esyosĩ sĩbũtĩre bibiri bibiri, Isihali eyabĩrĩkũsya omo katĩkatĩ kasyo.

Obubuya bwʼomũherũkĩ

³ Emĩnywa yawe iri ngʼomũlĩkĩ wʼengula, Nʼobuno bwawe ni bubuya. Omũtyana wawe ali ngʼeluhande lwʼekomamanga Enyũma wʼolukimba lwawe lwʼobũsũ.

⁴ Ebĩkya byawe bĩsũngũlĩkĩre ngʼenyũmba nyiri-nyiri ya Dawĩdĩ Eyĩhĩmbĩre omo milondo yʼamabwe. Omukahanikawa esyongabo elfu guma, Esyongabo esĩrengĩre esyosĩ syʼesyombangĩ.

⁵ Amabere wawe abiri ali ngʼebyana bibiri Byʼengabi, ĩbĩbũtĩrwe haguma, Ebikalira omo butsibira.

⁶ Erĩhĩka okwʼikya lyʼekiro, Nʼebyũtsũtsũ bikatibita, Ngandiya oko kitwa kyʼobukwa, Nʼoko kitwa kyʼamane-mane.

⁷ Omwanze wage, uli mubuya. Isihali kĩtĩngũ ukʼuwe.

⁸ Omũherũkĩ wage, wase haguma nage erĩlũa eLebanonĩ, Erĩlũa eLebanonĩ haguma nage. Ũkĩme erĩlũa oko singi yʼeAmana, Erĩlũa oko singi yʼeSenĩrĩ nʼeHermonĩ, Erĩlũa oko bibuti byʼesyondale, Erĩlũa oko bitwa byʼesyosoro.

⁹ Omũherũkĩ wage, mwali wetu, Wabĩrĩtsemesya omutima wage, Wabĩrĩtsemesya omutima wage omo milolere yʼameso wawe, Omo kahulula kaguma kʼebĩkya byawe.

¹⁰ Omũherũkĩ wage, mwali wetu, olwanzo lwawe ni lubuya! Olwanzo lwawe ni lubuya kwilaba ebĩnyũ! Nʼerikumba ndeke lyʼamagũta wawe Kwilaba obukwa bosĩ!

¹¹ Uwe mũherũkĩ wage, emĩnywa yawe ĩkatogongaya omusonge. Obuki nʼamasabũ biri omwisi wʼolulimi lwawe. Nʼerikumba ndeke lyʼesyongimba syawe liri ngʼerikumba lyʼeLebanonĩ.

Obubuya bwʼomũherũkĩ

¹² Mwali wetu Omũherũkĩ wage, ni ʼrima erĩbogĩre, Eririma lyʼamabwe erĩbogĩre, engũnũnũko eyĩbogĩre.

¹³ Emitahi yawe ni ʼrima lyʼamakomamanga, Haguma nʼebĩgũma byowene ebyayisogawa, Emihina nʼebiti byʼenardo,

¹⁴ Enardo na safaranĩ, Mũchaĩ na mũdalasĩnĩ haguma nʼemiti yʼamane-mane, Obukwa nʼeũũdĩ haguma nʼemĩsĩndo yosĩ yʼobukwa bowene.

¹⁵ Uli ngũnũnũko yʼamalima, Ekitsinga kyʼamagetsi mahya-mahya, Nʼesyonyũsĩ esikasenda sĩkalũa eLebanonĩ.

¹⁶ Uwe erihunga lyʼelutambi lwʼendata, ubuke, Nawe erihunga lyʼolutambi lwʼeyĩkwa, wase! Ubuhirire eririma lyage, lĩhũlũkaye ebikakumba ndeke, Obukwa bwalyo butoke erihuluka. Omwanze wage ase omo lirima liwe, Alye ebĩgũma biwe byowenenga, ebyayisogawa.