Olwimbo lwʼEsyonyimbo 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkanĩa lyʼomwanze

¹ Ĩngye indi omusanga wʼeSaronĩ, Omusanga wʼobutsibira bwʼemisya.

² Ngʼomusanga wʼobutsibira omo katĩkatĩ kʼemisakisaki, Omwanze wage kwʼali atya omo katĩkatĩ kʼabali bʼobũkalĩ.

³ Ngʼetofala omo miti yʼomũsĩtũ, Omwanze wage kwʼali atya omo katĩkatĩ kʼabalwana. Monatsema erĩĩkala omo kyũtsũtsũ kiwe, Nʼebĩgũma biwe mobyasiha erĩgeryabyo.

⁴ Mwanyireta omo nyũmba yʼeririramo, Nʼebendera yiwe endata kwĩngye, lo lwanzo.

⁵ Ũnyĩgemeraye omo hitole hyʼebĩnyũ, Ũnyĩtsemesaye na tofala. Kusangwa olwanzo lũkambolaya.

⁶ Ebyala biwe byʼamalembe bibye omwisi wʼomutwe wage, Nʼebyala biwe byʼamali binyihambe.

⁷ Ngabahana, ĩnywe bali bʼeYerũsalema, Busana nʼesyongabi, kutse busana nʼesyongabi syʼobulume esyʼomolĩ, Sĩmũtũle kutse erĩbũkya omwanze wage, Ate asonda.

⁸ Muhulikirire omwanze wage! Lebaya akasa, Ĩnĩakatwa ebika oko bitwa, Nʼeriyitsangurira oko hitwa.

⁹ Omwanze wage ali ngʼengabi, kutse embaya ndere. Lebaya, imene enyũma wʼolũhĩmbo lwetu, Akaleberaya omo lĩdĩrĩsa, Akasamalira omo katĩkatĩ kʼebisayi.

¹⁰ Omwanze wage mwabũga mwambwira ati, Hangana, omwanze wage, omubuya wage, wase.

¹¹ Kusangwa, lebaya, omugulu wʼeritsuku abirilaba, Embũla yabirigenda, yabirikya, yabirigenda.

¹² Omusanga abirihuluka oko kitaka; Omugulu wʼeriimba lyʼesyonyonyũ abĩrĩhĩka, Nʼomulenge wʼakalĩkũkũ akogũbawa omo kihugo kyetu.

¹³ Omuti wʼomũtĩnĩ akeraya amakũke wago mabisi, Nʼemĩrĩkĩ yʼebĩnyũ ikaleta omusanga eyikakumba ndeke. Hangana, uwe mwanze wage, Mubuya wage, wase.

¹⁴ Uwe kalĩkũkũ kage, akali omo mugenyo wʼerĩbwe, Ũkayĩbĩsa ahakumbagere kutsibu, Uleke nyilangire erisosa lyawe, Nyowe omulenge wawe. Kusangwa omulenge wawe asĩhĩre, Nʼerisosa lyawe ni ribuya.

Erĩkanĩa lyʼomwanze

¹⁵ Mutuhambire esyoboha, ehiboha, Ehĩkatsandaya amalima wʼebĩnyũ, Kusangwa amalima wetu wʼebĩnyũ alimuleta omusanga.

¹⁶ Omwanze wage ni wage, nage indi wuwe. Akalĩsaya ekĩhyo kiwe omo katĩkatĩ kʼebiranga-ranga.

¹⁷ Erĩhĩka okwʼikya lyʼekiro, nʼebyũtsũtsũ bikatibita, Omwanze wage Ũbũnũkale, ubye ngʼengabi, Kutse esyombaya ndere esiri oko bitwa byʼeBetelĩ.