Obadĩa 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyonzolĩ sya Obadĩa

¹ Omukama, Omwami Mukulu akabũga busana na Edomũ ati, Twabĩrĩowa engulu ĩkalũa oko Mwami Mukulu, nʼomukwenda abiritumwa omo katĩkatĩ kʼebihanda, ati, Muhangane, netu tuyalwe naye.

² Lebaya, nasyakuyira mo muke omo katĩkatĩ kʼebihanda; wabiriponwa kutsibu.

³ Eriyipipa lyʼomutima wawe lyabirikuteba, uwe wĩkere omo migenyo yʼamabwe endata eyo wĩkere; oyũkabũga omo mutima wuwe ati, Nindi wanganyĩkĩmĩrya ahisi oko kitaka kwehĩ?

⁴ Omwami Mukulu ati, Nomo wangalengera endata ngʼerĩsamba, kandi nomo lutu lwawe lwangahĩrwa omo katĩkatĩ kʼesyongũnũnũ, nasyakũkĩmya erĩlũayo.

⁵ Abarahĩ bamakũhĩkako, nʼabanyeyĩ bamakũhĩkako omo kiro, wamahwerekerera uti! Sĩbangĩba erĩhĩka aho bangũgũtĩra kwehĩ? Abakoha ebĩnyũ bamakũhĩkako sĩbangasĩga amahũmbĩra wʼebĩnyũ kwehĩ?

⁶ Lebaya kwʼebindu bya Esaũ byasyahũngwa biti! Obũsokĩ buwe obũbĩsĩrwe bũkasondĩbawa buti!

⁷ Abandu bosĩ bʼembĩta yawe basyakutsindika oko mutano, nʼabandu ababya nʼobuholo nawe basyakuteba, kandi basyakũsĩnga. Abakalya obundu bwawe basyahĩra ekĩrĩmbyo busana nawe. Sihali eriminya omwisi siwe.

⁸ Omwami Mukulu ati, Oko kiro ekyo sĩndĩendĩsyaherya abandu abʼamenge erĩlũa eEdomũ, kutse erĩlũsya obowĩka oko kitwa kya Esaũ kwehĩ?

⁹ Uwe Temanĩ, esyombangĩ syawe syasyasweka, obuli muguma atoke erihwerekerera erĩlũa oko kitwa kya Esaũ busana nʼerĩĩtwa.

¹⁰ Busana nʼobutsibu bwakolawa oko mugala wenyũ Yakobo, esĩsonĩ syasyakuswika, kandi wasyahwerekererĩbwa kera na kera.

¹¹ Oko kiro ekyo wahangana oko lundi luhande, nʼoko kiro ekyo abʼehandi bahũnga obũsoki buwe, nʼabʼehandi bingira omo syongyo siwe, nʼerigusa akawira oko Yerũsalema, nawe nibya wabya ngʼomuguma wa kubo.

¹² Nĩkwa Susamalire nʼobutseme ekiro kyʼomugala wenyũ, kyo kiro kyʼobũlĩge buwe; kandi Sutseme busana nʼabana ba Yũda oko kiro kyʼerĩherĩbwa lyabo; kutse sũbũge nʼeriyipipa oko kiro kyʼobũlĩge bwabo.

¹³ Siwingire omo lũkyo lwʼabandu bage oko kiro kyʼerĩkwa lyabo, ega, Susamalire amalĩge wabo nʼobutseme oko kiro kyʼerihera lyabo, kutse Sũhũnge obũsokĩ bwabo oko kiro kyʼerihera lyabo.

¹⁴ Kandi suhangane omo mahwa wʼenzira, erĩhwerekererya abahũnĩ babo; kutse Sũhĩre omo mũlĩkĩ abakabala omo kiro kyabo kyʼobũlĩge.

¹⁵ Kusangwa ekiro kyʼOmwami Mukulu kiri hakũhĩ busana nʼebihanda byosĩ; ngoko wabirikola ko kyasyakolwa kitya ukʼuwe. Eririha lyawe lyasyasuba oko mutwe wawe.

¹⁶ Kusangwa ngoko Wabĩrĩpũlya oko kitwa kyage kĩbũyĩrĩre, litya ebihanda byosĩ byasyapũlya emigulu yosĩ. Ega, basyapũlya, basyamera, basyabya nga sibabya.

¹⁷ Nĩkwa omo kitwa kyʼeSĩonĩ hasyabya abakabala, nakyo kyasyabya kĩbũyĩrĩre; nʼekĩtũnga kya Yakobo kyasyasĩgalya ebindu byabo.

¹⁸ Nʼekĩtũnga kya Yakobo kyasyabya muliro, nʼekĩtũnga kya Yosefũ ekirimi kyʼomuliro, nĩkwa ekĩtũnga kya Esaũ kyasyabya esyombũmba, nabo basyahĩra omuliro go kubo nʼeribugabo. Kandi omo kĩtũnga kya Esaũ sihendisyabya oyukabala kubo, kusangwa Omwami Mukulu abĩrĩbũgakyo.

¹⁹ Nʼabʼelutambi lwʼeyĩkwa basyasĩgalya ekitwa kya Esaũ, nʼabʼekihugo kyʼehitwa basyasĩgalya obwerere bwʼAbafĩlĩstĩnĩ; kandi basyasĩgalya olubibi lwa Efũraĩmũ, nʼolubibi lwʼeSamarĩa; na Benyamĩna asyasĩgalya eGĩleadĩ.

²⁰ Nʼabahũngawa bʼomulondo oyũ owʼabana ba Ĩsraelĩ, abali omo katĩkatĩ kʼAbakanana, erĩhĩka eZarefatĩ; nʼabahũngawa bʼeYerũsalema, abali eSefaradĩ basyasĩgalya emĩyĩ yʼelutambi lwʼeyĩkwa.

²¹ Nʼabakalamaya basyahetukira oko kitwa eSĩonĩ eritswera ekitwa kya Esaũ; nʼobwami bwasyabya bwʼOmwami Mukulu.