Nehemĩa 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Eribikula lyʼabandu nʼerisiba butalya

¹ Neryo oko kiro kyʼamakũmĩ abiri nʼebini kyʼomukera oyo, abana ba Ĩsraelĩ babya ĩbamabĩhĩndana nʼeritsira akalyo, nʼeriambala emisarandwe, nʼerĩhĩra omutaka gʼoko mitwe yabo.

² Neryo abana ba Ĩsraelĩ mobayisolola oko bosĩ bʼehandi, nʼerihangana nʼeribikula amalolo wabo, nʼebibi byʼabotata wabo.

³ Neryo mobahangana aho wabo, mobasoma omo kitabu kyʼemigambo yʼOmwami Mukulu Nyamuhanga wabo omo mbindi nguma yʼomo bini yʼomusibo; nʼembindi nguma yʼomo bini mobabikula nʼerĩramya Omwami Mukulu Nyamuhanga wabo.

⁴ Neryo mobahangana oko bisambiro byʼAbalawĩ, ye Yesũa, na Banĩ, na Kadĩmĩelĩ, na Sebanĩa, na Bũnĩ, na Serebĩa, na Banĩ, na Kenanĩ, mobalira oko Mwami Mukulu Nyamuhanga wabo nʼomulenge munene.

⁵ Neryo Abalawĩ, ye Yesũa, na Kadĩmĩelĩ, na Banĩ, na Hasa-bĩneya, na Serebaya, na Hodĩa, na Sebanĩa, na Petahĩa, bati, Muhangane mũhamaye Omwami Mukulu, Nyamuhanga wenyũ kera na kera nʼerĩhĩka kera na kera! Nʼerĩna liwe lyʼolukengerwa lĩhahamĩsĩbawe erĩhahamĩsĩbwa kwilaba omũyĩsa gosĩ nʼeripipwa lyosĩ!

⁶ Uli Mwami Mukulu uwe ĩgowene; mowahangika olubula, obũtũkũ bwʼamatũkũ, haguma nʼemilondo yosĩ yago, ekihugo, nʼebindu byosĩ ko biriko, esyongetsi nʼebyosĩ ko biri musyo, nawe ukaleka ebyosĩ ibyabyaho; nʼemilondo yosĩ yʼelubula ĩkakũramaya.

⁷ Uwe uli Mwami Mukulu Nyamuhanga, oyo wayisoga Abramu, nʼerĩmũlũsya eŨrĩ yʼAbakaldea, nʼerimuha erĩna lya Abrahamũ.

⁸ Mowabana omutima wuwe owateregula embere syawe, kandi mowakola endagane haguma naye erimuha ekihugo kyʼOmukanana, nʼOmũhĩtĩ, nʼOmũamorĩ, nʼOmũperĩzĩ, nʼOmũyebũsĩ, nʼOmũgĩrgasĩ erihakyo oko bana buwe, kandi Wabĩrĩberererya endagane yawe; kusangwa uwe utunganene.

⁹ Mowalangira amaligo wʼabotata wetu eMĩsĩrĩ, mowowa erilaka lyabo oko mũsĩke wʼEngetsi yʼEngula.

¹⁰ Kandi mowakangya ebitiko-tiko nʼebyʼeriswekera uku Farao, nʼoko bagombe buwe bosĩ, nʼoko bandu bosĩ bʼekihugo kiwe; kusangwa wabya wasĩ ngoko bakolabo nʼeriyipipa, kandi mowayibanira erĩna, ngoko liri mũnabwĩre.

¹¹ Kandi mowagaba engetsi embere syabo kyaleka ibalaba omo katĩkatĩ kʼengetsi ngʼekitaka kyũmĩre; nʼabakwamabo mowagusabo omo mirindi, ngʼerĩbwe omo magetsi manene.

¹² Kandi omo ndũyĩ yʼekĩtũ mowasondolabo omo musibo; nʼomo ndũyĩ yʼomuliro omo kiro, erihabo ekyakakala omo nzira eyabya itolere bakalenderamo.

¹³ Mowandagalira oko kitwa kyʼeSĩnaĩ, mowakanĩa nabo erĩlũa elubula, mowahabo esyonzwere esitunganene nʼemigambo yʼekwenene nʼebihano bibuya nʼebilayiro.

¹⁴ Mowamĩnyĩsyabo eSabato yawe ĩbũyĩrĩre, nʼeritegekerabo, ebihano, nʼamahamulo nʼemigambo, omo byala bya Musa omugombe wawe.

¹⁵ Mowahabo akalyo kakalũa elubula busana nʼenzala yabo, kandi mowahũlũkya amagetsi busana nabo akalũa omwʼĩbwe busana nʼenyota yabo, kandi mowahamulabo uti bingire erĩsĩgalya ekihugo ekyo walahĩraya erihabo.

¹⁶ Nĩkwa abotata wetu mobakola ibakayipipa, mobakalya ebĩkya byabo, mobatetowa ebihano byawe.

¹⁷ Mobagana erihulikirira, kandi mobatetibuka emĩbĩrĩ yʼeriswekera yawe eyo wakola omo katĩkatĩ kabo, nĩkwa mobakala, nʼomwʼihona lyabo mobayĩhĩrĩra omukulu bati basube omo bukobe bwabo eMĩsĩrĩ. Nĩkwa uwe uli Nyamuhanga wʼeribuyira, owʼeriganyira nʼowʼolukogo, sulihitana lũba, uwite obubuya bwʼolwanzo lunene, kandi mutetasĩganĩabo.

¹⁸ Ega, omugulu bayĩkokoteraya ekyana kyʼende kyʼerĩnũnĩbwa, nʼerĩbũga bati, Oyũ ni Nyamuhanga wawe oyo wakũlũsaya eMĩsĩrĩ, ibabirikola ebĩtsũmĩ binene;

¹⁹ nĩkwa Uwe, omwʼiganyira lyawe lĩnene, mutetasĩgabo omo mbwarara; endũyĩ yʼekĩtũ moyĩtetalũa kubo omo musibo, erisondolabo omo nzira; kutse endũyĩ yʼomuliro omo kiro, erĩkoleryabo ekyakakala, busana nʼenzira eyo bangalenderamo.

²⁰ Mowahabo Omũlĩmũ wawe mubuya erĩkangĩrĩryabo, mutetĩmabo amana wawe omo muno wabo, kandi mowahabo amagetsi busana nʼenyota yabo.

²¹ Ega, mowahambirirabo emyaka makũmĩ ani omo mbwarara, mobatabula kindu; esyongimba syabo mositakula, nʼebisando byabo mobĩtabĩmba.

²² Kandi mowahabo amami nʼebihanda, ebyo wagabirabo ngʼemitano yabo; litya mobasĩgalya ekihugo kyʼeSĩhonĩ, nʼekihugo kyʼOmwami wʼeHesĩbonĩ, nʼekihugo kya Ogĩ omwami wʼeBasanĩ.

²³ Mowakanyĩsĩsya abana babo ngʼesyongũnũnũ syʼomo kyanya, mowaletabo omo kihugo ekyo wabwira abotata wabo, uti basyingiramo nʼerĩsĩgalyakyo.

²⁴ Litya abana babo mobayamo mobasĩgalya ekihugo, nawe mowakĩnda esyondũlanĩ syʼekihugo embere syabo, Abakanana, mowahĩrabo omo byala byabo, haguma nʼabami babo, nʼebihanda byʼomo kihugo, ibaminya erikola kubo ngoko basonda.

²⁵ Neryo mobahũnga emĩyĩ ikongotere, nʼekihugo kyʼomuboga, mobasĩgalya amanyũmba agoswĩre mwʼebindu byowene byosĩ, nʼebitehero ebyabatsawa, nʼamalima wʼebĩnyũ, nʼamalima wʼemĩzeĩtũnĩ, nʼemiti yʼebĩgũma bingi; litya mobalya nʼerĩũgũta, mobaneneha, mobayĩtsemesya omo bubuya bwawe bunene.

²⁶ Nomo bine bitya mobatetakenga, mobahona ukʼuwe, mobagusa emigambo yawe yʼenyũma wʼemigongo yabo, mobĩta abamĩnyererĩ bawe abahanabo batoke erisuba ukʼuwe, kandi mobakola ebĩtsũmĩ binene.

²⁷ Busana nʼekyo mowahĩrabo omo byala byʼesyonzĩgũ syabo, abalũhayabo; nʼoko mugulu wʼobũlĩge bwabo, omugulu bakulakira, mowowabo elubula; nʼomo bungi bwʼolukogo lwawe mowahabo abalamya abalamayabo omo byala byʼabandu abanũbayabo.

²⁸ Nĩkwa enyũma ibamabihumula, mobaswakola nabi embere syawe; busana nʼekyo mowasĩgabo omo byala byʼesyonzĩgũ syabo, abatabala kubo. Nĩkwa omugulu basubula nʼerikulakira, mowowabo elubula; mowalamyabo ngendo nyingi busana nʼolukogo lwawe.

²⁹ Kandi mowahanabo, iwatoka erĩsũbyabo kandi oko migambo yawe. Nĩkwa mobakola omwʼĩyĩhamya, mobatahulikirira erihana lyawe, nĩkwa mobakola nabi oko nzwere syawe esyo mundu amakolasyo iniabyaho musyo, mobasumba ebitigo, nʼerĩkalya ebĩkya byabo, mobatanza erĩowa.

³⁰ Nĩkwa mowalindabo emyaka mingi nʼerihanabo omo Mũlĩmũ wawe omo bamĩnyererĩ bawe; nĩkwa mobatanza eritega matwĩ. Busana nʼekyo mowahĩrabo omo byala byʼebihanda byʼebihugo.

³¹ Nĩkwa omwʼiganyira lyawe ringi mutabugabo, kutse erĩsĩgabo; kusangwa uli Nyamuhanga wʼolukogo nʼeriganyira.

³² Neryo lino, Nyamuhanga wetu, omukulu, nʼowʼobũtokĩ, na Nyamuhanga wʼerĩũbahya, oyũkategaya endagano nʼobubuya bʼolwanzo, supone obũlĩge bosĩ obo, Suleke bukabya nga buke embere syawe obwabĩrĩtũhĩkako, nʼoko bami betu, nʼabakulu betu, nʼabahererĩ betu, nʼabamĩnyererĩ betu, nʼabotata wetu, nʼabandu bawe bosĩ, erĩtsũka oko mugulu wʼabami bʼeAsũrĩa nʼerĩhĩka mũnabwĩre.

³³ Nĩkwa uli wʼerĩbanza omo byosĩ ebyatũhĩkako; kusangwa mowakola omo kwenene, nĩkwa ĩtwe twabirikola nabi.

³⁴ Kutse abami betu, nʼabakulu betu, nʼabamĩnyererĩ betu, kutse abotata-kulu wetu, mobatateya emigambo yawe, kutse erihulikirira erĩhano lyawe nʼerihana lyawe eryo wahanabo.

³⁵ Kusangwa mobatetakukolera omo bwami bwabo, nʼomo bubuya bwawe bunene obo wahabo, kandi omo kihugo kinene kyʼomuboga ekyo wahabo, kutse mobatetabinduka erireka emĩbĩrĩ yabo mibi.

³⁶ Lebaya, mũnabwĩre tuli bagombe, kandi omo kihugo ekyo waha abotata-kulu wetu balye ebĩgũma byakyo nʼobubuya bwakyo, lebaya tuli bagombe mukyo.

³⁷ Kandi ebindu byakyo binene ni byʼabami abo wahĩra ũkwʼĩtwe busana nʼamalolo wetu; kandi bawite ehamũlĩ oko mibiri yetu, nʼoko syonde syetu, ngoko basondĩre, netu tuli omo bũlĩge bunene.

³⁸ Neryo busana nʼebyosĩ ebĩ tukayira endagano oko barua, tukasakayo; nʼabakulu betu, nʼAbalawĩ betu, nʼabahererĩ betu bakahira ekĩmĩnyĩsyo kuyo.