Nehemĩa 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Ezera akasomera Emigambo embere syʼabandu

¹ Nʼabandu bosĩ mobayĩhĩndanĩa haguma ngʼomundu muguma ahagalĩhĩre ahali embere wʼolũkyo lwʼAmagetsi; mobabwira Ezera omũhandĩkĩ, bati alete ekitabu kyʼemigambo ya Musa, eyo Mwami Mukulu ahana Ĩsraelĩ.

² Nʼomũhererĩ Ezera mwaleta Emigambo embere syʼendeko yʼabalume nʼabakalĩ, nʼabosĩ abatoka erĩowa nʼeriminya, oko kiro kyʼerĩtsũka kyʼomukera wʼakalinda.

³ Neryo mwasoma mukyo omo kibuga ekyabya embere wʼolũkyo lwʼAmagetsi erĩtsũka omo ngyakya-ngyakya erĩhĩka omwʼitungi, embere syʼabalume nʼabakalĩ, abasĩ eriminya, kandi abandu bosĩ mobahulikirira ekitabu kyʼemigambo.

⁴ Na Ezera omũhandĩkĩ mwahangana oko kigarama kyʼemiti, ekyo bakokotaya busana nʼomwatsi oyũ; na Matatĩa, na Semũ, na Anaya, na Ũrĩa, na Hĩlĩkĩa, na Maseya, mobahangana aho lutambi kwiye oko byala biwe byʼamali; nʼoko byala byʼamalembe, Pedaya, na Mĩsaelĩ, na Malkĩa, na Hasũmũ, na Hasũbadana, na Zakarĩa, na Mesũlamũ.

⁵ Neryo Ezera mwasanzula ekitabu omo meso wʼabandu bosĩ kusangwa abya ahangene endata oko bandu bosĩ. Neryo omugulu asanzulakyo, abandu bosĩ mobahangana.

⁶ Na Ezera mwahamya Omwami Mukulu, Nyamuhanga mukulu; nʼabandu bosĩ mobasũbĩrya bati, Amina, Amina! ibanemusumba ebyala byabo; neryo mobũnama ahisi, mobaramya Omwami Mukulu nʼamũsũ wabo mwahĩka oko kitaka.

⁷ Yesũa nibya, na Banĩ, na Serebĩa, na Yamĩnĩ, na Akũbũ, na Sabetaĩ, na Hodĩa, na Maseya, na Kelĩta, na Azaria, na Yozabadĩ, na Hananĩ, na Pelaya, nʼAbalawĩ, mobowĩsya abandu bʼemigambo; nʼabandu mobahangana aho wabo.

⁸ Mobasoma omo kitabu, omo migambo ya Nyamuhanga, nʼeriminyikala; mobasobola ebĩnywa, kyaleka ibaminya ekyasomawa.

⁹ Neryo Nehemĩa, oyo wabya mũtabalĩ mukulu, nʼomũhererĩ Ezera omũhandĩkĩ, nʼAbalawĩ abĩgĩsaya abandu, mobabwira bandu bosĩ bati, Ekiro kino kĩbũyĩrĩre oko Mwami Mukulu Nyamuhanga wenyũ; sĩmũsũsũmane, simulire. Kusangwa abandu bosĩ mobalira, omugulu bowa ebĩnywa byʼemigambo.

¹⁰ Neryo mwabwirabo ati, Muyigendere, mulye esĩnenehĩre, mũpũlaye ebĩsĩhĩre, mutume amagabo oko yũtabĩkĩrwe kindu; kusangwa ekiro kino kĩbũyĩrĩre oko Mukama wetu; kandi sĩmũkwe bũlĩge; kusangwa obutseme bwʼomwami Mukulu ni kagala kenyũ.

¹¹ Neryo Abalawĩ mobahũnerya bandu bosĩ, bati, Mubye bũkũtũ, kusangwa ekiro ekĩ kĩbũyĩrĩre; kandi sĩmũkwe bũlĩge.

¹² Nʼabandu bosĩ mobayigendera eriyalya, nʼerĩpũlya, nʼerituma magabo, nʼeritsema lĩnene, kusangwa babya ibabiriminya ebĩnywa ebyagambulawa.

Ebiro bikulu byʼEhitalikirire

¹³ Nʼoko kiro kyʼakabiri abakulu bʼebĩtũnga byʼabotata-kulu byʼabandu bosĩ, abahererĩ, nʼAbalawĩ, mobahĩndana oko mũsakĩ Ezera erihulikirira ebĩnywa byʼemigambo.

¹⁴ Mobabana ebĩsakĩre omo migambo, ngoko Mwami Mukulu ahana Musa ati, Abana ba Ĩsraelĩ bĩkale omo hitalikirire omo biro bikulu byʼomukera wʼakalinda.

¹⁵ Neryo mobatũlago nʼerigambirirago omo mĩyĩ yosĩ yabo, nʼeYerũsalema, bati, Mugende oko kitwa, mwende emitahi yʼemĩzeĩtũnĩ, nʼemitahi yʼemĩzeĩtũnĩ yʼomolĩ, nʼemitahi yʼemĩkandasĩ, nʼemitahi yʼemĩkĩndo, nʼemitahi yʼemiti minene minene, erĩkokotya ehitalikirire, ngoko byasakawa.

¹⁶ Neryo abandu mobahuluka, mobaletayo, mobayĩkokoterya ehitalikirire, obuli mundu oko lutwe lwʼenyũmba yiwe, nʼomo bibuga byabo, nʼomo bibuga byʼenyũmba ya Nyamuhanga, nʼahagalĩhĩre oko Lũkyo lwʼAmagetsi, nʼahagalĩhĩre oko Lũkyo lwa Efũraĩmũ.

¹⁷ Nʼendeko yosĩ yʼabandu abalũa omo bunyegwa mobakokotya ehitalikirire, mobĩkala omo hitalikirire ehyo; kusangwa erĩtsũka oko kiro kya Yesũa mugala wa Nũnĩ erĩhĩka oko kiro ekyo abana ba Ĩsraelĩ isibetaswayira batya. Mohabya obutseme bunene kutsibu.

¹⁸ Neryo ekiro nʼekiro, erĩtsũka oko kiro kyʼerĩtsũka erĩhĩka oko kiro kyʼendũlĩ, Ezera mwasoma omo kitabu kyʼemigambo ya Nyamuhanga, Mobalya nʼeriusa ebiro birinda; nʼoko kiro kyʼomunani mohabya erĩhĩndana lĩbũyĩrĩre, ngoko kyahamulawa.