Nehemĩa 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Nehemĩa akasoha omwatsi wʼendũndĩ yʼebindu

¹ Neryo mohabya erilaka ĩnene lyʼabandu nʼabakalĩ babo busana nʼabagala babo Abayũda.

² Kusangwa abandi mobabũga bati, Ĩtwe, nʼabagala bage nʼabali bage tuli bangi, tubane engano, tulye, tubyeho.

³ Kandi habya bandi ababũga bati, Twabĩrĩkũmbĩrya malima wetu, mo musigo nʼamalima wetu wʼebĩnyũ, nʼamanyũmba wetu; tubane engano busana nʼenzala.

⁴ Habya nibya ababũga bati, Twabiribweka esyofranka busana nʼomusolo wʼOmwami, mo musigo wʼamalima wetu nʼamalima wetu wʼebĩnyũ.

⁵ Nĩkwa lino emibiri yetu iri ngʼemibiri yʼabagala betu, nʼabana betu bali ngʼabana babo, neryo lebaya, tũkahĩra abana betu bʼobulume nʼabʼobũkalĩ omo bukobe nʼabandi bana betu bʼobũkalĩ babĩrĩhĩrwa omo bukobe; kutse situwite bũtokĩ bwʼerĩyĩwatĩkya; kusangwa abandi bandu bawite oko malima wetu nʼamalima wetu wʼebĩnyũ.

⁶ Nage monahitana kutsibu omugulu nowa eririra lyabo nʼebĩnywa ebĩ.

⁷ Neryo monayĩbũlya omo mutima wage, neryo monahambalikana nʼabakulu nʼabatabalĩ, monabwirabo nyiti, Mũkalũsaya omongero obuli mundu uku mũlĩkyabo. Neryo monahĩra erĩhĩndana lĩnene busana nabo.

⁸ Neryo monabwirabo nyiti, Ĩtwe umwʼebyo tukatoka twabĩrĩtongolya abagala betu Abayũda, abagũlĩbawa oko bihanda; na lino nenyũ, mukasonda erĩgũlya abagala benyũ, neryo batolere erĩgũlĩbwa ũkwʼĩtwe kwehĩ? Neryo mobahuna bũkũtũ, mobataswabana kĩnywa nʼekiguma.

⁹ Kandi monabũga nyiti, Omwatsi mukakola sĩowene; siritolere mukalendera omʼubaha lya Nyamuhanga wetu kwehĩ busana nʼebĩtsũmi byʼebihanda esyonzĩgũ syetu?

¹⁰ Nage nibya nʼabagala betu, nʼabagombe bage, tukabwekabo ebĩtsĩpa nʼengano. Ngabasaba, tuleke omongero oyũ.

¹¹ Ngababwira nyiti, Mũsũbũlĩrayebo mũnabwĩre amalima wabo, nʼamalima wabo wʼebĩnyũ, nʼamalima wabo wʼemĩzeĩtũnĩ, nʼamanyũmba wabo, nʼekiguma kyʼerĩgana kyʼebĩtsĩpa, nʼekyʼengano, nʼebĩnyũ bihya-bihya, nʼamagũta ebyo mũkalũsaya kubo.

¹² Neryo mobabũga bati, Tũkandĩsyasũbũlĩrya byobo, sitwendisyasonda kubo ko kindu; twasyakola tutya, ngoko ũkabũga. Neryo monabirikira abahererĩ, monalahĩsyabo, bakole ngʼerilaga erĩ.

¹³ Kandi monakunguta olukimba lwage, monabũga nyiti, Nyamuhanga akungute obuli mundu erĩlũa omo nyũmba yiwe atya, nʼoko mũbĩrĩ wuwe, oyũtendĩberererya erilaga erĩ; akungutawe atya, nʼerĩũtwa. Nʼendeko yosĩ moyabũga iti, Amina, mobapipa Omwami Mukulu. Nʼabandu abo mobakola ngʼerilaga erĩ.

¹⁴ Nibya erĩtsũka omugulu nahĩrawa eribya mũtabalĩ wabo omo kihugo kyʼeYũda, erĩtsũka oko mwaka wʼamakũmĩ abiri erĩhĩka oko mwaka wʼamakũmĩ asatu nʼeyĩbĩrĩ wʼOmwami Artasasta, ye myaka erĩkũmĩ nʼeyĩbĩrĩ, ĩngye nʼabagala betu motutalya kalyo akakahabawa oko mũtabalĩ.

¹⁵ Nĩkwa abatabalĩ ababya embere syage mobatsotsoberya bandu, mobĩmya kubo kwʼebyalya nʼebĩnyũ, na kwilaba aho esyosekelĩ makũmĩ ani syʼekĩtsĩpa; ega, nʼabagombe babo mobatabala oko bandu; nĩkwa ĩngye mondakola nyitya busana nʼeriubaha Nyamuhanga.

¹⁶ Ega, nibya monakwamana nʼomũbĩrĩ wʼolũhĩmbo olũ, kutse motutagula kitaka; nʼabagombe bage bosĩ mobahĩndanayo oko mũbĩrĩ.

¹⁷ Kandi oko mesa yage mohabya bandu erĩgana nʼamakũmĩ atanu Abayũda, nʼabakulu, na kwilaba aho abatũhĩkako bakalũa omo bihanda ebyatũtĩmbako.

¹⁸ Neryo ebyalya ebyakokotĩbawa busana nʼekiro kiguma byabya enume nguma nʼesyombũlĩ syowene ndeke ndatu; nibya mobakokotya esyongoko busana nage, kandi engendo nguma oko buli biro ĩkũmĩ ebĩnyũ bingi byʼemĩsĩndo yosĩ mobyabanika. Nĩkwa omo byosĩ ebĩ mondabũlya akalyo ako kakahabawa oko mũtabalĩ mukulu busana nʼobukobe obwabya bũlĩtohĩre oko bandu aba.

¹⁹ Uwe Nyamuhanga wage, unyibuke busana nʼebibuya, busana nʼebyosĩ nabirikolera abandu aba.