Nehemĩa 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Amena wʼabahĩmba olũhĩmbo nʼesyongyo

¹ Neryo omũhererĩ mukulu ye Elĩasĩbũ mwahangana haguma nʼabagala babo bahererĩ, mobahĩmba olũkyo lwʼEsyombũlĩ; mobahigulalo, nʼerĩhanganĩa esyonyũyĩ syalo; mobahigula olũhĩmbo erĩhĩka oko Nyũmba Eyĩsũngũlĩkĩre yʼErĩgana, erĩhĩka oko Nyũmba Eyĩsũngũlĩkĩre ya Hananelĩ.

² Kandi hakũhĩ na Elĩasĩbũ, abandu bʼeYerĩko mobahĩmbaho. Nʼahahererenĩe nabo Zakũrĩ mugala wa Ĩmũrĩ mwahĩmbaho.

³ Nĩkwa abagala ba Hasena mobahĩmba Olũkyo lwʼAmahere; mobahĩra esyonzeguliro syalo, nʼerisingika esyonyũyĩ syalo, nʼesyongomo syalo, nʼebĩsũmĩro byalo.

⁴ Nʼahahererenĩe naho, Meremotĩ mugala wa Ũrĩa, mugala wa Hakozĩ, mwasũbyaho. Nʼahahererenĩe naye Mesũlamũ mugala wa Berekĩa, mugala wa Mesezabelĩ, mwakokotyaho. Nʼahahererenĩe nabo Zadokĩ mugala wa Baana mwasũbyaho.

⁵ Nʼaho ahahererenĩe nabo Abanya Tekoa mobasũbyaho; nĩkwa abakulu babo mobatawatĩkya omũbĩrĩ wʼabakama babo.

⁶ Neryo Yoyada mugala wa Pasea na Mesũlamũ mugala wa Besodĩya mobakokotya Olũkyo lwa Kera; mobahĩra esyonzeguliro syalo, mobasingika esyonyũyĩ syalo, nʼesyongomo syalo, nʼebĩsũmĩro byalo.

⁷ Nʼahahererenĩe nabo Melatĩa Omũgĩbeonĩ, na Yadonĩ Omũmerono, nʼabandu bʼeGĩbeonĩ, nʼabʼeMĩsĩpa, omũyĩ mukulu wʼomũtabalĩ eyisirya wʼolũsĩ Efũratĩ, mobasũbyaho.

⁸ Nʼahahererenĩe naye, Ũzĩelĩ mugala wa Harĩhaya, wʼabahesĩ bʼesyamagetsi, mobasũbyaho. Nʼahahererenĩe naye Hanania, omuguma wʼabakakokotaya ebikakumba ndeke mwasũbyaho, neryo mobawatya eYerũsalema erĩhĩka oko Lũhĩmbo Olũgalĩhĩre.

⁹ Nʼahahererenĩe nabo Refaya mugala wa Hũrũ mwasũbyaho, yo mũtabalĩ wʼoluhande lwʼeYerũsalema.

¹⁰ Nʼahahererenĩe nabo Yedaya mugala wa Harũmafi mwasũbyaho erĩlolya oko nyũmba yiwe. Nʼahahererenĩe naye Hatũsĩ mugala wa Hasabeneya mwasũbyaho.

¹¹ Malkĩa mugala wa Harĩmũ, na Hasũbũ mugala wa Pahatĩ-moabũ, mobasũbya olundi luhande nʼEnyũmba Eyĩsũngũlĩkĩre yʼAmokeryo.

¹² Nʼahahererenĩe naye Salumu mugala wa Halohesĩ, omũtabalĩ wʼoluhande lwʼeYerũsalema, iye nʼabali buwe mobasũbyaho.

¹³ Na Hanũnĩ nʼesyondũlanĩ syʼeZanoa mobasũbya Olũkyo lwʼOmusya; mobahĩmbalo, nʼerisingika esyonyũyĩ syalo, nʼesyongomo syalo nʼebĩsũmĩro byalo, nʼesyometere magana ani nʼamakũmĩ ani nʼesĩtanu syʼolũhĩmbo erĩhĩka oko Lũkyo lwʼEkyabũ.

¹⁴ Na Malkĩa mugala wa Rekabũ, omũtabalĩ wʼekihugo kyʼeBetĩ-hakeremũ mwasũbya Olũkyo lwʼEkyabũ; mwahĩmbalo, nʼerisingika esyonyũyĩ syalo, nʼesyongomo syalo nʼebĩsũmĩro byalo.

¹⁵ Na Salumu mugala wa Kolĩhoze, omũtabalĩ wʼekihugo kyʼeMĩsĩpa mwakokotya Olũkyo lwʼEngũnũnũko; mwahĩmbalo nʼeriswikalo, nʼerisingika esyonyũyĩ syalo, nʼesyongomo syalo, nʼebĩsũmĩro byalo, nʼolũhĩmbo lwʼEkitsinga kyʼeSela hakũhĩ nʼEririma lyʼOmwami, nʼerĩhĩka oko bisambiro ebikandagala bĩkalũa oko Mũyĩ wa Dawĩdĩ.

¹⁶ Nʼenyũma wuwe Nehemĩa mugala wa Azĩbũkũ, omũtabalĩ wʼekihande kyʼekihugo kyʼeBetĩ-zũrĩ, mwasũbya olũhĩmbo erĩhĩka eyisirya wʼesisinda sya Dawĩdĩ, nʼerĩhĩka oko Kitsinga Ekyakokotĩbawa, nʼerĩhĩka oko Nyũmba yʼEsyombangĩ.

¹⁷ Nʼenyũma wuwe Abalawĩ mobasũbyalo, haguma na Rehũmũ mugala wa Banĩ. Nʼahahererenĩe naye Hasabĩa, omũtabalĩ wʼekihande kyʼekihugo kyʼeKeĩla, mwasũbyalo busana nʼekihugo kiwe.

¹⁸ Nʼenyũma kwiye abagala babo haguma na Bawaĩ, mugala wa Henadadĩ, omũtabalĩ wʼekihande kyʼekihugo kyʼeKeĩla mobasũbyalo.

¹⁹ Nʼahahererenĩe naye Ezeerĩ mugala wa Yesũa, omũtabalĩ wʼeMĩsĩpa mwasũbya olundi luhande, erĩlolya ahakahetukira oko mbĩso yʼebindu byʼamalwa aho lũhĩmbo lukabindukira.

²⁰ Nʼenyũma wuwe, Barũkũ mugala wa Zabaĩ mwakokotya nʼomũhwa eyindi mbindi yʼolũhĩmbo nʼomũhwa, erĩtsũka oko ngonde aho lũhĩmbo lũbĩndũkĩre erĩhĩka oko lũkyo lwʼenyũmba ya Elĩasĩbũ omũhererĩ mukulu.

²¹ Nʼenyũma wuwe Meremotĩ mugala wa Ũrĩa mugala wa Hakozĩ mwakokotya olundi luhande, erĩlũa oko lũkyo lwʼenyũmba ya Elĩasĩbũ erĩhĩka oko ndũlĩ yʼenyũmba ya Elĩasĩbũ.

²² Nʼenyũma wuwe abahererĩ, abandu bʼomusya mobakokotyaho.

²³ Nʼenyũma wuwe Benyamĩna na Hasabũ mobakokotyalo embere wʼenyũmba yabo. Nʼenyũma wuwe Azaria mugala wa Maseya, mugala wa Anania mwakokotya aho mũsĩke wʼenyũmba yiwe.

²⁴ Nʼenyũma kwiye Bĩnũĩ mugala wa Henadadĩ mwasũbya olundi luhande, erĩtsũka oko nyũmba ya Azaria erĩhĩka aho lũhĩmbo lũbĩndũkĩre, nʼerĩhĩka oko ngonde.

²⁵ Palalĩ mugala wa Ũzaĩ mwakokotyalo erĩlolya eyo lũhĩmbo lũbĩndũkĩre, nʼenyũmba eyĩsũngũlĩkĩre eyihangene erĩlũa oko nyũmba yʼendata yʼOmwami eyiri hakũhĩ nʼekibuga kyʼabateya. Nʼenyũma kwiye Pedaya mugala wa Parosĩ mwasũbyalo.

²⁶ Neryo abagombe bʼeHekalũ abĩkere eOfelĩ mobasũbyalo aho halolĩrye erĩhĩka oko Lũkyo lwʼAmagetsi ahakalolaya endata, nʼenyũmba nyiri eyĩhũlũkĩre.

²⁷ NʼEnyũma kwiye, Abatekoa mobakokotya olundi luhande, erĩlolya ahali enyũmba eyĩsũngũlĩkĩre eyikahuluka, nʼerĩhĩka oko lũhĩmbo lwa Ofelĩ.

²⁸ Nʼabahererĩ mobakokotya endata oko Lũkyo lwʼEsabayĩrĩ, obuli mundu erĩlolyalo oko nyũmba yiwe.

²⁹ Nʼenyũma kwiye Zadokĩ mugala wa Ĩmerĩ mwakokotyalo erĩlolya oko nyũmba yiwe. Nʼenyũma kwiye Semaya, mugala wa Sekanĩa omũteya wʼolũkyo lwʼEndata mwasũbyalo.

³⁰ Nʼenyũma kwiye Hanania mugala wa Selemĩa, na Hanũnĩ mugala wʼendatu wa Zalafũ, mobasũbya olundi luhande lwʼolũhĩmbo. Nʼenyũma kwiye Mesũlamũ mugala wa Berekĩa mwasũbyaho erĩlolya ahali engonde yʼenyũmba yiwe.

³¹ Nʼenyũma kwiye Malkĩa, omuguma wʼabahesĩ bʼesyamagetsi, mwasũbyaho erĩhĩka oko nyũmba yʼabagombe bʼeHekalũ, nʼeyʼabakagũlaya, erĩlolya oko Lũkyo lwʼErĩrebya, nʼerĩhĩka oko nyũmba yʼendata yʼengonde.

³² Nʼomo katĩkatĩ kʼenyũmba yʼendata yʼengonde nʼolũkyo lwʼEsyombũlĩ, abahesĩ bʼesyamagetsi nʼabakagũlaya mobakokotyaho.