Nehemĩa 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Nehemĩa akahabawa ehamũlĩ erĩyahĩmba eYerũsalema

¹ Neryo oko mukera wa Nĩsanĩ, oko mwaka wʼamakũmĩ abiri wʼOmwami Artasasta, omugulu ebĩnyũ byabya embere siwe, monĩmya ebĩnyũ ebyo nʼerihabyo omwami. Nĩkwa oko mugulu wʼerĩmbere mondabya nʼobũlĩge embere siwe.

² Nʼomwami mwanyĩbũlya ati, Busana nakĩ obũsũ bwawe buli nʼobũlĩge, isigulwere kwehĩ? Ekĩ si kindi, bo nʼobũlĩge bʼomutima. Neryo monubaha kutsibu.

³ Monabwira omwami nyiti, Omwami akote. Busana nakĩ obũsũ bwage sibwangabya nʼobũlĩge omugulu omũyĩ, ahali esisinda syʼabotata wage hakabya mulala, nʼesyongyo syako syabĩrĩhĩsĩrĩrĩbwa omo muliro kwehĩ?

⁴ Neryo omwami mwanyibwira ati, Ukasabakĩ kwehĩ? Neryo monasaba uku Nyamuhanga wʼelubula.

⁵ Neryo monabwira omwami nyiti, Kyamatsemesya omwami, nʼomugombe wawe amabana erĩsĩmwa omo meso wawe, unyitume eYũda, oko mũyĩ wʼesisinda syʼabotata-kulu wage, inatoka erĩhĩmbago.

⁶ Neryo omwami mwanyibwira omugole wʼOmwami ĩnĩanĩkere hakũhĩ naye, ati, Olugendo lwawe lwasyabya lwʼebiro bingahi kwehĩ? Kandi wasyasubula mugulu wahi kwehĩ? Neryo mokyatsemesya omwami erinyituma; nage monamulaga omugulu.

⁷ Kandi monabwira omwami nyiti, Kyamatsemesya omwami, nyihabawe esyobarua oko batabalĩ abali eyisirya wʼolũsĩ Efũratĩ, baminye erĩnyĩlabya erĩhĩka aho nasyahĩkĩra eYũda.

⁸ Kandi nyihabawe ebarua uku Asafũ omũteya wʼomũsĩtũ wʼOmwami, iniaminya erimba emiti yʼeribatsa esyonzeguliro busana nʼesyongyo syʼekikali esikabya oko nyũmba, na busana nʼolũhĩmbo lʼomũyĩ, na busana nʼenyũmba eyo ngandisyingiramo. Neryo omwami mwamba, kusangwa ebyala bibuya bya Nyamuhanga byanyibyako.

Nehemĩa akahĩka eYerũsalema nʼeriringayo

⁹ Neryo monahĩka oko batabalĩ eyisirya wʼolũsĩ Efũratĩ, monahabo esyobarua syʼOmwami. Nĩkwa omwami iniamabituma haguma nage abakulu bʼomulondo nʼabandu abali oko syosabayĩrĩ.

¹⁰ Neryo Sanĩbalatĩ Omũhorĩ, na Tobĩa omukulu wʼAbaamonĩ, babere bowago, mobahitana kutsibu-tsibu, kusangwa omundu amabiasa erĩsondya omũyĩsa busana nʼabana ba Ĩsraelĩ.

¹¹ Neryo litya monahĩka eYerũsalema, monabyayo ebiro bisatu.

¹² Nage monahangana omo kiro, ĩngye nʼabandu bake haguma nage. Kandi mondetabwira mundu nʼomuguma ebyo Nyamuhanga wage ahĩra omo mutima wage erikola eYerũsalema; kutse sihabya nyama haguma nage ye nʼeyo nagendako.

¹³ Nʼomo kiro monahuluka oko lũkyo lʼomusya oko luhande lwʼekitehero kyʼeboha, nʼoko lũkyo lwʼekyabũ, monalangira esyombĩmbo syʼeYerũsalema, esyasambulawa, nʼesyongyo syako ĩsyabĩrĩhĩsĩrĩrĩbwa omo muliro.

¹⁴ Neryo monaya oko lũkyo lwʼekitehero, nʼoko kitsinga kyʼOmwami; nĩkwa sihabya mwanya wʼerilabamo busana nʼenyama eyabya yĩmbekĩre.

¹⁵ Neryo omo kiro monalaba oko musya, nʼerĩrebya ekĩyĩte; neryo monasubula, monaswingira omo lũkyo lwʼOmusya, litya monasubula.

¹⁶ Nĩkwa abakulu mobataminya eyo naya, kutse ebyo nakola; kandi isindinabwirago Abayũda, kutse abahererĩ, kutse abakulu, kutse abatabalĩ, kutse abandi abakola omũbĩrĩ.

Nehemĩa akabwira abakulu bahĩmbe olũhĩmbo

¹⁷ Neryo monabwirabo nyiti, Mwanamalebya omwatsi mubi ogo tulimo, ngoko Yerũsalema iri mulala, nʼesyongyo syayo syabĩrĩhĩsĩbwa omo muliro; mwase, tũhĩmbe olũhĩmbo lwʼeYerũsalema, situbye kandi nʼekĩtsũmĩ.

¹⁸ Neryo monabwirabo ngoko byala bya Nyamuhanga wage byabya bibuya ũkwʼĩngye, nibya ebĩnywa byʼOmwami ebyo ambwira. Nabo mobabũga bati, Tuhangane, tũhĩmbe. Neryo mobahĩra ebyala byabo oko mũbĩrĩ owene oyo ko batya.

¹⁹ Nĩkwa omugulu Sanĩbalatĩ Omũhorĩ, na Tobĩa omukulu wʼAbaamonĩ, na Gesemũ Omuarabu, bowago, mobatuseka nʼerĩtũsekererya, kandi mobatupona bati, Ekĩ nĩkĩ kyo mukakola kwehĩ? Mukasonda erihona oko mwami kwehĩ?

²⁰ Neryo monasũbĩryabo, nʼeribwirabo nyiti, Nyamuhanga wʼelubula, iye asyatũtokesya; busana nʼekyo ĩtwe bagombe buwe twasyahangana nʼerihĩmba; nĩkwa ĩnywe simuwite, erĩgabo kutse erĩbanza, kutse ekĩbũkyo, eYerũsalema.