Nehemĩa 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Nehemĩa akahiga emitsye mibi erĩlũsyayo omo Hekalũ

¹ Oko kiro ekyo mobasomera ekitabu kya Musa omo matwĩ wʼabandu; na mukyo mohabanika ĩmũsakĩre kiti, Omũamonĩ, na Moabũ sibingire omo ndeko ya Nyamuhanga na kera,

² kusangwa mobatahĩndana nʼabana ba Ĩsraelĩ erireterabo ebyalya nʼamagetsi, nĩkwa mobahongokya Balaama, eritakirabo. Nĩkwa Nyamuhanga wetu mwabindula eritakira mo mũyĩsa.

³ Neryo omugulu bowa emigambo, mobasolola endeko yosĩ eyo eyite ya Ĩsraelĩ.

⁴ Neryo embere wʼaho, Elĩasĩbũ omũhererĩ, oyo wahĩrawa mo mũhanganĩrĩ oko byumba byʼenyũmba ya Nyamuhanga wetu, abya wʼekihanda kya Tobĩa,

⁵ ĩnĩabĩrĩkokotya ekyumba kinene busana na Tobĩa, aho bagenda bakahĩra erĩmbere amahere wʼeyĩsyano, nʼoufumba, nʼebindu, nʼekiguma kyʼerĩkũmĩ kyʼengano, nʼebĩnyũ bihya-bihya, nʼamagũta, ebyahamulawa erihabwa oko Balawĩ, nʼabĩmbĩ, nʼabateya bʼesyongyo; nʼesyonzũnzo busana nʼabahererĩ.

⁶ Nĩkwa oko mugulu gosĩ oyo sinabya eYerũsalema; kusangwa omo mwaka wʼamakũmĩ asatu nʼeyĩbĩrĩ wʼOmwami Artasasta wʼeBabelĩ nabya inabiriya eyiri omwami. Nʼenyũma wʼebindi biro monasaba omwami yʼolugendo.

⁷ Neryo monahĩka eYerũsalema nʼeriminya ebibi ebyo Elĩasĩbũ akola busana na Tobĩa, erĩmũkokoterya ekyumba omo bibuga byʼenyũmba ya Nyamuhanga.

⁸ Monakwa obũlĩge bunene; busana nʼekyo monagusa ebindu byosĩ bya Tobĩa byʼeyĩhya ebyabya omo kyumba ekyo.

⁹ Neryo monahamula, neryo mobabĩrya ebyumba; neryo monasũbyamo ebindu byʼenyũmba ya Nyamuhanga, haguma nʼamahere wʼeyĩsyano nʼoufumba.

¹⁰ Kandi monaminya kwʼamagabo wʼAbalawĩ sibetahabwago; busana nʼekyo Abalawĩ nʼabĩmbĩ, abakola omũbĩrĩ, ibamatibita obuli mundu omwʼirima liwe.

¹¹ Neryo monakunga abatabalĩ, nyiti, Busana nakĩ enyũmba ya Nyamuhanga yamasĩgwa kwehĩ? Neryo monahĩndanĩabo haguma, nʼerĩhĩrabo omo myanya yabo.

¹² Neryo Abayũda bosĩ mobaleta ekiguma kyʼerĩkũmĩ kyʼengano nʼebĩnyũ bihya-bihya, nʼamagũta oko byumba byʼesyombĩso.

¹³ Kandi monayira abahanganĩrĩ bʼesyombĩso, ye Selemĩa omũhererĩ, nʼomũhandĩkĩ Zadokĩ, nʼoko Balawĩ, ye Pedaya; nʼakandi abandi ba kubo habya Hananĩ mugala wa Zakũrĩ, mugala wa Matanĩa; kusangwa baganzawa ngʼabandu bateregula, nʼomũbĩrĩ wabo abya erigabira abagala babo.

¹⁴ Uwe Nyamuhanga wage, unyibuke, busana nʼekĩ, kandi susangule emĩbĩrĩ yage mibuya eyo nakola busana nʼenyũmba ya Nyamuhanga wage, nʼokwʼitondeka lyayo.

¹⁵ Omo biro ebyo monalangira eYũda abandi bandu bakakama omo bikamiro byʼebĩnyũ omo Sabato, nʼerĩkũlũkya esyongunza syʼengano, nʼerĩhekyasyo esyopunda; nʼebĩnyũ nibya, nʼebĩgũma byʼebĩnyũ, nʼemĩtĩnĩ, nʼemĩsĩndo yosĩ yʼemiheke, eyo baleta eYerũsalema oko kiro kyʼeSabato. Nage monahandikirirabo ekiro ekyo bagũlaya ebyalya.

¹⁶ Kandi abandu bʼeTiro, babya bĩkereho abaleta amahere, nʼemĩsĩndo yosĩ yʼebindu byʼerĩgũlya, mobagũlya omo Sabato oko bana ba Yũda, nʼomo Yerũsalema nibya.

¹⁷ Neryo monakunga abakulu ba Yũda, monabwirabo nyiti, Ni mwatsi wahi mubi ogo mukakola, nʼerisunata ekiro kyʼeSabato kwehĩ?

¹⁸ Abotata wenyũ mobatakola batya kyaleka Nyamuhanga wetu iniatatuletera ekibi kyosĩ ekĩ, nʼoko mũyĩ oyũ kwehĩ? Nĩkwa mũkakanyĩsaya erireta erihitana uku Ĩsraelĩ nʼerisunata eSabato.

¹⁹ Neryo, omugulu omwĩrĩmya atsũka omwʼĩgolo-golo oko syongyo syʼeYerũsalema embere wʼeSabato, monahamula nyiti esyonyũyĩ sikingawe, kandi monahamula nyiti sisikingulawe eSabato ite yahwa. Kandi monahĩra abandi bʼoko bagombe bage erĩteya esyongyo, omuheke siatwalawemo oko kiro kyʼeSabato.

²⁰ Litya abakatũndaya nʼabakagũlaya emĩsĩndo yosĩ yʼebindu mobasiba eyĩhya wʼeYerũsalema ekiro kiguma kutse bibiri.

²¹ Monahanabo, nʼeribwirabo, nyiti, Busana nakĩ mukalalirira embere wʼolũhĩmbo kwehĩ? Mwamaswakola mutya, nasyabahamba. Erĩtsũka oko mugulu oyo mobatetaswasa omo kiro kyʼeSabato.

²² Kandi monahana Abalawĩ bayihigule, kandi base bategaye esyongyo, nʼerihigula ekiro kyʼeSabato. Uwe Nyamuhanga wage, unyibukire ekĩ nakyo, unyiganyire ngʼobungi bʼobubuya bwawe bwʼolwanzo.

²³ Oko biro ebyo monalebya Abayũda ababya ĩbamahĩkya abakalĩ bʼAbaasĩdodĩ, nʼAbaamonĩ, nʼAbamoabũ.

²⁴ Nʼabana babo babya bakabũga ekihande kyʼomũbũge wʼAbaasĩdodĩ, kandi isihali oyukatoka erĩbũga omo mũbũge wʼAbayũda nĩkwa omo mũbũge wʼebindi bihanda.

²⁵ Neryo monalwa nabo, nʼeritakirabo, nʼerĩswĩrya abandi ba kubo, nʼerikula esyonzwiri syabo, nʼerĩlahĩrĩryabo uku Nyamuhanga, nyiti, Simuhe abana-bato benyũ bʼoko bagala babo, kutse sĩmũtahĩraye abana-bato babo bʼoko bana benyũ abo mwabuta, kutse busana nenyũ.

²⁶ Ye Solomono omwami wʼeĨsraelĩ mwatahalya omo myatsi eyĩ kwehĩ? Nĩkwa omo bihanda bingi sihabya mwami ulingene naye, naye mwanzwa na Nyamuhanga wuwe, kandi Nyamuhanga mwamuyira mo mwami wa Ĩsraelĩ bosĩ; nĩkwa naye nibya, abakalĩ bʼehandi mobaleka ĩnĩahalya.

²⁷ Netu twamowa engulu yenyũ muti mukakola ebibi binene ebĩ, nʼerĩhalya uku Nyamuhanga wetu erĩhĩkya abakalĩ bʼehandi kwehĩ?

²⁸ Kandi omuguma wʼabagala ba Yoyada, omugala wa Elĩasĩbũ omũhererĩ mukulu, abya mukwe wa Sanĩbalatĩ Omũhoronĩ; busana nʼekyo monamuhiga.

²⁹ Uwe Nyamuhanga wage, wibukebo, kusangwa babĩrĩtsandya obũhererĩ, nʼendagano yʼobũhererĩ, nʼeyʼAbalawĩ.

³⁰ Litya monahigulabo oko bʼehandi bosĩ, nʼerĩhĩra omũbĩrĩ busana nʼabahererĩ na busana nʼAbalawĩ, obuli mundu omo mũbĩrĩ wuwe.

³¹ Kandi monategeka omwatsi busana nʼesyongwĩ, oko migulu eyahamulawa, na busana nʼamayilula. Uwe Nyamuhanga wage, unyibuke busana nʼobubuya.