Nahũmũ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihera lyʼeNĩnawe

¹ Obũlĩge oko mũyĩ wʼomusasi! Oswĩre kutsibu nʼeribiha nʼobũnyeyĩ; ebinyegwa byako sibirigenda.

² Obũrũndĩ bwʼomukoba, nʼobũrũndĩ bwʼebĩrĩngo bĩkabũga-bũga, eriyinyabura lyʼesyosabayĩrĩ, nʼesyogalĩ esikatibita.

³ Eriyalwa lyʼabakagenda oko sabayĩrĩ, nʼerĩhenĩa lyʼemĩyalĩ, nʼerĩkangabasanĩa lyʼamatũmo, nʼerĩkwa lyʼabangi, nʼekilundo kinene kyʼebĩnda, kandi ebĩnda ebitaganzika, bakatwĩkala oko bĩnda!

⁴ Busana nʼobungi bʼoluteto lʼomũmalaya omubuya oyũ, omũkalĩ wʼamalagu, oyũ kagũlaya ebihanda omo bũtetĩ buwe, nʼerĩgulya ebĩtũnga busana nʼamalagu wuwe.

⁵ Omwami Mukulu Wʼemilondo ati, Lebaya, ngalwa nawe, ngandisyaswikula esyongimba syawe oko bũsũ bwawe; nasyakangya ebihanda endũmbũ yawe, nʼerihemuka lyawe oko mami.

⁶ Nasyakugusa kwʼesyonye, nʼerikuyira mo mubi kutsibu, nasyakũhĩra ngʼekyʼerisekwa.

⁷ Neryo abosĩ abakusamalira basyakusaga bati, Nĩnawe abiriyirwa mo mulala; nindi wasyamulira kwehĩ? Nasyakũsonderya abasĩbĩkya bo hayi kwehĩ?

⁸ Uli mubuya kwilaba No-amonĩ oyo wahĩrawa hakũhĩ nʼamagetsi wʼeNĩlĩ, oyo watĩmbawako nʼamagetsi; oyo ahakongotere huwe habya engetsi, nʼengetsi moyabya lũhĩmbo luwe kwehĩ?

⁹ Etĩopĩa nʼeMĩsĩrĩ moyabya kagala kako butsira mitano. Pũtĩ na Lũbĩmũ babya bawatĩkya bako.

¹⁰ Nĩkwa mwabya mũsayĩ mwaya omo bunyegwa; nʼabana buwe balere mobabũnangwa mo bitswe-bitswe oko ndũlĩ yʼesyonzira syosĩ; mobagerekera busana nʼabakulu bako bʼerĩsĩkĩbwa, kandi abandu bakulu buwe bosĩ mobabohwa omo bihulula.

¹¹ Wasyakũnda nibya; wasyabĩswa. Wasyasondya ahʼerisagira nibya busana nʼesyonzĩgũ.

¹² Ahakongotere hawe hosĩ ni miti yʼemĩtinĩ eyiri kwʼebĩgũma byerĩre; byamatengatenganĩbwa, ibyatogera omo buno bwʼoyukalyabyo.

¹³ Lebaya, abandu bawe omo katĩkatĩ kawe nĩ bakalĩ; esyongyo syʼekihugo kyawe sĩkĩngwĩrwe ndeke oko syonzĩgũ syawe; omuliro akalya esyongomo syʼesyongyo syawe.

¹⁴ Ugende busana nʼamagetsi busana nʼeribambirwa; Ũsĩkaye amakongotero wawe; wingire omo londo, Usumbe olondo; uhambe olusayi lwʼamatafalĩ.

¹⁵ Aho omuliro asyakulya; nʼomũyalĩ asyakũtwa; asyakwĩta ngʼengĩke. Ũyĩkanyaye ngʼengĩke eyikaguluka, ũyĩkanyaye ngʼengĩke eyikakululuka.

¹⁶ Wabĩrĩkanyĩa abatũndya bawe kwilaba esyongũnũnũ syʼelubula; engĩke eyikakululuka ikalya ebiti, iyaswaguluka.

¹⁷ Abakulu bawe bʼerĩteya bali ngʼesyongĩke esikaguluka. Nʼabakulu bawe ngʼebituta bingi ebikalalirira omo lukunda lwʼamabwe oko kiro kyʼeritsuku, nĩkwa omugulu eryuba likahangana bikatibita, nʼaho bikabya siheminyikala.

¹⁸ Uwe mwami wʼeAsũrĩa, abalĩsya bawe bakagotsera; abakulu bawe bakagotsera; abandu bawe babiripanzirwa oko bitwa, isihali oyũkaswahĩndanayabo.

¹⁹ Sihali obusaki bwʼeriluma lyawe; ekironda kyawe sikyangabala; abosĩ abakowa engulu yawe basyakangatira ebyala byabo endata ukʼuwe; kusangwa obubi bwawe sĩbwetahĩka ukundi emigulu yosĩ kwehĩ?