Mĩka 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Mowe ebyo Mwami Mukulu akabũga

¹ Mowe lino ebyo Mwami Mukulu akabũga ati, Uhangane, uyilondere embere syʼebitwa, nʼehitwa hyowe omulenge wawe.

² Ĩnywe bitwa, mowe, erihandikirira lyʼOmwami Mukulu, nenyũ ebibanza byʼekihugo ebitehwaho; kusangwa Omwami Mukulu akahandikirira abandu buwe, kandi asyakuba obuhaka na Ĩsraelĩ.

³ Ĩnywe bandu bage, nabiribakolakĩ kwehĩ? Kandi namabalũhya nyiti kwehĩ? Mũnyĩsũbĩraye.

⁴ Kwenene nabalũsaya omo kihugo kyʼeMĩsĩrĩ, monabatongolya erĩlũa omo nyũmba yʼomũlĩkĩ; monatuma Musa, na Harũnĩ, na Mĩrĩama embere syenyũ.

⁵ Ĩnywe bandu bage, lino mwibuke ebyo Balaka, omwami wʼeMoabũ, ahana, nʼebyo Balama mugala wa Beorĩ amũsũbĩraya; Wibuke erĩtsũka eSĩtĩmũ erĩhĩka eGĩlĩgalĩ, muminye emĩbĩrĩ itunganene yʼOmwami Mukulu.

⁶ Nasyahĩka embere syʼOmwami Mukulu yo nakĩ, nʼerĩyũnamya embere wa Nyamuhanga wʼendata yo na kihi kwehĩ? Nasyahĩka embere siwe nʼamahere wʼerĩokererya, nʼebyana byʼende byʼomwaka muguma kwehĩ?

⁷ Omwami Mukulu akatsemera esyombangale elfu nguma, kutse nʼamaelfu ĩkũmĩ wʼesyonyũsĩ syʼamagũta kwehĩ? Nasyaha akambere kage busana nʼerĩlolo lyage, nʼomwana wʼomubiri wage busana nʼekibi kyʼekĩrĩmũ kyage kwehĩ?

⁸ Uwe mundu, abĩrĩkũkangya kihi kyo kibuya; Omwami Mukulu akakusonda ko kihi kwehĩ, lye nʼerikola erĩbanza litunganene, nʼerianza obwenge, nʼerirendera na Nyamuhanga wawe nʼerĩyĩkehya.

Erigesa lyʼebibi

⁹ Omulenge wʼOmwami Mukulu akabirikira omũyĩ, kandi ni menge eriubaha erĩna lyawe. Wowe, uwe kihanda! Nindi abĩrĩhĩra omugulu wakyo kwehĩ?

¹⁰ Omo nyũmba yʼababi mukine ebindu byʼebibi kwehĩ? Nʼakalengĩ katahĩkene kʼesyonye kakinemo kwehĩ?

¹¹ Nangamũlũngũkalya omo lulengero lubi, nʼengunza yʼesyokĩlo syʼerirenga esikateba kwehĩ?

¹² Kusangwa abandu bʼebindu bʼomũyĩ boswĩre nʼomwaga, nʼesyondũlanĩ syako sĩkabũga amabehĩ, nʼolulimi lwabo lukateba omo buno bwabo.

¹³ Neryo nibya nasyakũswĩrya nʼerĩkũlwalya; nʼerĩkũlolya oko bũlĩge busana nʼebibi byawe.

¹⁴ Wasyalya, nĩkwa sĩwendĩsyũgũta; nʼobubi bwawe bwasyabya omo katĩkatĩ kawe; wasyalenga erĩhũmya nĩkwa siwendisyabika; nʼebyo ukabika nasyahabyo oko mũyalĩ.

¹⁵ Wasyabiba, nĩkwa siwendisyagesa; wasyalyatira emĩzeĩtũnĩ erikamayo, nĩkwa sĩwendĩsyayĩhakabya amagũta ayo, kandi wasyakama ebĩnyũ, nĩkwa sĩwendĩsyapũlya ebĩnyũ.

¹⁶ Kusangwa ebilayiro bya Omũrĩ byabĩrĩteyĩbwa, nʼemĩbĩrĩ yosĩ yʼekĩtũnga kya Ahabũ ikakwamawa, nenyũ mukalendera omo mahano wabo. Neryo nasyakũhĩra erĩherĩbwa, nʼesyondũlanĩ syawe nasyahĩrasyo erisekwa; nenyũ mwasyaheka ebĩtsũmĩ byʼabandu bage.