Mĩka 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Obũlĩge oko bakanũbaya

¹ Obũlĩge oko bakayĩtegekaya ebibi nʼerĩganĩrya ebibi omo syongyingo syabo! Omugulu bwamabikya, bakakolakyo, kusangwa kiri omo bũtokĩ bwʼebyala byabo.

² Bakarumawa oko malima, ĩbakahũngago; nʼamanyũmba, ibakatwalago; kandi bakanũbaya omundu nʼenyũmba yiwe, omundu nʼomwandu wuwe.

³ Busana nʼekyo, Omwami Mukulu ati, Lebaya, ngategeka ekibi busana nʼekĩtũnga ekĩ, busana nakyo simwendisyatoka eribala, kutse simwendisyalendera nʼeriyiheka; kusangwa asyabya mugulu mubi.

⁴ Oko kiro ekyo basyatwa omũsyo busana nenyũ, nʼeririra ekiriro kyʼobũlĩge, nʼerĩbũga bati, Twabĩrĩherĩbwa kutsibu; akahĩnganaya erĩgabo lyʼabandu bage; akanyĩlũsaya lyoko ati! Akagabira amalima wetu oko bakatswa.

⁵ Busana nʼekyo siwendisyabya nʼomundu oyukakulengako omo kikoba omo kawira omo ndeko yʼOmwami Mukulu.

⁶ Sĩmũbũge, neryo bakatũlago. Nĩkwa bamatendĩsyatũlago oko myatsi eyĩ; ebĩtsũmĩ ĩsĩbyendĩsyasĩngwa.

⁷ Uwe kĩtũnga kya Yakobo, kyasyabũgwa kiti, Omũlĩmũ wʼOmwami Mukulu abiriluha kwehĩ? Eyĩ nĩ mĩbĩrĩ yiwe kwehĩ? Ebĩnywa byage sibyeyira obubuya oko yukalendera omo litunganene kwehĩ?

⁸ Nĩkwa oko migulu eno abandu bage babirihangana ngʼesyonzĩgũ; mukambula ekanzu eyiri oko mũlĩkyetu Omũĩsraelĩ, olukimba lwʼabandu abakalaba batasĩ, kandi olukimba lwʼabandu abakalũa oko malwa.

⁹ Abakalĩ bʼabandu bage, mukahigirabo eyĩhya erĩlũa obuli mundu oko nyũmba yiwe ĩyowene. Mũkalũsaya olukengerwa lwage oko bana babo balere busana na kera na kera.

¹⁰ Muhangane, mugende; kusangwa hano si hʼeriluhukira busana nʼesyonye esĩkaheraya, nʼerihera lĩkalĩre.

¹¹ Omundu amakwama erĩhũnga nʼeribiha, amabiha ati, Nasyababwira busana nʼebĩnyũ nʼobũhĩre kutsibu; iye iniabya mbũyĩ oko bandu aba.

¹² Uwe Yakobo, kwenene nasyabahĩndanĩa ĩnywe bosĩ, kwenene nasyahĩndanĩa abasĩgalira ba Ĩsraelĩ; nasyahĩrabo haguma ngʼesyombũlĩ omo nyũmba, ngʼekihangulo omo lũlĩsĩryo lwasyo; basyahĩra olukanda lunene busana nʼabandu.

¹³ Oyukatulirabo enzira abirihetuka embere syabo; babĩrĩlũamo nʼerilaba omo lũkyo, ibabirihulukira eyĩhya. Nʼomwami wabo abirilaba embere syabo, nʼOmwami Mukulu akaberabo embere.