Matayo 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu akalamaya omundu oyũbasĩre

¹ Neryo Yesu mwingira omo bwato, mwasokera eyisirya wʼengetsi oko mũyĩ wʼeka wuwe.

² Neryo abandu mobamuletera omundu oyũbasĩre, iniagotsere oko ngingo. Nĩkwa Yesu mwalangira erĩkĩrĩrya lyabo, neryo mwabwira oyũbasĩre ati, Mwana wage, Ũsĩkaye omutima! Ebibi byawe byamabibuyirwa.

³ Neryo lebaya, abandi bʼoko bakangĩrĩrya bʼEmigambo mobayibwira bati, Omundu oyũ akatsuma.

⁴ Neryo Yesu mwaminya amalengekanĩa wabo, mwabũga ati, Busana nakĩ mukaganĩraya ebibi byʼomo mitima yenyũ kwehĩ?

⁵ Ekyolo ni kyahi, erĩbũga nyiti, Ebibi byawe byamabibuyirwa, kutse erĩbũga nyiti, Hangana, ugende, kwehĩ?

⁶ Nĩkwa mutoke eriminya kʼomugala wʼomundu awite hamũlĩ omo kihugo eribuyira ebibi, Yesu mwabwira oyũbasĩre ati, Hangana, wĩmaye engingo yawe, uye eka wenyũ!

⁷ Neryo omundu oyo mwahangana, mwaya eka wabo.

⁸ Nĩkwa omugulu abandu balangira ekyo mobubaha, mobapipa Nyamuhanga oyo waha ehamũlĩ iri ngʼeyĩ yʼoko bandu.

Yesu akabirikira Matayo

⁹ Neryo Yesu abere alaba akalũaho, mwalangira omundu oyukahulawa mo Matayo, ĩnĩanĩkere aho bakasoleseraya. Nĩkwa Yesu mwamubwira ati, Unyikwame, neryo Matayo mwahangana, mwamukwama.

¹⁰ Neryo omugulu Yesu abya akalira omo nyũmba, abasolesya bangi nʼabakola-nabi mobasa, mobalya haguma na Yesu nʼabiga buwe.

¹¹ Kandi omugulu Abafarĩsayo balangira batya, mobabwira abiga buwe bati, Busana nakĩ Omũkangĩrĩrya wenyũ akalya haguma nʼabasolesya nʼabakola-nabi kwehĩ?

¹² Nĩkwa omugulu Yesu owa ekĩ, mwabũga ati, Abakalĩre sibali nʼobwaga bwʼomunganga, nĩkwa abalwere.

¹³ Nĩkwa mugende mwige ekĩsakĩre kiti, Ngasonda eriganyira, butsira obuhere bwʼesyonyama; kusangwa sinasa eribirikira abatunganene, nĩkwa abakolanabi.

Omwatsi wʼeritsira akalyo

¹⁴ Neryo abiga ba Yoane Mũbatĩsya mobahĩka uku Yesu bati, Busana nakĩ ĩtwe nʼAbafarĩsayo tukatsira akalyo, nĩkwa abiga bawe sibetsira akalyo kwehĩ?

¹⁵ Yesu mwasũbĩryabo ati, Kwʼabĩra bʼĩba wʼomũherũkĩ banganakwa ngitsi omugulu akine haguma nabo kwehĩ? Nĩkwa ebiro byasyasa omugulu ĩba wʼomũherũkĩ asyalũsĩbwa kubo, neryo oko mugulu oyo basyatsira akalyo.

¹⁶ Sihali omundu oyukalandira ekitomeko kihya-kihya oko lukimba lwa kera, kusangwa ekitomeko kihya-kihya kikatula olukimba, ilwatulika kwilaba erĩmbere.

¹⁷ Kutse sihali omundu oyũkũtũlĩra ebĩnyũ bihya-bihya omo bihu bikulu-kulu byʼebĩnyũ. Kite kitya ebihu byʼebĩnyũ bikatulika, nʼebĩnyũ bĩkũtĩka, nʼebihu byʼebĩnyũ bikatsanda; nĩkwa bakahĩra ebĩnyũ bihya-bihya omo bihu bihyabihya byʼebĩnyũ, nʼebyosĩ bikabya ndeke.

Mwali wa Yaĩro nʼomũkalĩ oyo watũla oko lĩkotĩ rya Yesu

¹⁸ Nĩkwa omugulu Yesu abya akabũga nabo emyatsi eyĩ, omukulu wʼenyũmba yʼerĩhĩndanamo mwasa, mũnama embere sya Yesu erĩmũramya ati, Mwali wage amahola; nĩkwa wase ũmũhĩre kwʼebyala byawe, akandibyaho.

¹⁹ Neryo Yesu mwahangana mwamukwama, nʼabiga ba Yesu mobagenda haguma naye.

²⁰ Neryo omũkalĩ muguma, oyo wabya akwĩre obũkonĩ bwʼerĩlũsya omusasi, oko myaka erĩkũmĩ nʼeyĩbĩrĩ, mwasa enyũma uku Yesu, mwatũla oko mũsĩke wʼolukimba luwe.

²¹ Kusangwa ayibwira ati, Nanatatũla oko lukimba luwe lusa, ngandilama.

²² Nĩkwa Yesu mwabinduka mwamulangira, mwamubwira ati, Ubondere, mwali wage! Erĩkĩrĩrya lyawe lyamabĩkũlamya. Neryo-neryo omũkalĩ oyo mwalamĩbwa.

²³ Neryo Yesu mwaya omo nyũmba yʼomukulu oyo, mwalangira ababũhĩ bʼamalenga nʼendeko ikabũya olukanda.

²⁴ Neryo Yesu mwabũga ati, Mũlũeho! Kusangwa omwana-muto siaholĩre, nĩkwa alito! Nabo mobamuseka.

²⁵ Nĩkwa endeko yabere yabihigirwa eyĩhya, Yesu mwingira aho mwana-muto abya, mwamuhamba oko byala, nʼomwanamuto oyo mwahangana.

²⁶ Nʼengulu yʼomwatsi oyo moyatsungana omo kihugo kyosĩ ekyo.

Yesu akalamaya esyondĩmatĩme ĩbĩrĩ

²⁷ Neryo Yesu abere abĩlũaho, esyondĩmatĩme ĩbĩrĩ mosyamukwama, ibakabirikira kutsibu bati, Utuganyire, uwe Mugala wa Dawĩdĩ!

²⁸ Neryo Yesu abere abingira omo nyũmba, esyondĩmatĩme esyo mosyamũhĩkako, neryo Yesu mwabũlyabo ati, Mwĩkĩrĩrye muti, nangatoka erikola ekĩ kwehĩ? Nabo mobamubwira bati, Ega Mukama.

²⁹ Neryo Yesu mwatũla oko meso wabo, ati, Likoleke ũkwʼĩnywe ngʼerĩkĩrĩrya lyenyũ!

³⁰ Neryo ameso wabo mwalĩbũkala. Kandi Yesu mwahanabo kutsibu ati, Simubwire mundu omwatsi oyũ.

³¹ Nĩkwa mobahuluka, mobatsũnganĩa engulu ya Yesu omo kihugo kyosĩ ekyo.

Yesu akalamaya emũmũ

³² Neryo omugulu bahuluka, lebaya mobaletera Yesu yʼemũmũ oyuli kwʼembĩnga.

³³ Neryo embĩnga eyo yabere yabihigirwa eyĩhya, emũmũ eyo moyabũga, nʼendeko mobasweka bati, Erĩtsũka na kera ekĩsosĩre ekĩ sikyekyatalolwako omo Ĩsraelĩ!

³⁴ Nĩkwa Abafarĩsayo mobabũga bati, Omũtabalĩ wʼesyombĩnga yukaleka iniahigira esyombĩnga syʼeyĩhya.

Yesu akaganyira abandu

³⁵ Kandi Yesu mwalendera omo mĩyĩ yosĩ nʼoko hĩyĩ hyosĩ, iniakakangĩrĩraya omo manyũmba wabo wʼerĩhĩndanamo, nʼerĩtũlaganĩa Engulu Yowene yʼobwami, nʼerĩlamya obuli mũsĩndo wʼendwala nʼobuli mũsĩndo wʼobũkonĩ.

³⁶ Neryo Yesu abere alangira esyondeko, mwakwĩrasyo bũlĩge, kusangwa mobagalwa nʼeriluha ngʼesyombũlĩ sitawite mũlĩsya.

³⁷ Neryo Yesu mwabwira abiga buwe ati, Ebyʼerigesa ni bingi, nĩkwa abangagesa ni bake.

³⁸ Neryo musabe Omukama wʼerigesa yo kutsibu atume abahĩngĩ omwʼigesa liwe.