Matayo 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswera abandi

¹ Simutswere abandi, mukasyatswerwa na Nyamuhanga.

² Kusangwa omũsĩndo mukatswera, gona Nyamuhanga asyabatsweramo; nʼolulengo olo mukalengamo, asyabalenga mulo.

³ Kandi busana nakĩ ukalangira akati akali omo lĩso lya mũlĩkenyũ, nĩkwa sulilangira ekĩtĩka ekiri omo lĩso lyawe kwehĩ?

⁴ Kutse wasyabwira mũlĩkyenyũ uti kwehĩ, uti, Uleke nyilole akati akali omo lĩso lyawe, nĩkwa lebaya, ekĩtĩka kiri omo lĩso lyawe.

⁵ Uwe mũtebya! Ũtsũke erilola ekĩtĩka kyʼomo lĩso lyawe, neryo wasyalangira ndeke erilola akati akali omo lĩso lya mũlĩkyenyũ.

⁶ Simuhe esyombwa syʼekĩbũyĩrĩre, kandi simuguse esyolulu syenyũ embere wʼesyongulube, sikasyalyatangirirasyo omo bisando byasyo, kandi isyabinduka nʼeribatulanga.

Mũbũlaye, mũsondaye, mukongote

⁷ Mũbũlaye, mwasyahabwakyo; musonda-sondaye, neryo mwasyabanakyo; mukongote oko lũyĩ, neryo mwasyakingulirwalo.

⁸ Kusangwa oyũkabũlaya, asyangirirakyo; nʼoyukasonda-sonda, akabanakyo; nʼolũyĩ lwasyakingukala oko yukakongota oko lũyĩ.

⁹ Nindi ũkwʼĩnywe abotata oyo wangaha mugala wuwe erĩbwe omugulu akamũbũlaya obundu kwehĩ?

¹⁰ Kutse mugala amamũbũlya erĩhere, anganamuha enzoka kwehĩ?

¹¹ Nomo mune babi, mũnasĩ eriha abana benyũ bʼolũsũnzo lubuya. Tata wenyũ oyuli elubula sĩalabĩre aho eriha ebindu bibuya oko bakamũbũlaya kwehĩ?

¹² Ebyosĩ ebyo mwanzĩre abandu ibabakolera, nenyũ mukolerebo mutya; kusangwa Emigambo ya Musa nʼerĩkangĩrĩrya lyʼabamĩnyererĩ ko bakabũga batya.

Olũkyo luke

¹³ Mwingire omo lũkyo luke; kusangwa olũkyo ni lunene, nʼenzira ni nenenene eyĩkalolaya okwʼihera, kandi ni bangi abakingira omo lũkyo olo.

¹⁴ Nĩkwa olũkyo ni luke, nʼenzira ni nge eyĩkalolaya oko ngebe, nʼabandu ni bake abakabanayo.

Abamĩnyererĩ bʼamabehĩ

¹⁵ Mũyĩtegaye busana nʼabamĩnyererĩ bʼamabehĩ, abakabahĩkako ĩbayĩsosekenĩe ngʼesyombũlĩ, nĩkwa omwisi wʼemitima yabo ni mbwa syʼomolĩ esĩkalĩre kutsibu.

¹⁶ Mwasyaminyererabo busana nʼemĩbĩrĩ yabo. Ebĩgũma byʼebĩnyũ bikohawa oko misakisaki, kutse emĩtĩnĩ yikohawa oko matolũ kwehĩ?

Omuti nʼebĩgũma byago

¹⁷ Omuti mubuya akahetaya ebĩgũma byowene, nĩkwa omuti mubi akahetaya ebĩgũma bibi.

¹⁸ Omuti owene sialitoka erĩhetya ebĩgũma bibi, kutse omuti mubi sialitoka erĩhetya ebĩgũma byowene.

¹⁹ Obuli muti owatehetaya ebĩgũma byowene akakondawa nʼeriguswa omo muliro.

²⁰ Neryo mwasyaminyerera abamĩnyererĩ bʼamabehĩ busana nʼemĩbĩrĩ yabo.

Sĩnyĩbasĩ

²¹ Si yo mundu oyukanyahula ati, Mukama, Mukama, yo wasyingira omo Bwami bwʼelubula; nĩkwa yo nʼoyukakola erisonda lya Tata wage oyuli elubula.

²² Omugulu ekiro ekyo kyasyasa, abandu bangi basyabũga nage bati, Mukama, Mukama! Omo lĩna lyawe motũtatũla omwatsi wa Nyamuhanga kwehĩ? Nʼomo lĩna lyawe motutahiga esyombĩnga kwehĩ? Kandi omo lĩna lyawe motutakola ebitiko-tiko bingi kwehĩ?

²³ Neryo nasyabwirabo nyiti, Mondabaminya na kera. Mũlũe aho nyiri, ĩnywe bakola-nabi.

Abahĩmbĩ babiri bʼamanyũmba

²⁴ Neryo, obuli mundu oyũkowa ebĩnywa byage ebĩ nʼerikolabyo, asyasosekanĩbwa ngʼomundu wʼamenge, oyo wahĩmba enyũmba yiwe yʼokwʼĩbwe.

²⁵ Embũla moyawa, nʼesyonyũsĩ mosyasenda, nʼekihunga mokyabuhirira, mobyayĩswĩrya oko nyũmba eyo. Nĩkwa moyitatera, kusangwa yahandawa okwʼĩbwe.

²⁶ Kandi obuli mundu oyũkowa ebĩnywa byage ebĩ atekolabyo, asyasosekanĩbwa ngʼomundu mũkĩrũ, oyo wahĩmba enyũmba yiwe yʼoko musege.

²⁷ Neryo embũla moyawa, nʼesyonyũsĩ mosyasenda, nʼekihunga mokyabuhirira, mobyayĩswĩrya oko nyũmba eyo, nayo moyatera. Nʼeritera lyayo molyabya ĩnene.

Ehamũlĩ ya Yesu

²⁸ Yesu abere abibuga erĩkanĩa emyatsi eyĩ, esyondeko mobasweka busana nʼerĩkangĩrĩrya liwe.

²⁹ Kusangwa abya akakangĩrĩrya ngʼoyuwite hamũlĩ, butsira ngʼabakangĩrĩrya babo bʼemigambo.