Matayo 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkangĩrĩrya lya Yesu oko kitwa

¹ Neryo omugulu Yesu alangira esyondeko mwahetukira oko kitwa; neryo abere abĩkala, abiga buwe mobahĩka aho ali.

² Neryo mwatsũka erĩkangĩrĩryabo ati,

³ Obutseme buli oko basĩ ko bali nʼobwaga bwa Nyamuhanga, Kusangwa Obwami bwʼelubula ni bwabo!

⁴ Obutseme buli oko bali nʼobũlĩge, Nyamuhanga asyakĩranĩabo!

⁵ Obutseme buli oko bʼomutima molo, Nyamuhanga asyahabo ebyo alaga!

⁶ Obutseme buli nʼabanzĩre kutsibu erikola ekitunganene ekyo Nyamuhanga anzĩre. Kusangwa Nyamuhanga asyaha kyobo ndeke!

⁷ Obutseme buli oko bakaganyira abandi, Kusangwa Nyamuhanga asyaganyirabo!

⁸ Obutseme buli nʼabʼomutima mubuya, Kusangwa basyalola uku Nyamuhanga!

⁹ Obutseme buli oko bakahĩra Obuholo: Kusangwa Nyamuhanga asyahulabo mo bana buwe!

¹⁰ Obutseme buli oko babĩrĩendererĩbwa busana nʼeritunganene, Kusangwa Obwami bwʼelubula ni bwabo!

¹¹ Obutseme buli nenyũ omugulu abandu bakabatsuma nʼerĩbendererya, nʼeribalega omo mĩsĩndo yosĩ yʼebibi nʼamabehĩ busana nʼomwatsi wage.

¹² Mutseme, mutsange kutsibu, kusangwa oluhembo lwenyũ ni lungi elubula. Ko banendereraya batya abamĩnyererĩ ababya embere syenyũ.

Omũnyũ nʼekyakakala

¹³ Ĩnywe muli mũnyũ wʼekihugo Nĩkwa omũnyũ amatalya obusi bwago, asyaswabana obusi bwago bwʼati kwehĩ? Ĩsyowene busana na kindu; lye nʼeriguswa eyĩhya inialyatangirirwa nʼabandu.

¹⁴ Ĩnywe muli kyakakala kyʼekihugo. Omũyĩ owahĩmbĩre oko kitwa sialitoka erĩbĩsama.

¹⁵ Sihali mundu oyũkakaya etala nʼerĩhĩrayo omwisi wʼekitiri; nĩkwa akahĩrayo oko mbaniko, neryo ĩyakolerya abosĩ abali omo nyũmba.

¹⁶ Muleke ekyakakala kyenyũ kĩkoleraye kitya embere syʼabandu, balangire emĩbĩrĩ yenyũ mibuya, bapipe Tata wenyũ oyuli elubula.

Erĩkangĩrĩrya lyʼEmigambo

¹⁷ Sĩmũganĩraye muti nasa erisangula Emigambo ya Musa nʼerĩkangĩrĩrya lyʼAbamĩnyererĩ. Mondasa erisangulayo, nĩkwa monasa erĩberereryayo.

¹⁸ Kusangwa ngabũga nenyũ kwenene, nyiti, Erĩhĩka aho lubula nʼekihugo byasyahweraho, sihali akakwararĩ kutse katondĩ kʼoko Migambo akakandĩsyalũa oko Migambo erĩhĩka aho ebyosĩ byasyabererera.

¹⁹ Neryo Omundundi oyo wasyaketa ekiguma kike kyʼoko mahano aya, nʼerĩkangĩrĩrya abandu atya, asyahulwa mo muke kutsibu omo Bwami bwʼelubula; nĩkwa Omundundi oyũkaberereraya nʼerĩkangĩrĩryabyo, asyahulwa mo mukulu omo Bwami bwʼelubula.

²⁰ Kusangwa ngababwira nyiti, Eritunganene lyenyũ lyamatendilaba eritunganene lyʼabakangĩrĩrya nʼeryʼAbafarĩsayo, simwendisyingira omo Bwami bwʼelubula.

Omwatsi wʼerihitana

²¹ Mwabĩrĩowa ngoko abakera babwirawa ambu, Sũsyĩta; nʼoyũkĩta ali kʼomusango wʼeritswera.

²² Nĩkwa ngababwira nyiti oyukahitana uku mugala wabo asyaletwa embere wʼomũtswerĩ, kandi oyũkabũga na mugala wabo ati, uwe mbulamugaso; asyabya nʼomusango embere wʼerĩbũgĩro lyʼabatswerĩ; nʼoyũkabũga ati, Uwe mũkĩrũ! Asyabya nʼomusango wʼeriya omo muliro wʼeKũlĩmũ.

²³ Neryo wamabya ukaleta olũsũnzo lwawe oko kiherero kya Nyamuhanga, ukibuka ngoko mũlĩkyenyũ ali nʼolubanza ukʼuwe,

²⁴ ũsĩganaye olũsũnzo lwawe embere syʼekiherero, ugende lũba uku mũlĩkyenyũ, musangane naye, neryo iwasa nʼerireta olũsũnzo lwawe uku Nyamuhanga.

²⁵ Usangane lũba nʼomũtsongerĩ wawe imukinagenda okwʼĩbũgĩro; omũtsongerĩ wawe siakutwale oko mũtswerĩ, nʼomũtswerĩ iniakuha oko mũpolĩsĩ, iwaguswa omo mũlĩkĩ.

²⁶ Kwenene ngakubwira, sĩwendĩsyalũa eyo ute waliha esengĩ eyikabugirira olubanza olo.

Erĩkangĩrĩrya busana nʼerĩsĩngĩra

²⁷ Mwabĩrĩowa ngoko kyabũgawa kiti, Susyesĩngĩra.

²⁸ Nĩkwa ĩngye ngababwira nyiti, Obuli mundu oyukasamalira omũkalĩ nʼengumbu nyibi iniamabimũsĩngĩra omo mutima wuwe.

²⁹ Nʼerĩso lyawe lyʼamali lyamaleka iwakola ebibi, ukuleryo, uguseryo! Kusangwa lyowene ukʼuwe ekĩtsũko kiguma kyʼomubiri wawe ikyahera kwilaba omubiri wawe gosĩ eriguswa eKũlĩmũ.

³⁰ Nʼebyala byawe byʼamali byamaleka iwakola ebibi, ũtwebyo, Ugusebyo! Lyowene ukʼuwe ekĩtsũko kyawe kiguma ikyahera kwilaba omubiri wawe gosĩ eriya omo Kũlĩmũ.

Erĩkangĩrĩrya busana nʼerikomola omũkalĩ

³¹ Kandi kyabũgawa kiti, Oyukakomola mũkalĩwe, amuhe engomolo yʼerimuhiga.

³² Nĩkwa ĩngye ngababwira nyiti, Obuli mundu oyukakomola omũkalĩ wuwe, butsira busana nʼomwatsi wʼerĩsĩngĩra, akaleka ĩnĩasĩngĩra, nʼomundu oyũkahĩkaya omũkalĩ oyuliakomolawa iniamasĩngĩra.

Erĩkangĩrĩrya lyʼerĩlahĩrya

³³ Kandi mwabĩrĩowa ngoko abandu ba kera babwirawa ambu, Susyelahĩraya nʼamabehĩ, nĩkwa wasyakola oko Mukama ebyo walahĩraya.

³⁴ Nĩkwa ngakubwira nyiti, Sũlahĩraye nʼahake; kutse nʼelubula, kusangwa nĩ kĩtũmbĩ kyʼobwami kya Nyamuhanga.

³⁵ Kutse sũlahĩraye nʼekihugo, kusangwa nĩ kĩtũmbĩ kyʼebisando biwe; kutse busana nʼeYerũsalema, kusangwa nĩ mũyĩ wʼOmwami Mukulu.

³⁶ Sũsyelahĩraya nʼomutwe wawe, kusangwa siwangatoka eriyira oluywiri luguma mo lweru kutse mo lwĩragũlũ.

³⁷ Nĩkwa erĩbũga lyenyũ libye, ega, ega, kutse iyihi, iyihi! Ebĩrengĩre ebĩ ni byʼomubi.

Erĩkangĩrĩrya busana nʼerĩkĩsya

³⁸ Mwabĩrĩowa ngoko byabũgawa biti, Erĩso busana nʼerĩso, nʼerĩno busana nʼerĩno.

³⁹ Nĩkwa ĩngye ngakubwira nyiti, Sũkĩsaye oyukakukolera nabi; nĩkwa oyũkakũswĩraya oko lĩtema lyawe lyʼamali, ũmũbindũkĩraye nʼerindi.

⁴⁰ Nʼomundu Oyukasonda erikutsongera, iniakaheka ekanzu yawe, uleke abye nʼerĩkotĩ ryawe nibya.

⁴¹ Kandi omundu oyukakuhatikana eriya oko kilometre kiguma, ugende naye ebilometre bibiri.

⁴² Kandi omundu amakũbũlya kindu, umuhekyo, kandi siguyĩloleraye oko yukasonda eriyibweka ukʼuwe.

Olwanzo busana nʼesyonzĩgũ

⁴³ Mwabĩrĩowa ngoko kyabũgawa kiti, Wanze mũlĩkyenyũ, ũkwe enzĩgũ yawe yʼobusu.

⁴⁴ Nĩkwa ĩngye ngababwira nyiti, Mwanze esyonzĩgũ syenyũ, musabire abakabendereraya,

⁴⁵ imwatoka eribya bagala ba Tata wenyũ oyuli elubula. Kusangwa, akahũlũkaya eryuba liwe oko babi nʼoko babuya, kandi akatuma embũla oko batunganene nʼoko batatunganene.

⁴⁶ Kusangwa mwamanza abasanzĩre, mwasyahemberwakĩ kwehĩ? Abasolesya sibekola batya kwehĩ?

⁴⁷ Kandi mwamabũkya abalĩkyenyũ basa, imwamakola ebĩrengĩre ebyʼabandi byo muti kwehĩ? Abʼebihanda sibekola batya kwehĩ?

⁴⁸ Neryo mubye abahĩkene, ngoko Tata wenyũ wʼelubula ahĩkene.