Matayo 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Erirengwako lya Yesu

¹ Neryo Omũlĩmũ mwasondola Yesu omo mbwarara, eSatanĩ imulengeko.

² Neryo abere atsira akalyo emisibo makũmĩ ani nʼebiro makũmĩ ani, mwakwa enzala.

³ Neryo Satanĩ oyukalenga abandu, mwasa mwamubwira ati, Wamabya uli Mugala wa Nyamuhanga, ubwire amabwe aya abye mandu.

⁴ Nĩkwa Yesu mwamũsũbĩrya ati, Amasako akabũga ati, Omundu siendisyabyaho busana nʼobundu ĩbobwene, nĩkwa busana nʼobuli kĩnywa ekĩkalũa omo buno bwa Nyamuhanga.

⁵ Kandi Satanĩ mwatwala Yesu yʼoko Mũyĩ Abũyĩrĩre; neryo mwamũhĩra oko litungulu lyʼeHekalũ,

⁶ ati, Wamabya uli Mugala wa Nyamuhanga, uyiguse ahisi; kusangwa Amasako ati, Nyamuhanga ayahamula abamalaĩka buwe busana nawe, Basyakubagalira omo byala byabo, Isiwahuma ekisando kyawe kyʼokwʼĩbwe.

⁷ Yesu mwabwirayo ati, Kandi Amasako ati, Susyerenga oko Mukama Nyamuhanga wawe.

⁸ Kandi Satanĩ mwatwala Yesu yʼoko kitwa kiri-kiri, mwamũkangya amami gosĩ wʼekihugo nʼolukengerwa lwago.

⁹ Neryo Satanĩ mwabwira Yesu ati, Ebyosĩ ebĩ nasyakuhabyo wamanyĩkũkamira nʼerĩnyĩramya.

¹⁰ Yesu mwabwirayo ati, Lũaho, uwe Satanĩ! Kusangwa Amasako ati, Wasyaramya Omukama Nyamuhanga wawe, kandi wasyamukolera ĩyowene.

¹¹ Neryo Satanĩ mwamũsĩganĩa; nĩkwa abamalaĩka mobasa nʼerikolera Yesu.

Yesu akatsũka omũbĩrĩ wuwe eGalĩlaya

¹² Neryo omugulu Yesu owa ko Yoane abĩrĩhĩrwa omo mũlĩkĩ, Yesu mwaya eGalĩlaya.

¹³ Neryo Yesu mwalũa eNazaretĩ, mwayĩkala eKapernaũmũ, omũyĩ owali hakũhĩ nʼengetsi yʼeGalĩlaya, omo kihugo kya Zebũlũnĩ na Nafũtalĩ.

¹⁴ Ekĩ kyakolawa erĩberererya ebyo mũmĩnyererĩ Ĩsaya abũga ati,

¹⁵ Ekihugo kya Zebũlũnĩ, nʼekihugo kya Nafũtalĩ, Ebwanga bwʼengetsi, eyisirya wʼeYorodanĩ, EGalĩlaya yʼEbihanda!

¹⁶ Abandu abĩkere omo mwĩrĩmya, Mobalangira ekyakakala kinene! Kandi busana nʼabĩkere omo kihugo nʼomo kyũtsũtsũ kyʼoluholo, Ekyakakala kyamakoleryabo!

¹⁷ Erĩtsũka oko mugulu oyo Yesu mwatsũka erĩtũlaganĩa ati, Mubindule emitima yenyũ erireka ebibi, kusangwa obwami bwʼelubula buli hakũhĩ!

Yesu akabirikira abasohĩ bani

¹⁸ Neryo Yesu abere akalendera hakũhĩ nʼengetsi yʼeGalĩlaya, mwalangira ababiri abasubeneko, Sĩmonĩ oyukahulawa mo Petero, na Anderea, mugala wabo, ibakagusa ekĩsohĩ kyʼomo ngetsi; kusangwa babya basohĩ.

¹⁹ Neryo Yesu mwabwirabo ati, Munyikwame, nage nasyabayira mo basohĩ bʼabandu.

²⁰ Neryoneryo mobasĩganĩa ebĩsohĩ byabo, mobakwama Yesu.

²¹ Neryo mwagenda embere yo hake, mwalangira abandi babiri, Yakobo mugala wa Zebedayo, na Yoane mugala wabo. Babya omo bwato haguma na tata wabo ye Zebedayo, ibakalanda ebĩsohĩ byabo. Neryo Yesu mwabirikirabo.

²² Neryo-neryo mobasĩganĩa ĩse wabo, nʼobwato, mobakwama Yesu.

Yesu akakangĩrĩraya nʼerĩlamya abakonĩ

²³ Kandi Yesu mwatĩmba eGalĩlaya hosĩ, erĩkangĩrĩrya omo manyũmba wabo wʼerĩhĩndanamo, nʼerĩtũlaganĩa Engulu Yowene yʼobwami, nʼerĩlamya abandu bʼobuli mũsĩndo wʼendwala, nʼobuli mũsĩndo wʼobũkonĩ omo katĩkatĩ kʼabandu.

²⁴ Neryo engulu yiwe moyatsungana omo kihugo kyosĩ kyʼeSũrĩa. Kandi mobamuletera abakonĩ bosĩ, abagalawa omo mĩsĩndo-mĩsĩndo yʼesyondwala nʼamagalĩ, nʼabali kwʼesyombĩnga, nʼabatũtsa, nʼababasĩre, nĩkwa Yesu mwalamya abosĩ.

²⁵ Nʼesyondeko nene mosyamukwama ĩbakalũa eGalĩlaya, nʼomo kihugo kyʼeMĩyĩ Ĩkũmĩ, nʼeYerũsalema, nʼe Yũdea, nʼeyisirya wʼeYorodanĩ.