Matayo 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkangĩrĩrya lya Yoane Mũbatĩsya

¹ Oko biro ebyo Yoane Mũbatĩsya mwahĩka, iniakatũlaganaya omwatsi omo mbwarara yʼeYũdea, ati,

² Mubindule emitima yenyũ erireka ebibi, kusangwa obwami bwʼelubula buli hakũhĩ!

³ Yoane yo mundu oyo mũmĩnyererĩ Ĩsaya ahula ati, Omulenge wʼoyukabirikirira omo mbwarara ati, Mowanaye enzira yʼomukama, Mũtũngananaye esyombalu siwe!

⁴ Esyongimba sya Yoane syabya syʼobweya bwʼengamia, kandi mwambala omukoba wʼekihu omo mbindi yiwe, kandi iniakalya esyongĩke nʼobuki bwʼomolĩ.

⁵ Abandu mobahĩka uku Yoane ĩbakalũa eYerũsalema, nʼeYũdea hosĩ, nʼebihugo bĩhererenĩe nʼeYorodanĩ.

⁶ Mobakangya ebibi byabo, neryo Yoane mwabatĩsyabo omo lũsĩ lwʼeYorodanĩ.

⁷ Neryo Yoane abere alangira Abafarĩsayo nʼAbasadũkayo bangi bakahĩka busana nʼerĩbatĩsĩbwa, mwabwirabo ati, Ĩnywe bana bʼesyonzoka, nindi wabahana erisaga erikarama erĩkandĩsyahĩka kwehĩ?

⁸ Mukole emĩbĩrĩ eyikaleka abandu ibaminya ko mwabiribindula emitima erireka ebibi byenyũ.

⁹ Sĩmũganĩraye mukayibwira muti, Abrahamũ ni tata wetu. Ngababwira nyiti, Nyamuhanga angatoka erĩhanganĩa amabwe aya mo bana busana na Abrahamũ.

¹⁰ Kandi embasa ĩnĩkĩrye oko mĩrĩhĩ yʼomuti. Obuli muti owatehetaya ebĩgũma byowene akakondawa nʼeriguswa omo muliro.

¹¹ Nĩkwa ĩngye ngababatĩsaya omo magetsi erĩkangya ngoko mwabiribindula emitima yenyũ erireka ebibi; nĩkwa oyukandisyasa enyũma kwĩngye asyababatĩsya omo Mũlĩmũ Abũyĩrĩre nʼomo muliro. Kandi anyĩrengĩrye maka, nage sinyitolere erimuhekera esyongendero siwe.

¹² Omũhũmbo wuwe ali omo byala biwe erĩhũmbĩra engano omo kibuga kiwe nʼerĩhĩra engano yiwe omo kigona, nĩkwa asyahĩsya omusunga omo muliro owatehumbera.

Erĩbatĩsĩbwa lya Yesu

¹³ Neryo Yesu mwalũa eGalĩlaya mwahĩka oko Yorodanĩ, mwasa uku Yoane erĩbatĩsĩbwa.

¹⁴ Nĩkwa Yoane mwalenga erĩmũganĩa, ati, Ĩngye nyitolere erĩbatĩsĩbwa nawe, kandi ũkanyĩhĩkako kwehĩ?

¹⁵ Nĩkwa Yesu mwamũsũbĩrya ati, Ũnyĩrĩgĩre lino. Kusangwa omo nzira eyĩ litolere ĩtwaberererya ebitunganene byosĩ bya Nyamuhanga. Neryo Yoane mwalĩga.

¹⁶ Neryo Yesu abere abĩbatĩsĩbwa, mwalũa omo magetsi. Neryo olubula molwakingukala busana naye, neryo mwalangira Omũlĩmũ wa Nyamuhanga akandagala ngʼakalĩkũkũ, nʼerĩmwĩkĩrako.

¹⁷ Neryo omulenge mwalũa elubula ati, Oyũ ni Mugala wage mwanze, namamutsemera ndeke.