Matayo 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Bakatwala Yesu uku Pilato

¹ Neryo bwabere bwabya tũtũtũ, abahererĩ bakulu bosĩ nʼabakulu bʼabandu mobaya embĩta yʼerĩĩta Yesu.

² Neryo mobaboha Yesu omo mahulula, mobamutwala oko mũtabalĩ Pilato.

Erihola lya Yũda

³ Neryo Yũda, omũhoterĩ wa Yesu, abere abilangira ko Yesu amabitswerwa ambu akwe, mwabinduka, mwasũbya ebihande byʼebĩtsĩpa makũmĩ asatu oko bahererĩ bakulu nʼabakulu bʼAbayũda.

⁴ Ati, Nabirikola nabi ngahotera omundu oyute nʼolubanza nyiti akwe. Nabo mobabũga bati, Tutsomene ekyo kwehĩ? Olo ni lwawe!

⁵ Neryo Yũda mwagusa ebihande byʼebĩtsĩpa ebyo byʼahisi omo Hekalũ, neryo mwalũaho, Neryo Yũda mwagenda mwayayihanika.

⁶ Neryo abahererĩ bakulu mobĩmya ebihande byʼebĩtsĩpa bati, Siritolere omo Migambo yetu erĩhĩrabyo omo kĩbo kyʼeHekalũ kusangwa ni nzwere yʼomusasi.

⁷ Neryo mobaya embĩta, mobagula kubyo kwʼEkitaka kyʼomũbũmbĩ, busana nʼerita kukyo kwʼabandu bʼehandi.

⁸ Kikaleka ibahula ekitaka ekyo mo Kitaka kyʼomusasi erĩhĩka na mũnabwĩre.

⁹ Neryo mobyabererera ebyabũgawa nʼomũmĩnyererĩ Yeremĩa ati, Mobĩmya ebihande byʼebĩtsĩpa amakũmĩ asatu, enzwere yoyo abandu ba Ĩsraelĩ bahĩra busana naye.

¹⁰ Kandi mobahabyo busana nʼEkitaka kyʼomũbũmbĩ, ngoko Mukama anyihana.

Pilato akabũlaya Yesu

¹¹ Nĩkwa Yesu mwahangana embere wʼomũtabalĩ. Naye mwamũbũlya ati, Uli mwami wʼAbayũda kwehĩ? Yesu mwasũbĩrya ati, Wamabũgakyo.

¹² Nĩkwa mwatasũbyakĩ omugulu abahererĩ bakulu nʼabakulu bʼAbayũda bamuhandikirira.

¹³ Neryo Pilato mwabũga naye ati, Sũlĩtowa emyatsi yingaha bakakuhandikirira kwehĩ?

¹⁴ Nĩkwa Yesu mwatamũsũbĩrya omo mwatsi nʼomuguma bamuhandikirira, kyaleka omũtabalĩ iniasweka kutsibu.

Yesu akatswerawa erĩkwa

¹⁵ Neryo oko buli kiro kikulu kyʼErikiruka, omũtabalĩ agenda akaboholera endeko yʼomundu muguma wʼomũlĩkĩ oyo banzĩre.

¹⁶ Nĩkwa oko mugulu oyo babya babohĩre mundu wʼomũlĩkĩ muguma oyũkũmayĩre, omundu oyukahulawa mo Baraba.

¹⁷ Neryo omugulu endeko yahĩndana, Pilato mwabũga nabo ati, Mwanzĩre inababoholerandi kwehĩ? Ye Baraba, kutse Yesu oyukahulawa mo Kristo kwehĩ?

¹⁸ Kusangwa Pilato abya asĩ ko bahotera Yesu busana nʼerimutsura.

¹⁹ Kandi omugulu Pilato abya ĩkere oko kĩtũmbĩ kyʼeritswera bandu, omũkalĩ wuwe mwamutumako ati, Subye nʼahake oko mwatsi wʼomundu oyutunganene, kusangwa omo kiro kya mũnabwĩre nabiriagalwa kutsibu omwʼilota busana naye.

²⁰ Nĩkwa abahererĩ bakulu nʼabakulu mobatsotsererya esyondeko bati babũlaye Pilato aboholerebo Baraba, nĩkwa bati, Yesu ĩtawe.

²¹ Nĩkwa omũtabalĩ mwabũlyabo ati, Oko babiri aba mwanzĩre inababoholera wahi kwehĩ? Nabo mobasũbĩrya bati, Ye Baraba.

²² Neryo Pilato mwabũga ati, Nyĩkolekĩ na Yesu oyukahulawa mo Kristo kwehĩ? Abosĩ mobabũga bati, Abambawe oko musalaba!

²³ Nĩkwa Pilato mwabũlyabo ati, Amakola kibi kyahi kwehĩ? Nĩkwa mobalabya kwʼaho emirenge yabo, bati, Abambawe oko musalaba!

²⁴ Neryo Pilato abere alangira kwʼamalemerwa nʼomwatsi, nĩkwa omwaga kwʼamatsũka, mwĩmya amagetsi mwanaba oko byala embere syʼendeko ati, Sindi kʼomusango wʼomusasi wʼomundu oyũ! Olũ nĩ lwenyũ!

²⁵ Neryo endeko yosĩ moyasũbĩrya iti, Omusasi wuwe atubyeko nʼoko bana betu!

²⁶ Neryo Pilato mwaboholerabo Baraba, nĩkwa mwaswĩrya Yesu omo mikoba, neryo Pilato mwahereryabo Kristo ati abambawe oko musalaba.

Abasĩrĩkanĩ bakasekereraya Yesu

²⁷ Neryo abasĩrĩkanĩ bʼomũtabalĩ mobatwala Yesu oko Kikali, neryo mobahĩndanĩa omulondo gosĩ hakũhĩ naye.

²⁸ Neryo mobambula Yesu yʼesyongimba siwe, mobamwambalya ekanzu yʼOmunyama.

²⁹ Neryo mobaluka embĩta yʼamahwa, mobahĩrayo oko mutwe wuwe, kandi mobahĩra oluseke lʼomo byala biwe byʼamali, kandi mobamũkũkamira nʼerĩmũsekererya, bati, Ukote, uwe Mwami wʼAbayũda!

³⁰ Neryo mobamũtwĩra kwʼamatande, kandi mobahamba oluseke olo mobatsũka erĩswĩrya Yesu oko mutwe.

³¹ Neryo babere babĩmũsekererya, mobamwambula ekanzu eyo, mobasyamwambalya esyongimba siwe, mobamutwala eriyamubamba oko musalaba.

Bakabamba Yesu oko musalaba

³² Kandi babere bakalũaho mobahĩndana nʼomundu akalũa eKũrene oyukahulawa mo Sĩmonĩ. Mobahatikana omundu oyo erihekera Yesu yʼomusalaba wuwe.

³³ Neryo babere bahĩka ahakahulawa mo Gologota, eribindula liti, Ahʼamahanga;

³⁴ eyo mobamuha ebĩnyũ ebĩtũlũngene nʼendulu, apũlaye, neryo abere abĩgeryabyo, mwaganabyo.

³⁵ Neryo mobabamba Yesu oko musalaba, neryo mobagabana esyongimba siwe, mobakanga obukanga busana nasyo.

³⁶ Neryo mobĩkala ahisi, mobamũteya aho.

³⁷ Mobahĩra endata oko mutwe wuwe erihandikirira eryo bamuhandikirira, bati, OYŨ NI YESU OMWAMI WʼABAYŨDA.

³⁸ Kandi mobabamba abanyeyĩ babiri oko misalaba haguma na Yesu, omuguma oko luhande lwʼamali, nʼogundi oko luhande lwʼamalembe.

³⁹ Neryo abandu abalabaho mobatsuma Yesu, ĩbakatsĩngaya emitwe yabo,

⁴⁰ bati, Uwe ukasambula eHekalũ nʼerĩswahĩmbayo omo biro bisatu, ũyĩlamaye! Wamabya uli Mugala wa Nyamuhanga, ũkĩme oko musalaba!

⁴¹ Abahererĩ bakulu nʼabakangĩrĩrya bʼEmigambo nʼabakulu, nabo mobasekererya Yesu bati,

⁴² Mwalamya abandi, nĩkwa sialitoka erĩyĩlamya! Iye ni Mwami wʼAbaĩsraelĩ, akĩme oko musalaba, netu twasyamwĩkĩrĩrya!

⁴³ Akayiketera Nyamuhanga, amũlamaye lino, amabya amũsĩmĩre. Kusangwa mwabũga ati, Ĩngye indi Mugala wa Nyamuhanga.

⁴⁴ Kandi abanyeyĩ ababambawa oko misalaba kuguma na Yesu, nabo mobamutsuma batya.

Oluholo lwa Yesu

⁴⁵ Neryo bwabere bwahĩka saa ndatu omwĩrĩmya mwaswika ekihugo kyosĩ, erĩhĩka oko saa tĩsa.

⁴⁶ Neryo oko saa tĩsa Yesu mwayilakira nʼomulenge munene ati, Eloĩ, Eloĩ, lama sabaktanĩ? Eribindula liti, Nyamuhanga wage, Nyamuhanga wage, busana nakĩ ũkanyĩsĩganaya kwehĩ?

⁴⁷ Neryo abandi ababya bahangeneho bakahulikirira, mobabũga bati, Omundu oyũ akabirikira Elĩa.

⁴⁸ Neryo lũba omuguma wa kubo mwatibita mwĩmya embũhũma, mũsũlya muyo mwʼepada, mwahĩrayo oko luseke, mwahayo Yesu erĩpũlyayo.

⁴⁹ Nĩkwa abandi bati, Tulinde, tũlebaye Elĩa ngʼanasa nʼerĩmũlamya.

⁵⁰ Neryo Yesu mwaswalaka nʼomulenge munene, neryo mwataswahumula.

⁵¹ Neryo lebaya, olukimba olũkasũkũlĩraya olʼomo Hekalũ molwasatika mo bihande bibiri, erĩtsũka endata nʼerĩhĩka ahisi. Nʼekitaka mokyatitimana, nʼamabwe mwasatangika.

⁵² Nʼesisinda mosyalĩbũkala, neryo abandu bangi ba Nyamuhanga ababya ibabirihola, mobalũbũkĩbwa.

⁵³ Mobalũa omo sisinda enyũma wʼerĩlũbũka lya Yesu, mobaya omo mũyĩ abũyĩrĩre, mobabutukira abandu bangi.

⁵⁴ Nĩkwa omugulu omukulu wʼabasĩrĩkanĩ nʼabasĩrĩkanĩ ababya haguma naye bakateya Yesu, babere balangira omũsĩkĩ, nʼemyatsi eyo yabya, mobubaha kutsibu bati, Kwenene oyũ alũe Mugala wa Nyamuhanga!

⁵⁵ Kandi habya bakalĩ bangi ibakasamalira ibimene hali. Nabo ba babya bakakwama Yesu ĩbakalũa eGalĩlaya, ĩbakamũwatĩkaya.

⁵⁶ Kandi Marĩa Magdalene, na Marĩa nyĩnya wa Yakobo na Yese, na nyĩnya wʼabagala ba Zebedayo babya haguma nabo.

Eritabwa lya Yesu

⁵⁷ Neryo bwabere bwabya ĩgolo-golo, omundu wʼebindu mwasa Omunya Arĩmatea, erĩna liwe iyo Yosefũ, naye abya mwiga wa Yesu nibya.

⁵⁸ Omundu oyo mwasa uku Pilato, mwasaba omubiri wa Yesu. Neryo Pilato mwahamula Yosefũ ahabawego.

⁵⁹ Neryo Yosefũ mwĩmya omubiri wa Yesu, mwalĩngĩra kugo kʼolukimba lowene lwʼekĩtanĩ.

⁶⁰ Neryo mwahĩrago omwʼisinda yiwe nyihyanyihya eyo abatsa omwʼĩbwe. Kandi Yosefũ mwakũmbagalĩrya erĩbwe rĩnene oko lũkyo lwʼeyisinda, neryo mwalũaho.

⁶¹ Marĩa Magdalene, nʼogundi Marĩa ababiri bosĩ babya bĩkere eyisirya okwʼisinda.

Abateya okwʼisinda

⁶² Neryo engyakya, ekiro ekikakwama ekiro kikulu kyʼErĩkokotya, abahererĩ bakulu nʼAbafarĩsayo mobahĩndana embere sya Pilato,

⁶³ bati, Mukama twamibuka ngoko mũtebya oyo abũga omugulu abya akiriho ati, Enyũma wʼebiro bisatu nasyalũbũka.

⁶⁴ Neryo, uhamule uti eyisinda ĩteyĩbawe erĩhĩka oko kiro kyʼakasatu ekyo, abiga buwe bakasyahĩka, bakamwĩba, ibabwira bandu bati, Abĩrĩlũbũka oko baholĩ, neryo, erĩtebya lyʼenyũma iryabya libi kwilaba eryʼerĩmbere.

⁶⁵ Nĩkwa Pilato mwabwirabo ati, Mwĩmaye abateya, mugende, mũtegaye eyisinda yo ndeke ngoko mwangakola.

⁶⁶ Neryo mobagenda, mobateya eyisinda yo ndeke, mobahĩraho abateya, kandi mobahĩra ekĩmĩnyĩsyo okwʼĩbwe.