Matayo 26 - AMASAKO ABOYTRTRE WA NYAMUHANGA AWAKAHULAWA MO BIBLIA

Embĩta yʼerĩĩta Yesu

¹ Neryo Yesu abere abĩbũga ebĩnywa byosĩ ebĩ, mwabwira abiga buwe ati.

² Mũnasĩ enyũma wʼebiro bibiri Erikiruka lĩkahĩka, nʼomugala wʼomundu asyahoterwa busana nʼeribambwa oko musalaba.

³ Neryo abahererĩ bakulu nʼabakulu bʼabandu bʼAbayũda mobahĩndana haguma omo muhana gʼomukulu wʼabahererĩ bosĩ, ye Kayafa.

⁴ Neryo mobaya embĩta yʼerihamba Yesu nʼamenge, nʼerĩmwĩta.

⁵ Nĩkwa mobabũga bati, situkolekyo omo kiro kikulu, hakasyabya eyĩsesĩ omo katĩkatĩ kʼabandu.

Yesu akũtũlĩrawako amagũta

⁶ Omugulu Yesu abya eBetanĩa omo nyũmba ya Sĩmonĩ omuhaga,

⁷ omũkalĩ mwahĩka ahali Yesu, iniawite okwʼĩtambya lyʼamagũta awakakumba ndeke awʼenzwere nene, neryo mũtago oko mutwe wa Yesu omugulu abya akalya.

⁸ Nĩkwa omugulu abiga balangira ekyo, mobahitana bati, Busana nakĩ amagũta aya akahera busa kwehĩ?

⁹ Amagũta awakakumba ndeke aya kumbe angagũlĩbwe esyofranka nyingi isyahabwa abera.

¹⁰ Nĩkwa Yesu, mwaminya ebyo, mwabwirabo ati, Busana nakĩ mũkendereraya omũkalĩ kwehĩ? Kusangwa abirinyikolera omũbĩrĩ mubuya.

¹¹ Kusangwa muli nʼabera ebiro byosĩ, nĩkwa ĩngye Sindi haguma nenyũ ebiro byosĩ.

¹² Kusangwa omugulu alyũta amagũta awakakumba ndeke aya oko mubiri wage, alyakola atya erinyĩsũga busana nʼerinyita.

¹³ Kwenene ngabũga nenyũ, Aho Engulu Yowene yasyatũlaganĩbwa omo kihugo kyosĩ, ebyo mũkalĩ oyũ akabikola byasyatũlaganĩbwa busana nʼerimwibuka.

Yũda akalĩga erihotera Yesu

¹⁴ Neryo omuguma wʼoko biga ĩkũmĩ nʼababiri, oyukahulawa mo Yũda Ĩskarĩota, mwaya oko bahererĩ bakulu,

¹⁵ mwabũlyabo ati, Mwamalĩga erimbakĩ namahotera Yesu ũkwʼĩnywe kwehĩ? Nabo mobamulengera ebihande byʼebĩtsĩpa makũmĩ asatu.

¹⁶ Erĩtsũka oko mugulu oyo, Yũda mwasonda-sondya omwanya wʼerihotera Yesu.

Yesu akalya Erikiruka haguma nʼabiga buwe

¹⁷ Neryo oko kiro kyʼerĩmbere kyʼerirya obundu Bute mo Kĩhamya, abiga mobahĩka uku Yesu, bati, Wanzĩre ĩtwakũkokoterya erirya lyʼErikiruka lyo hahi kwehĩ?

¹⁸ Neryo Yesu mwabwirabo ati, Mugende omo mũyĩ, oko mundu mulebe, mumubwire muti, Omũkangĩrĩrya ati, Omugulu wage abĩrĩhĩka, neryo abiga bage haguma nage twasyalya Erikiruka omo nyũmba yawe.

¹⁹ Neryo abiga mobakola ngoko Yesu ategekabo, neryo mobakokotya erirya lyʼErikiruka.

²⁰ Neryo erĩgolo-golo lyabere ryahĩka, Yesu nʼabiga erĩkũmĩ nʼababiri mobĩkala okwʼirya.

²¹ Neryo babere bakalya, Yesu mwabũga ati, Kwenene ngabũga nenyũ, omuguma wʼũkwʼĩnywe akandinyihotera.

²² Nabo mobakwa bũlĩge bunene, mobatsũka erĩbũlya Yesu muguma muguma, bati, Mukama ĩkwa nĩ ĩngye kwehĩ?

²³ Yesu mwasũbĩryabo ati, Oyũkakolaya ebyala biwe omo kibindi haguma nage yukandinyihotera.

²⁴ Omugala wʼomundu akagenda ngoko kĩsakĩre busana naye, nĩkwa obũlĩge oko mundu oyukahotera Omugala wʼomundu! Kumbe lyowene busana nʼomundu oyo nga siabutawa!

²⁵ Neryo Yũda, oyo wamuhotera, mwasũbĩrya ati, Mũkangĩrĩrya, ĩkwa nĩ ngye kwehĩ? Yesu mwamũsũbĩrya ati, Wamabĩbugakyo.

Erirya lyʼomukama

²⁶ Neryo omugulu babya bakalya, Yesu mwĩmya obundu, neryo abere abitsumulabo, mwatsũtsangabo, mwahabo abiga ati, Mwĩmayebo, mulye; oyũ ni mubiri wage.

²⁷ Neryo mwĩmya olũtehĩ mwaha ewasĩngya, neryo mwahalobo ati, Mũpũlaye kulo, ĩnywe bosĩ.

²⁸ Kusangwa oyũ ni musasi wage, omusasi wʼendagane, omusasi wage owakũtawa busana nʼabangi, busana nʼeribuyira ebibi.

²⁹ Nĩkwa ngababwira, sindiendisyaswapũlya oko bĩgũma ebĩ byʼebĩnyũ erĩtsũka lino erĩhĩka oko kiro nasyapũlya ebihyabihya haguma nenyũ omo bwami bwa Tata wage.

³⁰ Neryo babere babiimba Olwimbo, mobaya oko kitwa kyʼeMĩzeĩtũnĩ.

Yesu akaminyerera eriyigana lya Petero

³¹ Neryo Yesu mwabwirabo ati, Ĩnywe bosĩ mukandinyitswako oko kiro ekĩ, kusangwa amasako ati, Nyamuhanga asyaswĩrya omũlĩsya, nʼesyombũlĩ syʼomo kĩhyo syasyapanzikana.

³² Nĩkwa nasyabya nabĩlũbũkĩbwa, nasyabatanga eGalĩlaya.

³³ Nĩkwa Petero mwabũga naye ati, Nomo abosĩ bangatswa busana nawe, ĩngye sindiendisyakutswako na kera.

³⁴ Yesu mwabũga naye ati, Kwenene ngabũga nawe, omo kiro ekĩ kya mũnabwĩre, engoko-lume ite yabika, ukandinyigana ngendo ĩsatu.

³⁵ Petero mwamubwira ati, Sindiendikugana, nomo nangahola haguma nawe. Nʼabiga bosĩ mobabũga batya.

Yesu akasaba eGetesemane

³⁶ Neryo Yesu haguma nʼabiga buwe mobaya ahakahulawa mo Getesemane, neryo mwabwira abiga buwe ati, Mwĩkale hano omugulu ngaya halya eriyasaba.

³⁷ Neryo mwatwala Petero nʼabagala babiri ba Zebedayo, neryo mwatsũka eribya nʼobũlĩge nʼerĩhahũkya omutima.

³⁸ Neryo mwabwirabo ati, Omutima wage ali nʼobũlĩge bunene bukasonda erĩnyĩta. Mũsĩgale hano, mũtegaye haguma nage.

³⁹ Neryo mwaya embere yo hake, mwawa ahisi, mwasaba ati, Tata wage, kyamatokekana, Ũnyĩlũsaye kwʼolũtehĩ olũ! Nĩkwa butsira ngoko nyazĩre, nĩkwa ngoko wanzĩre.

⁴⁰ Neryo mwasuba ahali abiga basatu mweyabo ibanagotsere, neryo mwabũga na Petero ati, Mwatalũkĩre erĩteya haguma nage esaa nguma kwehĩ?

⁴¹ Mubye mukasaba nʼerĩteya, isimwingira omwʼirengwako; omutima akalĩga, nĩkwa omubiri ni molo.

⁴² Kandi engendo yʼakabiri Yesu mwayasaba ati, Tata wage, olũtehĩ olũ lwamatenditokekana erĩnyĩlũako namatindapũlyalo, erisonda lyawe likolawe.

⁴³ Kandi mwasa mweyabo ibaneto, kusangwa ameso wabo ĩnĩalĩtohĩre.

⁴⁴ Kandi Yesu mwasĩgabo, mwayasaba engendo yʼakasatu, iniakasuba omo bĩnywa ebyo kandi.

⁴⁵ Neryo mwasuba oko biga, mwabwirabo ati, Mukineto, mukinauhuka kwehĩ? Lebaya! Endambĩ yamahĩka, nʼomugala wʼomundu akahĩrawa omo byala byʼabandu babi.

⁴⁶ Muhangane, tugende! Mũlebaye, oyukanyihotera yoyũ hano!

Bakahamba Yesu

⁴⁷ Neryo Yesu abere akĩnabũga, lebaya, Yũda, omuguma wʼoko biga ĩkũmĩ nʼababiri, mwasa. Haguma naye habya endeko nene eyĩhekĩre emĩyalĩ nʼesyongonĩ, ibakatumawa nʼabahererĩ bakulu nʼabakulu bʼAbayũda.

⁴⁸ Neryo oyo wamuhotera mwahabo ekĩmĩnyĩsyo ati, Oyo ngandilyatsirira, ini iye; mumuhambe!

⁴⁹ Neryo Yũda abere ahĩka, mwaya uku Yesu ati, Wasĩbĩre, Mũkangĩrĩrya! neryo mwamulyatsirira.

⁵⁰ Neryo Yesu mwamubwira ati, Mwĩra, Ukole ekyo uliasira! Neryo mobahĩka mobahamba Yesu mobamuwatako kutsibu.

⁵¹ Neryo lebaya, omuguma wʼoko bandu ababya na Yesu mwasumba ebyala biwe mwakula omũyali, mwabanda omukobe wʼomukulu wʼabahererĩ bosĩ, mwatwa okũtũ kuwe.

⁵² Neryo Yesu mwabũga naye ati, Sũbaya omũyalĩ gʼomo lubo lwago; kusangwa abosĩ abakawata oko mũyalĩ, basyahera omo mũyalĩ.

⁵³ Kutse Ũkaganĩraya uti sinangatoka erilakira Tata wage, naye iniamba abamalaĩka elfu makũmĩ alinda nʼĩbĩrĩ kwehĩ?

⁵⁴ Nĩkwa Amasako asyabererera ati awakabuga ati, Litolere ibyabya bitya?

⁵⁵ Oko ndambĩ eyo Yesu mwabũga nʼendeko ati, Mwabiriasa nʼemĩyalĩ nʼesyongoni erinyihamba ngʼabakahamba omũnyeyĩ kwehĩ? Obuli kiro nabya nyĩkere omo Hekalũ ngakangĩrĩrya, momutanyihamba.

⁵⁶ Nĩkwa ebyosĩ ebĩ byabiribya bitya erĩberererya ebyo bamĩnyererĩ basaka. Neryo abiga bosĩ mobamutswako, mobatibita.

Yesu akahĩka omwʼĩbũgĩro

⁵⁷ Neryo abahamba Yesu mobamutwala ewʼomukulu wʼabahererĩ bosĩ ye Kayafa, aho abasakĩ bʼEmigambo nʼabakulu babya bahĩndene.

⁵⁸ Nĩkwa Petero mwamukwama enyũma inianayĩsũnĩre, mwahĩka oko muhana gʼomukulu wʼabahererĩ bosĩ. Neryo Petero mwingira omo muhana, mwĩkala nʼabateya erilangira endũlĩ yʼomwatsi.

⁵⁹ Nĩkwa abahererĩ bakulu nʼabʼomwʼĩbũgĩro mobasonda-sonda emyatsi yʼamabehĩ busana na Yesu, ibatoka erĩmwĩta.

⁶⁰ Nĩkwa mobatabana ebyʼamabehĩ, nomo abatũlĩ bʼamabehĩ bangi banahĩkaho. Nĩkwa enyũma wʼaho ababiri bʼamabehĩ mobahĩka,

⁶¹ bati, Omundu oyũ mwabũga ati, Ĩngye nangatoka erĩhĩmbũla eHekalũ ya Nyamuhanga, nʼerĩswahĩmbayo omo biro bisatu.

⁶² Neryo omukulu wʼabahererĩ bosĩ mwahangana, mwabũlya Yesu ati, Sũlĩsũbĩraya kwehĩ? Ni byahi ebyo bandu aba bakakũhandĩkĩrĩraya kwehĩ?

⁶³ Nĩkwa Yesu mwabya bũkũtũ. Neryo omukulu wʼabahererĩ bosĩ mwabwira Yesu ati, Ngakusema busana na Nyamuhanga oyuliho, utubwire wamabya uli Kristo, Mugala wa Nyamuhanga.

⁶⁴ Yesu mwabũga naye ati, Uwe wamabũgakyo, nĩkwa ngababwira nyiti, Enyũma wʼaho mwasyalangira Omugala wʼomundu ĩnĩanĩkere oko byala byʼamali byʼOmũtokĩ Wʼebyosĩ, iniakasa oko bĩtũ byʼekyanya.

⁶⁵ Neryo omukulu wʼabahererĩ bosĩ mwatulanga ekanzu yiwe, ati, Abiritsuma! Tukine nʼobwaga bwʼabalangĩrĩ kwehĩ? Lebaya, mwamabyowa eritsuma liwe!

⁶⁶ Mũkaganĩrayakĩ kwehĩ? Nabo mobasũbĩrya bati, Atolere oluholo!

⁶⁷ Neryo mobatwĩra matande omo bũsũ bwa Yesu nʼerĩmũswĩrya ebĩkũndĩ, nʼabandi mobamũswĩrya esyongũmbe.

⁶⁸ Mobabũga bati, Uwe Kristo, utuminyerereko! Nindi wamakũswĩrya kwehĩ?

Petero akagana Yesu

⁶⁹ Nĩkwa Petero abya ĩnĩanĩkere eyĩhya omo muhana. Neryo omugombe mwana-muto muguma mwamũhĩkako ati, Nawe wabya na Yesu Omũgalĩlaya.

⁷⁰ Nĩkwa Petero mwayigana embere wʼabosĩ ati, Sĩnyasĩ ebyo ũkabũga nga ni byahi.

⁷¹ Neryo Petero mwaya eyĩhya oko lũkyo lwʼomuhana, nʼogundi mugombe mwana-muto mwamulolako, mwabwira bandu ababyaho ati, Omundu oyũ abya na Yesu Omũnazaretĩ.

⁷² Neryo Petero mwaswagana nʼerĩlahĩrya ati, Sĩnyasĩ omundu oyo.

⁷³ Kandi enyũma hake ababya bimeneho mobahĩka mobabwira Petero bati, Kwenene nawe uli muguma wa kubo, kusangwa emĩbũgĩre yawe ĩkakũmĩnyĩkalaya.

⁷⁴ Neryo Petero mwatsũka eritakira nʼerĩlahĩrya ati, Sĩnyasĩ omundu oyo! Neryo-neryo engoko-lume moyabika.

⁷⁵ Neryo Petero mwibuka ekĩnywa ekyo Yesu abũga ati, Engoko-lume ite yabika, ukandinyigana ngendo ĩsatu. Neryo mwahulukira eyĩhya, mwalira nʼobũlĩge.