Matayo 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũsyo wʼabana-bato ĩkũmĩ

¹ Oko mugulu oyo Obwami bwʼelubula bwasyalingana nʼabana-bato ĩkũmĩ, abaheka esyotala syabo, nʼerĩyahĩndana nʼĩba wʼomũherũkĩ.

² Abatanu ba kubo babya bakĩrũ, nʼabatanu babya bʼamenge.

³ Omugulu abakĩrũ baheka esyotala syabo, mobataheka amagũta haguma nabo.

⁴ Nĩkwa abʼamenge mobaheka amagũta omo matambya haguma nʼesyotala syabo.

⁵ Neryo ĩba wʼomũherũkĩ mwamala yo ndambĩ, neryo abana-bato abo mobayitsingirako, mobayato.

⁶ Nĩkwa omo katĩ-kanene omulenge mwabirikira ati, Ĩba wʼomũherũkĩ yoyũ! Mwase, mũhĩndane naye!

⁷ Neryo abanabato ĩkũmĩ abo mobahangana, mobatwa amakala oko syotala syabo.

⁸ Neryo abakĩrũ mobabwira abʼamenge bati, Mutuhe oko magũta wenyũ, kusangwa esyotala syetu sikahumbera.

⁹ Nĩkwa abʼamenge mobasũbĩrya bati, Iyihi, sienditutsungana ĩtwe, nenyũ. Mugende oko bakatũndaya muyigulirego.

¹⁰ Neryo abakĩrũ mobayagulago, neryo ĩba wʼomũherũkĩ mwahĩka. Abana-bato batanu ababya bakateya mobingira haguma naye okwʼirya lyʼerĩherũkya. Nʼolũyĩ molwakingwa.

¹¹ Enyũma wʼaho abandi bana-bato abo mobahĩka bati, Mukama, Mukama, utukingulire.

¹² Neryo ĩba wʼomũherũkĩ mwasũbĩrya ati, Kwenene ngabũga nenyũ, Sĩnyĩbasĩ.

¹³ Neryo Yesu mwabũga ati, Neryo mũtegaye, kusangwa sĩmwasĩ ekiro kutse endambĩ.

Omũsyo wʼabagombe basatu

¹⁴ Kusangwa liri ngʼomundu oyo wagenda oko lugendo lwʼekindi kihugo, neryo mwabirikira abagombe buwe, mwasĩgĩra bʼebindu biwe.

¹⁵ Neryo mwaha obuli mugombe ngʼamenge wuwe kwʼali. Mwaha omuguma esyotalanta ĩtanu nʼoko gundi esyotalanta ĩbĩrĩ, nʼoko gundi talanta nguma, neryo mwaya oko lugendo.

¹⁶ Neryo-neryo oyo wĩmaya esyotalanta ĩtanu, mwayatũndyasyo, mwabana mwʼendũndĩ yʼesindi talanta ĩtanu.

¹⁷ Nʼoyo wabya nʼesyotalanta ĩbĩrĩ mwatũndyasyo, mwabana esindi ĩbĩrĩ.

¹⁸ Nĩkwa oyo wĩmaya etalanta nguma mwayatakulirayo omo kitaka, mwabĩsa esyofranka syʼOmukama wuwe.

¹⁹ Enyũma wʼomugulu muli, omukama wʼabagombe abo mwasa, mwabũlyabo emiganzo.

²⁰ Neryo omugombe oyo wĩmaya esyotalanta ĩtanu mwahĩkaho, mwaleta esindi talanta ĩtanu, ati, Mukama, mowamba esyotalanta ĩtanu. Langira! Nabĩrĩtũndya mwʼesindi talanta ĩtanu.

²¹ Neryo omukama wuwe mwamubwira ati, Wamakola ndeke, uwe mugombe mubuya oyuteregula! Sulitalegula omo bindu bike, nasyakũhĩra erĩteya ebindu bingi. Wingire omo butseme bwʼomukama wawe!

²² Nʼomugombe oyo wĩmaya esyotalanta ĩbĩrĩ mwasa ati, Mukama, mowamba esyotalanta ĩbĩrĩ langira, nabĩrĩtũndya mwʼesindi talanta ĩbĩrĩ.

²³ Neryo omukama wuwe mwamubwira ati, Wamakola ndeke uwe mugombe mubuya oyuteregula! Sulitalegula omo bindu bike, nasyakũhĩra erĩteya bindu bingi. Wingire omo butseme bwʼomukama wawe!

²⁴ Nʼomugombe oyo wĩmaya etalanta nguma mwahĩka ati, Mukama, nabya nyasĩ kʼuli mundu Ũkalĩre, ukagesa aho utabiba, nʼerikuma-kuma aho ũtahĩra mbuto.

²⁵ Neryo monubaha, monayabĩsa etalanta yawe yʼomo kitaka. Langira! Yeyĩ!

²⁶ Nĩkwa omukama wuwe mwamũsũbĩrya ati, Uwe mugombe mubi nʼomugata, wabya wasĩ ko ngagesa aho ndabiba, nʼerikuma-kuma aho ndahĩra embuto kwehĩ?

²⁷ Kumbe wahĩra ebindu byage omo bankĩ, neryo nangabere nahĩka inabana ebindu byage haguma nʼendũndĩ.

²⁸ Neryo mumusagule etalanta eyo, muheyo oyuwite esyotalanta ĩkũmĩ.

²⁹ Kusangwa oyuwite asyahabwa ebindi, iniabya nʼebingi; nĩkwa oyutawite, asyasagulwa ebyo awite.

³⁰ Kandi muguse omugombe oyutekuba lwahi omo mwĩrĩmya wʼeyĩhya; eyo abandu basyalira nʼerikeregeta ameno.

Eritswera lyʼendũlĩ

³¹ Nĩkwa omugulu Omugala wʼomundu asyasa omo lukengerwa luwe, nʼabamalaĩka bosĩ haguma naye, asyĩkala oko kĩtũmbĩ kiwe kyʼobwami kyʼolukengerwa.

³² Nʼebihanda byosĩ byasyahĩndanĩbwa embere siwe; kandi asyasololabo ngʼomũlĩsya kwʼakasolola esyombũlĩ omo mbene-hene.

³³ Asyahĩra esyombũlĩ oko byala biwe byʼamali, nʼesyombene-hene oko malembe.

³⁴ Neryo Omwami asyabwira abandu abali oko byala biwe byʼamali ati, Mwase, ĩnywe Tata wage abiritsumula, mwĩmaye obwami obwakokotĩbawa busana nenyũ okwʼihangika lyʼekihugo.

³⁵ Kusangwa nabya nʼenzala momwanyaganula; nabya nyĩkwĩre enyota momwamba awʼerĩpũlya; nabya mũgendĩ, momwanyĩkokya.

³⁶ Nabya ndũmbũ momwanyambalya; nabya nyilwere, momwanyibana; nabya omo mũlĩkĩ, momwambĩkako.

³⁷ Neryo abatunganene basyamũsũbĩrya bati, Mukama, twakulolako mugulu wahi, erikuha kalyo kwehĩ? Kutse ĩgũkwĩre enyota itwakuha awʼerĩpũlya kwehĩ?

³⁸ Kandi omugulu wahi twakulolako iguli mũgendĩ, motwakũkokya kwehĩ? Kutse iguli ndũmbũ motwakwambalya kwehĩ?

³⁹ Kandi mugulu wahi wabya ulwere, kutse omo mũlĩkĩ motwasyakubana kwehĩ?

⁴⁰ Nʼomwami oyo asyasũbĩryabo ati, Kwenene ngabũga nenyũ nyiti, Ngoko mwakolera omuguma gʼoko bagala betu bake-bake aba, momwakolakyo ũkwʼĩngye.

⁴¹ Neryo asyabwira abʼoko byala biwe byʼamelembe ati, Mũlũe kwĩngye, ĩnywe batakirwa! Muye omo muliro wa kera na kera owakokotĩbawa busana na Satanĩ nʼabamalaĩka buwe.

⁴² Nabya nyĩkwĩre enzala, momutanyaganula, kandi nabya nyĩkwĩre enyota, momutamba awʼerĩpũlya.

⁴³ Nabya mũgendĩ, momũtanyĩkokya, kandi nabya ndũmbũ, momũtanyambalya, nabya nyilwere, kandi nabya omo mũlĩkĩ, momutayanyibana.

⁴⁴ Neryo basyamũsũbĩrya bati, Mukama, omugulu wahi twakulolako ĩgũkwĩre enzala, kutse enyota, kutse iguli mũgendĩ, kutse ndũmbũ, kutse igulwere, kutse iguli omo mũlĩkĩ, motutakukolera, kwehĩ?

⁴⁵ Neryo Omwami asyasũbĩryabo ati, Kwenene ngabũga nenyũ nyiti, Ngoko mutakolera omuguma gʼoko bake-bake aba, momutakolakyo ũkwʼĩngye.

⁴⁶ Neryo aba basyagenda omwʼisuyirwa lyʼerikota, nĩkwa abatunganene basyaya omo ngebe yʼerikota.