Matayo 23 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo Yesu mwabũga nʼesyondeko nʼabiga buwe,

² ati, Abakangĩrĩrya bʼEmigambo nʼAbafarĩsayo babiriyiyira mo bandu bʼerĩkũmbũla Emigambo ya Musa.

³ Neryo ebyosĩ bakababwira, mukolebyo, kandi mukwamebyo, nĩkwa Simukole ngoko bakakola; kusangwa bakabũga emyatsi, nĩkwa sibekolayo.

⁴ Kandi bakasenga emiheke eyĩrĩtohĩre, neryo ĩbahĩrayo oko bitigo byʼabandu; nĩkwa ibo sĩbanzĩre erĩwatĩkya abakahekayo kutse nʼomo munwe muguma.

⁵ Nĩkwa bakakola emĩbĩrĩ yabo yosĩ erilolwako nʼabandu; kusangwa bakayira otũsandũkũ otukaheka emilondo yʼekitabu mo tunene-tunene oko mibiri yabo, kandi emĩsĩke yʼesyongimba syabo bakayirayo mo miri-miri.

⁶ Kandi banzĩre ahʼerĩsĩkĩbwa omwʼirya, nʼebĩtũmbĩ byʼembere omo manyũmba wʼerĩhĩndanamo.

⁷ Kandi bakanza erĩkerĩbwa nʼerikengwa omo hitale, nʼeribirikirwa nʼabandu mo Mũkangĩrĩrya.

⁸ Nĩkwa ĩnywe simwahulawe mo Mũkangĩrĩrya, kusangwa Omũkangĩrĩrya ni muguma, nʼĩnywe bosĩ muli balĩkyetu.

⁹ Kandi simwahule mundu mo tata wenyũ muna-kihugo, kusangwa Tata wenyũ ni muguma, oyuli elubula.

¹⁰ Kandi simwahulawe mo basondolĩ, kusangwa omũsondolĩ wenyũ ni muguma, ye Kristo.

¹¹ Nĩkwa omukulu omo katĩkatĩ kenyũ asyabya mugombe wenyũ.

¹² Nʼoyo wasyayĩhamya asyakehĩbwa, nʼoyo wasyayĩkehya asyahamĩbwa.

Yesu akatswera erĩtebya lyabo

¹³ Nĩkwa obũlĩge kwĩnywe, abakangĩrĩrya bʼEmigambo nʼAbafarĩsayo, abatebya! Kusangwa mukakingira Obwami bwʼelubula bwʼabandu, kusangwa nenyũ simuliingiramo, kandi sĩmwerĩga bandu abakasonda eriingira, eriyamo. [

¹⁴ Obũlĩge kwĩnywe bakangĩrĩrya bʼEmigambo, nʼAbafarĩsayo, abatebya! Kusangwa mukanyega manyũmba wʼabakwakalĩ, imukateba omwʼisaba liri-liri. Neryo mwasyasuyirwa kutsibu kwʼaho.]

¹⁵ Obũlĩge kwĩnywe, abakangĩrĩrya bʼEmigambo nʼAbafarĩsayo, abatebya! Kusangwa mũkatĩmba oko ngetsi nʼekihugo eriyira omũsomĩ muguma; neryo mwamamuyira mutya, imukamuyira mo mwana wʼeKũlĩmũ ngendo kabiri kwilaba nywe.

¹⁶ Obũlĩge kwĩnywe, abasondolĩ ndĩmatĩme, abakabũga bati, Omundu amalahĩrya oko Hekalũ, si mwatsi, nĩkwa omundu amalahĩrya oko syamagetsi syʼeHekalũ akayiboha omwʼĩlahĩrya liwe.

¹⁷ Ĩnywe bakĩrũ nʼesyondĩmatĩme, ekĩlabĩre mo kikulu ni kyahi, esyamagetsi, kutse eHekalũ eyikayira esyamagetsi mo sĩbũyĩrĩre kwehĩ?

¹⁸ Kandi, muti, Oyũkalahĩraya oko kiherero, si mwatsi, nĩkwa Oyũkalahĩrĩraya omo lũsũnzo oluli kukyo, akayiboha omwʼĩlahĩrya liwe.

¹⁹ Ĩnywe bandu ndĩmatĩme! Ekikulu ni kyahi, olũsũnzo kutse ekiherero ekikayira olũsũnzo mo lũbũyĩrĩre kwehĩ?

²⁰ Neryo omundu amalahĩrya omo kiherero, akalahĩraya mukyo nʼomo lũsũnzo losĩ oluliko.

²¹ Nʼoyũkalahĩraya omo Hekalũ, akalahĩraya omo Hekalũ nʼuku Nyamuhanga oyo wĩkeremo.

²² Nʼoyũkalahĩraya oko lubula, akalahĩraya oko kĩtũmbĩ kyʼobwami kya Nyamuhanga, nʼoko yo wĩkere kukyo.

²³ Obũlĩge kwĩnywe bakangĩrĩrya bʼEmigambo, nʼAbafarĩsayo, abatebya! Kusangwa mukaha Nyamuhanga ekiguma kyʼomwʼĩkũmĩ kyʼesyonyenyĩ syʼemunanaa, na bĩzarĩ, na jĩra, kandi mwabirireka emyatsi mikulu kwʼaho yʼEmigambo ngʼerĩbanza, nʼeriganyira, nʼeritendiregula. Kumbe mwabirikola emyatsi eyĩ nʼerĩtendĩsĩganĩa ebindi ebyo.

²⁴ Ĩnywe basondolĩ ndĩmatĩme, mukagegena akahuka kake, imwamera engamia!

²⁵ Obũlĩge kwĩnywe bakangĩrĩrya bʼEmigambo nʼAbafarĩsayo, abatebya! Kusangwa mũkeraya endambi yʼolũtehĩ nʼekibindi, nĩkwa omwisi wabyo moswĩre erinyega nʼesyongumbu syʼomubiri.

²⁶ Uwe Mũfarĩsayo ndĩmatĩme, Ũtsũke erĩerya olũtehĩ nʼekibindi byʼomwisi neryo eyĩhya wabyo iyatoka eriera nibya.

²⁷ Obũlĩge kwĩnywe bakangĩrĩrya bʼEmigambo nʼAbafarĩsayo, abatebya! Kusangwa muli ngʼesisinda esĩhakabĩrye embemba, esikaminyikala eyĩhya mo nyibuya, nĩkwa omwisi wasyo moswĩre amakũha wʼabaholĩ nʼesyonye syosĩ.

²⁸ Nenyũ nibya mukaminyikala eyĩhya mo batunganene oko bandu bosĩ, nĩkwa omwisi moswĩre amatebo nʼamalolo.

Yesu akaminyerera erisuyira lyabo

²⁹ Obũlĩge kwĩnywe bakangĩrĩrya bʼEmigambo nʼAbafarĩsayo, abatebya! Kusangwa mũkahĩmba amasinda wʼabamĩnyererĩ nʼerĩsũga amasinda wʼabatunganene.

³⁰ Kandi mũkabũga muti, Kumbe twalibyaho oko biro byʼabotata wetu, nga sitwetabya omo luhota haguma nabo erĩũta omusasi wʼabamĩnyererĩ.

³¹ Neryo mũkalĩga ko muli abagala bʼabĩta abamĩnyererĩ.

³² Neryo mũsũlaye olulengo lʼomusango lwʼabotata wenyũ.

³³ Ĩywe nzoka, ĩnywe bana bʼesyonzoka! Mwasyabala muti olubanza lwʼomuliro wʼeKũlĩmũ.

³⁴ Neryo, lebaya, ngabatumira abamĩnyererĩ, nʼabandu bʼamenge, nʼabakangĩrĩrya. Mwasyĩta abandi ba kubo, nʼeribambabo oko misalaba, nʼabandi mwasyaswĩryabo emikoba omo manyũmba wenyũ wʼerĩhĩndanamo, kandi mwasyendereryabo oko mũyĩ nʼoko mũyĩ.

³⁵ Neryo erisuyira lyʼabĩtĩ bʼabandu bosĩ abate ko musango, lyasyabya kwĩnywe erĩtsũka erĩkwa lya Abelĩ oyutunganene, nʼerĩhĩka okwʼĩkwa lya Zakarĩa, mugala wa Berekĩa, oyo mwĩtĩra omo katĩkatĩ kʼeHekalũ nʼekiherero.

³⁶ Kwenene ngabũga nenyũ, nyiti erisuyira busana nʼemyatsi yosĩ eyĩ lyasyahĩka oko bandu bʼolulengo olũ.

Olwanzo lwa Yesu busana nʼe Yerũsalema

³⁷ Uwe Yerũsalema, Yerũsalema! Ũkĩta abamĩnyererĩ, nʼerĩĩta omo mabwe abakwenda abo Nyamuhanga akatuma ukʼuwe! Engendo singahi nabya nyanzĩre erĩhĩndanĩa abana bawe bo haguma, ngʼerĩbũtĩ ko lĩkahĩndanaya ehĩpyege hyalyo omo bĩpũpa byalyo. Nĩkwa momutanza!

³⁸ Mũlebaye, oko wenyũ kwʼamasĩganĩbwa ĩkokwene.

³⁹ Kusangwa ngababwira, nyiti, Simwendisyaswanyilolako erĩhĩka aho mwasyabũgĩra muti, Nyamuhanga atsumule oyukasa omo lĩna lyʼomukama!