Biblia Todo Logo
Bìoball air-loidhne

- Sanasan -

Matayo 19 - AMASAKO ABOYTRTRE WA NYAMUHANGA AWAKAHULAWA MO BIBLIA


Yesu akakangĩrĩraya omwatsi wʼengomolo
( Mk 10.1-12 )

1 Nĩkwa Yesu abere abibuga emyatsi eyĩ, mwalũa eGalĩlaya, mwaya omo kihugo kyʼeYũdea eyisirya wʼolũsĩ lwʼeYorodanĩ.

2 Nʼesyondeko nene mosyamukwama, naye mwalamyabo eyo.

3 Abandi Bafarĩsayo mobahĩka uku Yesu bakamulengako bati, Emigambo ĩkalĩga omundu akahiga mũkalĩwe busana nʼemyatsi mitya-mitya kwehĩ?

4 Yesu mwasũbĩryabo ati, Simwetasoma amasako aya kwehĩ? Ati, Oyo wahangikabo erĩmbere mwahangikabo, omulume nʼomũkalĩ,

5 ati, Busana nʼomwatsi oyũ, omundu asyasĩga ĩse wuwe na nyĩnya wuwe, inialanda uku mũkalĩ wuwe, nʼababiri basyabya mubiri muguma.

6 Neryo litya sibakiri babiri, nĩkwa mubiri muguma. Neryo abo Nyamuhanga abiriamatanĩa haguma, Sihabye mundu oyukagabulabo.

7 Neryo Abafarĩsayo mobamũbũlya bati, Busana nakĩ Musa mwategeka eriha omũkalĩ yʼebarua yʼerimukomola nʼerimuhiga kwehĩ?

8 Yesu mwabwirabo ati, Musa mwabalĩgĩra erikomola abakalĩ benyũ busana nʼerikala lyʼemitima yenyũ; nĩkwa okwʼĩtsũka lyʼerihangika sibyabya bitya.

9 Nage ngababwira nyiti, Omundundi oyukakomola omũkalĩ wuwe, bite busana nʼerĩsĩngĩra, akahĩkya ogundi mũkalĩ, iniakasĩngĩra, nʼoyũkahĩkaya omũkalĩ oyulyakomolawa akasĩngĩra nibya.

10 Neryo abiga mobamũbũlya bati, Omwatsi wʼomulume nʼomũkalĩ amabya atya, siritolere erĩhĩkya.

11 Nĩkwa Yesu mwabwirabo ati, Abandu bosĩ sibetoka erĩrĩga ekĩnywa ekĩ, ba nʼabahabawakyo.

12 Hali myatsi mĩsĩndo-mĩsĩndo eyikaleka abandu ibatatoka erĩhĩkya. Abandi kusangwa babutawa batya; abandi kusangwa bandu bayirabo batya; nʼabandi sĩbehĩkaya busana nʼobwami bwʼelubula. Oyukatoka erĩrĩga omwatsi oyũ alĩgego.


Yesu akatsumula abana
( Mk 10.13-16 ; Lk 18.15-17 )

13 Neryo abandi bandu mobaletera Yesu yʼabana balere bati, ahĩre kubo kwʼebyala biwe, nʼerisaba, nĩkwa abiga mobakunga abandu abo.

14 Nĩkwa Yesu mwabũga ati, Muleke abana base kwĩngye. Sĩmũkakĩrayebo, kusangwa Obwami bwʼelubula ni bwʼabandu abali ngʼaba.

15 Neryo Yesu abere abĩhĩra kubo kwʼebyala biwe, mwalũayo.


Omũlwana wʼebindu
( Mk 10.17-31 ; Lk 18.18-30 )

16 Neryo omundu muguma mwahĩka uku Yesu ati, Mũkangĩrĩrya, nangakola mũbĩrĩ wahi mubuya, inabana engebe yʼerikota kwehĩ?

17 Nĩkwa Yesu mwamubwira ati, Busana nakĩ ukanyĩbũlaya busana nʼebibuya kwehĩ? Hali Muguma musa yona mubuya; nĩkwa wamanza eriingira omo ngebe, ũtegaye ebihano.

18 Neryo mundu oyo mwamũbũlya ati, Ko ni bihano byahi kwehĩ? Yesu mwamũsũbĩrya ati, Ĩsĩwĩta, isiwasĩngĩra, Ĩsĩwĩba, isiwabihira abandi;

19 Ũsĩkaye tata wawe na koyo wawe; kandi wanze mũlĩkyenyũ ngoko ũyanzĩre.

20 Omũlwana oyo mwamubwira ati, Ebihano byosĩ ebyo nabirikolabyo, nyĩkĩsĩya kyahi kwehĩ?

21 Yesu mwamubwira ati, Wamanza erĩhĩkana ndeke, ugende, ũgũlaye ebindu byawe, uhe byʼoko bera, nawe wasyabya nʼebindu elubula; kandi wase Unyikwame.

22 Nĩkwa omugulu omũlwana oyo owa ebyo, mwalũaho nʼobũlĩge; kusangwa abya awite bindu bingi kutsibu.

23 Neryo Yesu mwabwira abiga buwe ati, Kwenene ngabũga nenyũ nyiti, rĩkalĩre busana nʼomundu wʼebindu eriingira omo Bwami bwʼelubula.

24 Kandi ngababwira nyiti, Ni ryolo busana nʼengamia erilaba omo kyũna kyʼesĩndanĩ kwilaba omundu wʼebindu eriingira omo Bwami bwa Nyamuhanga.

25 Omugulu abiga bowa ebĩ mobasweka kutsibu bati, Nĩkwa nindi wangatoka erĩlamĩbwa kwehĩ?

26 Yesu mwatungererabo, mwabwirabo ati, Oko bandu ekĩ sikyangatokekana, nĩkwa uku Nyamuhanga emyatsi yosĩ ikatokekana.

27 Neryo Petero mwamũsũbĩrya ati, Lebaya, ĩtwe twabĩrĩsĩga ebyosĩ twamakukwama, nĩkwa twasyabanakĩ kwehĩ?

28 Neryo Yesu mwabwirabo ati, Kwenene ngabũga nenyũ, nyiti, Omugulu Omugala wʼomundu asyĩkala oko kĩtũmbĩ kyʼobwami omo lukengerwa luwe, omo mugulu muhya-muhya, ĩnywe ĩkũmĩ nʼababiri mwabirinyikwama, mwasyĩkala oko bĩtũmbĩ byʼobwami erĩkũmĩ nʼebibiri, imukatswera ebihanda erĩkũmĩ nʼebibiri bya Ĩsraelĩ.

29 Nʼobuli mundu oyo wabĩrĩsĩga manyũmba, kutse bagala babo, kutse bali babo, kutse ĩse, kutse nyĩnya, kutse abana, kutse ebitaka busana nage, asyabanabyo ngendo ĩgana, kandi asyahabwa engebe yʼerikota.

30 Nĩkwa abangi bʼerĩmbere lino basyabya bʼenyũma, nʼabangi bʼenyũma lino, basyabya bʼerĩmbere.

Bible in Kinandi © Bible Society of the Democratic Republic of Congo, and Bible Society of Uganda, 1980.

Bible Society of the Democratic Republic of Congo
Lean sinn:



Sanasan