Matayo 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu akakanaya na Musa na Elĩa oko kitwa aho ahĩndũkĩrĩbawa

¹ Nʼenyũma wʼebiro ndatu, Yesu mwatwala Petero na Yakobo, na Yoane mugala wabo Yakobo. Neryo mwatwalabo ĩbobene oko kitwa kiri-kiri.

² Neryo Yesu mwahĩndũkĩbwa embere syabo, nʼobũsũ buwe mobwakangabasanĩa ngʼeryuba, nʼesyongimba siwe mosyabya nyeru-nyeru ngʼekyakakala.

³ Neryo lebaya, Musa na Elĩa mobabutukira kubo ĩbakakanaya na Yesu.

⁴ Neryo Petero mwasũbĩrya mwabũga na Yesu ati, Mukama, lyowene busana netu eribya hano; wamanza, ngandĩhĩmba hano hʼamahema asatu, enguma busana nawe, nʼenguma busana na Musa, nʼenguma busana na Elĩa.

⁵ Abere akĩnabũga, ekĩtũ ekĩkangabasenĩe mokyasũkũlĩryabo; neryo, omulenge mwalũa omo kĩtũ ati, Oyũ ni Mugala wage mwanze, namamutsemera ndeke; mũmwowe!

⁶ Omugulu abiga bowa ekĩ, mobawa ahisi mobubaha kutsibu.

⁷ Neryo Yesu mwasa mwatũla kubo ati, Muhangane, simubahe.

⁸ Nabo babere basumba ameso wabo, mobatalangira ho mundu, inina Yesu ĩyowene.

⁹ Neryo babere bakandagala oko kitwa, Yesu mwaganĩabo ati, Simubwire mundu ebyo mwamalolako omo bũlĩme, erĩhĩka aho Omugala wʼomundu asyalũbũkĩra erĩlũa oko baholĩ.

¹⁰ Kandi abiga ba Yesu mobamũbũlya bati, Busana nakĩ abakangĩrĩrya bʼEmigambo bakabũga bati Elĩa atolere ĩnĩatsũka erĩhĩka, kwehĩ?

¹¹ Yesu mwasũbĩryabo ati, Elĩa akandisyasa, ĩnĩasũbya emyatsi yosĩ.

¹² Nĩkwa ngababwira nyiti, Elĩa abĩrĩhĩka, nabo sibetamuminyerera, nĩkwa mobamukola ngoko banzĩre. Litya Omugala wʼomundu asyagalwa omo byala byabo.

¹³ Neryo abiga mobaminya kwʼakanaya nabo busana na Yoane Mũbatĩsya.

Yesu akalamaya omũlwana oyuli kwʼembĩnga

¹⁴ Kandi omugulu bahĩka oko ndeko, omundu mwahĩka uku Yesu, mwamũkũkamira ati,

¹⁵ Omukama, Uganyire mugala wage; kusangwa nĩ mũtũtsa, kandi alwere kutsibu; kusangwa ngendo nyingi akawa omo lĩko, nʼengendo nyingi omo magetsi.

¹⁶ Kandi monamuletere abiga bawe, nabo mobatalũkĩre erĩmũlamya.

¹⁷ Yesu mwasũbĩryabo ati, ĩnywe lulengo lwʼerĩtendĩkirĩrya nʼolʼobuhaka! Nasĩkala nenyũ omo mugulu ungahi kwehĩ? Nasyababegerya omugulu ungahi kwehĩ? Munyiretere ye hano.

¹⁸ Neryo Yesu mwakunga embĩnga, neryo moyamũlũako, nʼomũlwana oyo mwalamĩbwa neryoneryo.

¹⁹ Neryo abiga mobahĩka uku Yesu ahate bandu bati, Busana nakĩ twataluka erihigira embĩnga eyo yʼeyĩhya kwehĩ?

²⁰ Yesu mwasũbĩryabo ati, Ni busana nʼerĩkĩrĩrya lyenyũ lĩke. Kusangwa kwenene ngababwira nyiti, Mwamabya nʼerĩkĩrĩrya ngʼembuto yʼeharadalĩ, mwasyabwira ekitwa ekĩ muti, ũhũmĩre erya, nakyo kyasyahũma; kandi sihali kindu kyasyabalema. [

²¹ Nĩkwa omuhanda oyũ sialĩlũamo lite erisaba nʼeritsira kalyo.]

Yesu akaswahula omwatsi wʼoluholo luwe

²² Omugulu babya bakalendera haguma eGalĩlaya, neryo Yesu mwabwira abiga ati, Omugala wʼomundu akandisyahoterwa oko bandu,

²³ abakandĩsyamwĩta, kandi asyalũbũkĩbwa enyũma wʼebiro bisatu. Neryo mobakwa bũlĩge bo kutsibu.

Epalata yʼeHekalũ

²⁴ Kandi babere bahĩka eKapernaũmũ, abasolesya bʼepalata yʼeHekalũ mobahĩka uku Petero, bati, Omũkangĩrĩrya wenyũ sialisola epalata yʼeHekalũ kwehĩ?

²⁵ Petero ati, Ega. Neryo abere ahĩka omo nyũmba, Yesu mwatsũka erĩmũbũlya ati, Sĩmonĩ, Ũkaganĩraya ũtĩkĩ kwehĩ? Nindi yukasola kutse eririha engemu oko bami bʼekihugo kwehĩ? Ni bana babo, kutse ba bagenĩ kwehĩ?

²⁶ Petero mwamũsũbĩrya ati, Nĩ bagenĩ. Neryo Yesu mwamubwira ati, Neryo abana siberiha.

²⁷ Nĩkwa tũkasyagalyabo, ugende oko ngetsi, Uguse oburobo, wĩmaye erĩhere erĩkatsũka erihuluka, neryo wamabĩkũmbũla obuno bwalyo, ũkandĩeya mwʼekĩtsĩpa, wĩmayekyo utusolere, tũnawe.