Matayo 15 - AMASAKO ABOYTRTRE WA NYAMUHANGA AWAKAHULAWA MO BIBLIA

Emitsye yʼAbafarĩsayo

¹ Neryo abandi bʼoko Bafarĩsayo nʼabakangĩrĩrya bʼEmigambo mobahĩka uku Yesu bakalũa eYerũsalema, bati,

² Busana nakĩ abiga bawe bakaketa emitsye yʼabakulu kwehĩ? Kusangwa sibenaba oko byala omugulu bakalya akalyo.

³ Yesu mwasũbĩryabo ati, Nenyũ, busana nakĩ mukaketa ekihano kya Nyamuhanga busana nʼemitsye yenyũ kwehĩ?

⁴ Kusangwa Nyamuhanga mwabũga ati, Ũsĩkaye tata wawe na koyo wawe, kandi, Oyukahula tata wuwe kutse koyo wuwe yo nabi, ĩtawe.

⁵ Nĩkwa ĩnywe mũkabũga muti, Oyo wasyabũga na tata kutse nyĩnya ati, Ekĩndũkĩ kyage kyangakũwatĩkĩrye kyabirihabwa Nyamuhanga.

⁶ Muti, siasĩkaye tata wuwe kutse koyo wuwe. Neryo litya, mukapona ekĩnywa kya Nyamuhanga busana nʼerikwama emitsye yenyũ.

⁷ Ĩnywe batebya! Omũmĩnyererĩ Ĩsaya mwaminyerera ndeke busana nenyũ, ati,

⁸ Abandu aba bakanyĩsĩkaya omo mĩnywa yabo, Nĩkwa emitima yabo iri hali kwĩngye.

⁹ Nĩkwa bakanyĩramaya buyira. Kusangwa bakakangĩrĩraya amahano wʼabandu nga ni mahamulo wa Nyamuhanga.

Emitsye eyikayira omundu mo mũtsandĩrya

¹⁰ Neryo Yesu mwabirikira endeko ukwʼiye mwabwirabo ati, Mwowe, muminye.

¹¹ Si kye kindu ekikaya omo buno bwʼomundu kyo kikamũtsandaya, nĩkwa kye kindu ekĩkalũa omo buno, kyo kĩkatsandaya omundu.

¹² Neryo abiga mobahĩka uku Yesu mobamubwira bati, Ũnasĩ kwʼAbafarĩsayo mobagalirwa omugulu bowa ebĩnywa ebĩ kwehĩ?

¹³ Yesu mwasũbĩryabo ati, Obuli mbuto eyo Tata wage wʼelubula atahera yasyakulangwa.

¹⁴ Mulekebo, ni basondolĩ ndĩmatĩme bʼabandu ndĩmatĩme. Omundu ndĩmatĩme amasondola ogundi mundu ndĩmatĩme, ababiri bosĩbasyatogera omo buhya.

¹⁵ Neryo Petero mwabũga na Yesu ati, Ũtũkũmbũlĩre omũsyo oyo.

¹⁶ Neryo Yesu mwabũga ati, Nenyũ mukine butaminya kwehĩ?

¹⁷ Sĩmwasĩ ekikaya omo buno ko kikalaba omo nda, neryo ikyatwangana kwehĩ?

¹⁸ Nĩkwa emyatsi eyĩkalũa omo buno ĩkalũa omo mutima yo yĩkatsandaya omundu.

¹⁹ Kusangwa omo mutima wʼomundu mukahuluka amalengekanĩa mabi, erĩĩta, erĩsĩngĩra, amaragane, erĩĩba, eribihira bandi, nʼebĩtsũmĩ.

²⁰ Eyĩ ye myatsi eyĩkatsandaya omundu. Nĩkwa erirya omo byala bĩtanabĩre sĩbyetsandaya mundu.

Erĩkĩrĩrya lyʼomũkalĩ wʼeTĩro

²¹ Neryo Yesu mwalũaho mwaya omo bihugo byʼemĩyĩ yʼeTĩro nʼeSĩdonĩ.

²² Neryo mũkalĩ, Omukanana oyo wabya ĩkere omo kihugo ekyo, mwasa uku Yesu, mwabirikira ati, Uwe Mukama, mugala wa Dawĩdĩ, unyiganyire. Mwali wage ali ko mbĩnga ĩkamwagalaya kutsibu.

²³ Nĩ kwa Yesu mwatamũsũbĩrya kĩnywa nʼekiguma. Abiga buwe mobahĩka nʼerimubwira bati, Umuhige agende, kusangwa akatũkwamaya olukanda.

²⁴ Nĩkwa Yesu mwasũbĩrya ati, Natumawa oko syombũlĩ esĩherĩre syʼenyũmba ya Ĩsraelĩ nyisa.

²⁵ Nĩkwa omũkalĩ oyo mwasa, mũnama embere sya Yesu, ati, Mukama, ũnyĩwatĩkaye!

²⁶ Yesu mwasũbĩrya ati, Sĩryowene erĩĩmya akalyo kʼabana nʼerigusako oko syombwa.

²⁷ Nĩkwa omũkalĩ oyo mwabũga ati, Kwenene, Mukama, nĩkwa esyombwa nasyo sikalya ebitahangukira ebikalagala oko mesa ya mwenyesyo.

²⁸ Neryo Yesu mwasũbĩrya ati, Uwe mũkalĩ, erĩkĩrĩrya lyawe nĩ rĩnene! Ebyo wanzĩre bikolawe busana nawe. Neryo mwali wuwe mwalamĩbwa oko ndambĩ eyo.

Yesu akalamaya bandu bangi

²⁹ Neryo Yesu mwalũa eyo, mwalaba oko mũsĩke wʼengetsi yʼeGalĩlaya. Neryo abere ahetukira oko kitwa, mwĩkalaho.

³⁰ Nʼesyondeko mosyamũhĩkako, ibakamuletera abakasĩndogera, nʼebirema nʼesyondĩmatĩme, nʼesyomũmũ, nʼabandi bangi abalwere, mobahĩrabo hakũhĩ nʼebisando bya Yesu, naye mwalamyabo.

³¹ Kyaleka endeko iyasweka omugulu balangira esyomũmũ sĩkabũga, nʼebirema ibyabirilama, nʼabakasĩndogera ibalimugenda, nʼesyondĩmatĩme isirimulangira, neryo mobapipa Nyamuhanga wa Ĩsraelĩ.

Yesu akalĩsaya abandu elfu ĩnĩ (4,000)

³² Neryo Yesu mwabirikira abiga buwe, ati, Namakwĩra endeko yʼobũlĩge, kusangwa bamasiba nage lino biro bisatu, isibawite ebyʼerirya. Kandi sĩnyanzĩre eritumabo bakagenda batalĩre, bakasyalemberera omo nzira.

³³ Neryo abiga mobamũbũlya bati, Tukandibana amandu angaha go hahi omo mbwarara erĩũgũtya endeko yingana nʼeyĩ kwehĩ?

³⁴ Neryo Yesu mwabũlyabo ati, Muwite uku mandu angahi kwehĩ? Nabo mobabũga bati, Alinda, nʼehihere hike.

³⁵ Neryo Yesu mwategeka ati endeko bĩkale ahisi.

³⁶ Nĩkwa Yesu mwĩmya amandu alinda ayo nʼamahere, mwaha ewasĩngya uku Nyamuhanga, neryo mwatsũtsangago mwahago oko biga buwe, nʼabiga nabo mobahago oko bandu ababya omo ndeko.

³⁷ Abosĩ mobalya, mobũgũta. Neryo abiga mobasongya-songya ebitiri birinda ebyoswĩre mwʼebitahangukira ebyasaka.

³⁸ Neryo abalume abalya babya elfu ĩnĩ (4,000), abakalĩ nʼabana bataganzĩrwe kubo.

³⁹ Neryo Yesu mwalagana nʼendeko ati bagende. Neryo mwingira omo bwato, mwaya omo kihugo kyʼeMagadanĩ.