Matayo 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi wʼeSabato

¹ Oko mugulu oyo Yesu abya akalaba omo malima wʼengano oko kiro kyʼeSabato. Neryo abiga buwe babya bakwĩre enzala, neryo mobatsũka erĩtwa amakũndĩ wʼengano nʼeriryago.

² Nĩkwa omugulu Abafarĩsayo balangira ekyo, mobabwira Yesu bati, Lebaya, abiga bawe bakakola ebyo Migambo ĩkaganaya erikola omo Sabato!

³ Nĩkwa Yesu mwabwirabo ati, Simwetasoma ekyo Dawĩdĩ akola, omugulu akwa enzala, iye nʼabandu buwe kwehĩ?

⁴ Ngoko ingira omo nyũmba ya Nyamuhanga, kandi iye nʼabandu buwe mobalya amandu awahigulawa busana na Nyamuhanga. Nĩkwa Emigambo ĩkaganaya abandu erirya kugo, nĩkwa ba nʼabahererĩ basa.

⁵ Kutse simulitasoma omo Migambo ya Musa kwehĩ, ngoko abahererĩ omo Hekalũ oko kiro kyʼeSabato, bakaketa omugambo wʼeSabato, isibali na musango.

⁶ Nĩkwa ngababwira nyiti, Hano hali oyũlabĩre eHekalũ.

⁷ Kumbe mwabya mwasĩ amasako aya awakabũga ati, Nyanzĩre eriganyira, sĩnyanzĩre amahere wʼesyonyama, kumbe simwangatswera abandu abate na musango.

⁸ Kusangwa Omugala wʼomundu ni Mukama wʼeSabato.

Omundu wʼebyala bĩlehemĩre

⁹ Neryo Yesu mwalũaho, mwaya omo nyũmba yabo yʼerĩhĩndanamo.

¹⁰ Neryo lebaya, habya omundu wʼebyala bĩlehemĩre. Kandi habya abandu ababũlaya Yesu bati, Linatolere omo Migambo erĩlamya omundu omo kiro kyʼeSabato kwehĩ? Kusangwa basonda erĩhandĩkĩrĩrya Yesu.

¹¹ Neryo Yesu mwabwirabo ati, Ko ni mundu wahi omo katĩkatĩ kenyũ oyuwite embũlĩ nguma yamatogera omo buhya omo kiro kyʼeSabato, isyendisyahambayo nʼerisumbirayo eyĩhya kwehĩ?

¹² Omundu alabĩre enzwere yʼembũlĩ yo kutsibu kwʼaho! Neryo kitolere omo Migambo erikola ebibuya omo kiro kyʼeSabato.

¹³ Neryo Yesu mwabwira omundu oyo ati, Lambula ebyala byawe! Naye mwalambulabyo, nabyo mobyasuba, nʼerilama ndeke ngʼebindi byala.

¹⁴ Nĩkwa Abafarĩsayo mobahuluka, mobaya mbĩta nga bangĩta Yesu yo bati.

Omugombe wa Nyamuhanga oyo wayisogawa

¹⁵ Neryo omugulu Yesu aminyakyo, mwalũa eyo. Nĩkwa abandu bangi mobamukwama, naye mwalamya abosĩ.

¹⁶ Kandi mwahanabo ati sĩbamũkũmayĩraye,

¹⁷ busana nʼerĩberererya ebyo mũmĩnyererĩ Ĩsaya abũga ati,

¹⁸ Lebaya, Omugombe wage oyo nabiriyisoga; Omwanze wage, omutima wage amatsemesĩbwa busana naye. Nasyamũhĩra kʼOmũlĩmũ wage, Naye asyakanganĩa erĩbanza oko bandu bosĩ.

¹⁹ Siendisyanegena, kutse erĩbũya lukanda; Kutse siendisyasumba omulenge wuwe omo syombalu.

²⁰ Siendĩsyatwa oluseke lũbũnĩkĩre, Kandi siendisyahũmberya embũmba eyĩkatũmba. Erĩhĩka aho asyalekera erĩbanza ĩryakĩnda.

²¹ Nʼomo lĩna liwe Ebihanda byasyabana amaha.

Yesu na Belzebũlĩ

²² Neryo abandu mobaletera Yesu yʼomundu oyuli kwʼembĩnga kandi abya ndĩmatĩme nʼemũmũ. Neryo Yesu mwalamya omundu oyo nʼemũmũ eyo moyatoka erĩbũga nʼerilangira.

²³ Nʼesyondeko syosĩ mosyasweka. Kandi mobabũlya bati, Omundu oyo anganabya mugala wa Dawĩdĩ kwehĩ?

²⁴ Nĩkwa omugulu Abafarĩsayo bowa, mobabũga bati, Omundu oyo akahigira esyombĩnga syʼeyĩhya kusangwa Belzebũlĩ omũtabalĩ wʼesyombĩnga yukamuha maka wʼerihigasyo.

²⁵ Yesu mwaminya amalengekanĩa wabo, neryo mwabwirabo ati, Obuli bwami obũkayĩrwanaya bukabya kĩhũma. Nʼobuli mũyĩ kutse nyũmba ebĩkayĩrwanaya sibyendisyahangana.

²⁶ Kandi Satanĩ yamahiga Satanĩ, iyamayĩrwanĩa, neryo obwami bwayo ibwasyahangana buti kwehĩ!?

²⁷ Nage namabya ngahigira esyombĩnga syʼeyĩhya omo maka wa Belzebũlĩ, abana benyũ bakahigirasyo eyĩhya omo maka wandi kwehĩ? Neryo abana benyũ basyabya batswerĩ benyũ.

²⁸ Nĩkwa ĩngye namahiga esyombĩnga omo maka wʼOmũlĩmũ wa Nyamuhanga, kundi Obwami bwa Nyamuhanga bwabĩrĩbahĩkako.

²⁹ Kutse omundu angatoka eritula enyũmba yʼomundu wʼamaka yo ati, nʼerĩhũnga ebindu biwe, amatindatsũka eriboha omundu wʼamaka oyo kwehĩ? Neryo iniatoka erĩhũnga enyũmba yiwe.

³⁰ Oyute haguma nage, ĩnĩ nzĩgũ yage; nʼoyutekuma-kuma haguma nage, akapanza-panza.

³¹ Neryo ngababwira nyiti abandu bangabuyira obuli bibi nʼobuli bĩtsũmĩ, nĩkwa oyukatsuma Omũlĩmũ Abũyĩrĩre siendisyabuyirwa.

³² Omundundi oyo wasyabũga ekĩnywa kyʼobũyĩgũ oko Mugala wʼomundu asyabuyirwa, nĩkwa Omundundi oyo wa­syabũga ekĩnywa kyʼobũyĩgũ oko Mũlĩmũ Abũyĩrĩre, siendisyabuyirwa oko mugulu ono, kutse oko mugulu owakandisyasa.

Omuti nʼebĩgũma byago

³³ Muyire omuti mo muti mubuya, nʼebĩgũma byago mo bibuya; kutse muyire omuti mo mubi nʼebĩgũma byago mo bibi; kusangwa omuti akaminyikala busana nʼebĩgũma byago.

³⁴ Ĩnywe bana bʼesyonzoka! Mwangatoka muti kwehĩ erĩbũga ebĩnywa bibuya imune babi kwehĩ? Kusangwa obuno bũkabũga ebyoswĩre omo mutima.

³⁵ Omundu mubuya akahũlũkaya emyatsi mibuya eyĩkalũa omo kigona kiwe kyʼemyatsi mibuya, nʼomundu mubi akahũlũkaya emyatsi mibi eyĩkalũa omo kigona kiwe kyʼemyatsi mibi.

³⁶ Kandi ngabũga nenyũ nyiti, Oko kiro kyʼeritswera abandu basyakanganĩa obuli kĩnywa kitya-kitya ekyo bakabũga.

³⁷ Kusangwa busana nʼebĩnywa byawe wasyasĩngana, kandi busana nʼebĩnywa byawe wasyatswerwa.

Erĩbũlya ekitiko-tiko

³⁸ Neryo abandi bʼoko bakangĩrĩrya bʼemigambo nʼAbafarĩsayo, mobasũbĩrya Yesu bati, Mũkangĩrĩrya, twanzĩre erilangira kʼukakola ekitiko-tiko.

³⁹ Nĩkwa Yesu mwasũbĩryabo ati, Abandu ba sesene ni babi, kandi sibawite Nyamuhanga, bakasonda-sonda ekitiko-tiko; nĩkwa sibendihabwa ekitiko-tiko, kye nʼekitikotiko kyʼomũmĩnyererĩ Yona.

⁴⁰ Kusangwa ngoko Yona abya omo nda yʼenyama nene yʼomo ngetsi emisibo ĩsatu nʼebiro bisatu, na litya Omugala wʼomundu asyabya omo kitaka emisibo isatu nʼebiro bisatu.

⁴¹ Oko kiro kyʼeritswera, abandu bʼeNĩnawe basyahangana haguma nʼabandu bʼolulengo luno nʼerĩsĩngabo, kusangwa mobabindula emitima erireka ebibi okwʼĩtũlago lya Yona; neryo lebaya, oyũlengĩre Yona ane hano.

⁴² Oko Kiro Kyʼeritswera, Omwami wʼobũkalĩ wʼeLutambi lwʼeYĩkwa asyahangana haguma nʼabandu bʼolulengo luno, nʼerĩsĩngabo kusangwa alũa oko ndũlĩ syʼekihugo erĩowa amenge wa Solomono; neryo lebaya, oyũlengĩre Solomono ane hano!

Erisubula lyʼekĩrĩmũ kibi

⁴³ Omugulu ekĩrĩmũ kibi kĩkalũa omo mundu, kikalendera ikyalaba ahate magetsi, kikasonda-sonda ahʼeriluhukira, kikabulaho.

⁴⁴ Neryo kikayibwira kiti, Ngandisuba omo nyũmba yage eyo nasĩga; neryo omugulu kĩkahĩkamo, kĩkeya enyũmba eyo iri busa ĩnĩnabĩrĩrye, ĩnĩnakomĩre.

⁴⁵ Neryo kikahuluka, ikyaleta ebindi bĩrĩmũ birinda bibi kwilabakyo, neryo ibyingiramo; nʼendũlĩ yʼomundu oyo ikabya nyibi kwilaba erĩmbere. Ko bikandisyabya bitya oko bandu babi bʼomugulu ono.

Nyĩnya wa Yesu nʼabagala babo

⁴⁶ Yesu abere akĩnabũga nʼesyondeko, nyĩnya, nʼabagala babo mobahĩka. Mobahangana eyĩhya ibakasonda-sonda erĩbũga naye.

⁴⁷ Neryo omundu muguma mwabwira Yesu ati, Lebaya, koyo wawe nʼabagala benyũ banimene eyĩhya, bakasonda-sonda erĩkanĩa nawe.

⁴⁸ Yesu mwasũbĩrya ati, Koyo nindi, nʼabagala betu ni bahi kwehĩ?

⁴⁹ Neryo mwakanganĩa abiga buwe ati, Lebaya, koyo wage nʼabagala betu!

⁵⁰ Kusangwa omundu oyo wasyakola erisonda lya Tata wage oyuli elubula, yo mugala wetu, na mwali wetu, na koyo.